សុខភាព
អន្តរជាតិ
អ្នកជំងឺអេបូឡាទីពីរនៅម៉ាលី បានជាសះស្បើយ
× ១២ថ្ងៃបន្ទាប់ពីអ្នកជំងឺម្នាក់បានចេញពីមន្ទីរពេទ្យក្រោយជាសះស្បើយពីជំងឺអេបូឡានៅក្នុងប្រទេសម៉ាលី អ្នកជំងឺម្នាក់ទៀតក៏មានដំណឹងដ៏រីករាយដូចគ្នាផងដែរ ខណៈមនុស្ស៧នាក់ហើយ បានស្លាប់ដោយសារជំងឺដ៏កាចសាហាវ បើគិតចាប់តាំងពីការឆ្លងរាលដាលពីខែតុលាមកនៅក្នុងប្រទេសអាហ្វ្រិកខាងលិចមួយនេះ។
មន្ត្រីម្នាក់នៃក្រសួងសុខាភិបាលម៉ាលី បានអះអាងថា ការព្យាបាលអ្នកឆ្លងមេរោគអេបូឡាទីពីរ បានប្រកបដោយជោគជ័យ ហើយគាត់បានជាសះស្បើយតាំងពីថ្ងៃសុក្រមកម្ល៉េះ។
មកដល់ពេលនេះ មិនមានសញ្ញាណាមួយឡើយដែលបង្ហាញថា ប្រទេសម៉ាលីមានអ្នកផ្ទុកមេរោគអេបូឡា ខណៈមនុស្ស២៦នាក់ដែលធ្លាប់បានប៉ះពាល់អ្នកជំងឺ កំពុងស្ថិតនៅក្រោមការតាមដានរបស់វេជ្ជបណ្ឌិត ដោយភាគច្រើនត្រូវបានរកឃើញថា មិនមានអ្វីកើតឡើងឡើយ។
បើគិតចាប់តាំងពីខែតុលា មក ម៉ាលីមានមនុស្សស្លាប់៧នាក់ដោយសារអេបូឡា ដែលត្រូវបានរាយការណ៍ថា ឆ្លងពីប្រទេសហ្គីណេដែលនៅជិតខាងខ្លួន។ បច្ចុប្បន្ន អេបូឡា បានសម្លាប់មនុស្សជិត៦៤០០នាក់ក្នុងចំណោមអ្នកឆ្លងជាង១៧៩០០នាក់ ជាពិសេសនៅក្នុងប្រទេសលីប៊ី សេរ៉ាឡេអូន និងហ្គីណេ៕
© រក្សាសិទ្ធិដោយ thmeythmey.com