ជាតិ
សេដ្ឋកិច្ច
លោក សុខអាន៖ ឧស្សាហកម្មទេសចរណ៍ខ្មែរត្រូវបានប្រសិទ្ធនាមថាជា «មាសបៃតង»
× លោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានថ្លែងនាពិធីបើកព្រឹត្តិការណ៍បុណ្យសមុទ្រនៅខេត្តកោះកុងកាលពីថ្ងៃសៅរ៍ថា វិស័យទេសចរណ៍ដែលជាឧស្សហកម្មដ៏ក្មេងខ្លី បានក្លាយជាក្បាលម៉ាស៊ីនដ៏សំខាន់មួយក្នុងកំណើនសេដ្ឋកិច្ចកម្ពុជា ដែលត្រូវបានប្រសិទ្ធនាមថាជា «មាសបៃតង»។
នៅក្នុងសន្ទរកថាដ៏វែងមួយ លោក សុខ អាន បានលើកឡើងថា ចំនួនភ្ញៀវទេសចរបានកើនពី១១៨ពាន់នាក់នៅឆ្នាំ១៩៩៣ ទៅរហូតល់៤,២លាននាក់ក្នុងឆ្នាំ២០១៣ ហើយត្រូវបានប៉ាន់ស្មានថា នឹងកើនឡើងរហូតដល់ប្រមាណ៧,៥លាននាក់ត្រឹមឆ្នាំ២០២០ ។
ទាក់ទងនឹងពិធីបុណ្យសមុទ្រក្រោមប្រធានបទ «អេកូទេសចរណ៍តំបន់ឆ្នេរ៖ ការអភិវឌ្ឍបៃតង» នៅឆ្នាំនេះ លោកបានអះអាងថា ការយកខេត្តកោះកុងធ្វើជាម្ចាស់ផ្ទះ ពិតជាសក្តិសម ពីព្រោះកោះកុងគឺជាខេត្តមួយក្នុងចំណោមបណ្តាខេត្តដ៏ស្រស់ត្រកាលនៅតាមឆ្នេរសមុទ្រកម្ពុជា ដែលជាសមាជិកនៃក្លឹប «ឆ្នេរសមុទ្រស្អាតបំផុតរបស់ពិភពលោក» និងសម្បូរទៅដោយធនធានធម្មជាតិ និងបរិស្ថានដ៏ស្រស់ស្អាត។
លោក សុខ អាន បានគូសបញ្ជាក់ថា កំណើនយ៉ាងឆាប់រហ័សបែបនេះអាចសម្រេចឡើងបានដោយសារកត្តាអំណោយផលជាច្រើន ក្នុងនោះរួមមានសន្តិភាព ស្ថិរភាពនយោបាយនិងសន្ដិសុខនៅពេញផ្ទៃប្រទេស ដែលពុំធ្លាប់មាននៅក្នុងរយៈពេល ៥០០ឆ្នាំចុងក្រោយនៃប្រវត្តិសាស្ត្រកម្ពុជាក្រោមការដឹកនាំរបស់លោកនាយករដ្ឋមន្ត្រី ហ៊ុន សែន។
យោងតាមរបាយការណ៍កាលពីឆ្នាំ២០១៣ ការទទួលបានភ្ញៀវទេសចរបរទេសចំនួន៤,២លាននាក់ បាននាំឲ្យកម្ពុជាទទួលបានប្រាក់ចំណូលជាង២ពាន់លានដុល្លារ ដោយបានរួមចំណែកប្រមាណជា១៦ភាគរយនៃផលិតផលក្នុងស្រុកសរុប (GDP) ហើយបានបង្កើតការងារជូនប្រជាជនដោយផ្ទាល់ជាង ៥០០ពាន់ និងដោយប្រយោល រាប់សិបពាន់ផ្សេងទៀត។
ក្រៅពីតំបន់សៀមរាប-អង្គរ រមណីដ្ឋានប្រាសាទព្រះវិហារ លោកឧបនាយករដ្ឋមន្ត្រី សុខ អាន បានលើកឡើងថា កម្ពុជាសម្បូរទៅដោយធនធានធម្មជាតិ និងបរិស្ថានស្រស់បំព្រងជាច្រើន ដូចជាឆ្នេរសមុទ្រលំដាប់ពិភពលោក កោះទន្លេ បឹងបួរ ព្រៃឈើ និងសត្វព្រៃ ជាពិសេសសត្វផ្សោតទន្លេមេគង្គដ៏កម្រ។
លោកបានបន្ថែមថា ការរៀបចំព្រឹត្តិការណ៍ផ្សេងៗ ដូចជា ព្រះរាជពិធីបុណ្យអុំទូក អង្គរ-សង្ក្រាន្ត បុណ្យសមុទ្រ និងពិធីបុណ្យឆ្លងឆ្នាំ ជាដើម ក៏ជាផ្នែកដែលជុំរុញឲ្យមានកំណើនភ្ញៀវទេសចរផងដែរ៕
© រក្សាសិទ្ធិដោយ thmeythmey.com