អន្តរជាតិ
អាមេរិកអោយប្រជាជនខ្លួននៅឆ្ងាយពីទីតាំងចាប់ចំណាប់ខ្មាំងអូស្ត្រាលី
× ក្រោយពេលដែលករណីចាប់ចំណាប់ខ្មាំងកើតមានឡើងនៅទីតាំងហាងកាហ្វេមួយ ឈ្មោះMartin Place នៅក្នុងទីក្រុងស៊ីដនី ប្រទេសអូស្ត្រាលីនៅថ្ងៃចន្ទនេះ រដ្ឋាភិបាលក្រុងវ៉ាស៊ីនតោនបានអំពាវនាវអោយប្រជាជនខ្លួនចាកចេញអោយឆ្ងាយពីទីកន្លែងកើតហេតុ។ មកទល់ពេលនេះ ប៉ូលីសនិងកងកម្លាំងពិសេសជាច្រើននាក់កំពុងហ៊ុំព័ទ្ធកន្លែងកើតហេតុ ខណពេលដែលចំណាប់ខ្មាំងប្រមាណជិត៤០នាក់ស្ថិតក្នុងកណ្តាប់ដៃខ្មាន់កាំភ្លើង។
រដ្ឋាភិបាលក្រុងវ៉ាស៊ីនតោនបានប្រកាសអំពាវនាវអោយប្រជាជនខ្លួនដែលកំពុងស្ថិតនៅក្នុងទឹកដីអូស្ត្រាលី អោយចាកចេញអោយឆ្ងាយពីទីតាំងករណីចាប់ចំណាប់ខ្មាំងកើតឡើងនាហាងកាហ្វេ Martin Place នៅក្នុងទីក្រុងស៊ីដនីដែលកំពុងស្ថិតក្រោមការហ៊ុំព័ទ្ធរបស់កងកម្លាំងអូស្ត្រាលី។ ព័ត៌មានបន្ទាន់នេះ ត្រូវបានជូនដំណឹងដោយស្ថានកុងស៊ុលអាមេរិកប្រចាំនៅក្នុងទីក្រុងស៊ីដនី ហើយស្ថានកុងស៊ុលអាមេរិកនេះ បានជំរុញអោយប្រជាជនអាមេរិកទាំងមេត្តាប្រុងប្រយ័ត្ន ត្រៀមលក្ខណៈអោយបានគ្រប់គ្រាន់សម្រាប់ការស្វែងរកជំនួយ និងតាមដានព័ត៌មាននានាអោយបានដិតដល់ផង។
ចំណែកប្រធានាធិបតីអាមេរិក លោក បារ៉ាក់ អូបាម៉ាឯណោះវិញក៏កំពុងតាមដានករណីចាប់ជាចំណាប់ខ្មាំងនៅអូស្ត្រាលីនេះផងដែរ ហើយទីប្រឹក្សាជាន់ខ្ពស់ប្រឆាំងភេរវកម្មលោក Lisa Monaco ជាអ្នកទទួលបន្ទុកសង្ខេបព័ត៌មានជុំវិញការចាប់ចំណាប់ខ្មាំងនេះ។ យ៉ាងណាក៏ដោយការជូនដឹងអោយប្រជាជនខ្លួនប្រុងប្រយ័ត្ននេះ ជាវិធានការមួយការពារកុំអោយគ្រោះថ្នាក់ណាមួយកើតមានឡើង ដ្បិដអាមេរិកជាមុខសញ្ញាចម្បងរបស់ក្រុមភេរវជនឥស្លាម។
ទាក់ទិននឹងករណីនេះដែរ ជាបឋមគេសន្និដ្ឋានថា វាអាចជាប់ពាក់ព័ន្ធនឹងក្រុមភេរវជនរដ្ឋឥស្លាម ព្រោះទង់ជាតិពណ៌ខ្មៅមានអក្សរអារ៉ាប់នៅលើនោះ (ទង់ជីហាត) ត្រូវបានគេលើកឡើងនៅក្នុងហាងកាហ្វេក្រោយមានករណីចាប់ខ្លួនជាចំណាប់ខ្មាំងនេះ។ បើតាមការអោយដឹងពីសំណាក់អាជ្ញាធរអូស្ត្រាលី ក្រោយមានការឧបទ្ទវហេតុនេះកើតឡើង មន្ត្រីប៉ូលីសបានជម្លៀសប្រជាជនចេញអស់ពី Opera House ហើយពេលនេះសមត្ថកិច្ចបានចាប់ខ្លួនជនសង្ស័យម្នាក់ផងដែរ ប៉ុន្តែជននោះដូចជាមិនមានពាក់ព័ន្ធដោយផ្ទាល់នឹងការចាប់ចំណាប់ខ្មាំងនោះឡើយ។ យ៉ាងណាក៏ដោយគេរង់ចាំមើលព័ត៌មានបន្ថែមទៀតស្តីពីចំនួនជនស៊ីវិលដែលស្ថិតក្រោមការចាប់ខ្លួន ហើយគេមិនដឹងថា ក្រុមខ្មាន់កាំភ្លើងនេះចង់បានអ្វីអោយប្រាកដឡើយ៕
© រក្សាសិទ្ធិដោយ thmeythmey.com