សង្គមអន្តរជាតិ
អន្តរជាតិ
ចិនផលិតកង់ទំនើបដែលមានបំពាក់ Bluetooth GPS និងប្រព័ន្ធការពារចោរលួច
×
ក្រុមហ៊ុនអ៊ីនធើណែត Baidu របស់ចិនបានប្រកាសកាលពីសប្ដាហ៍មុនថា ក្រុមហ៊ុននឹងអភិវឌ្ឍន៍កង់ឆ្លាតវៃមានឈ្មោះថាDuBikeដែលជាកង់មានភ្ជាប់Bluetoothបំពាក់ប្រព័ន្ធ GPS និងឧបករណ៍ចាប់សញ្ញាដើម្បីផ្តល់នូវព័ត៌មានគ្រប់យ៉ាង និងពេលវេលាពិតប្រាកដ ដើម្បីការពារអំពើចោរកម្ម ។
ផែនទីរបស់ក្រុមហ៊ុនអ៊ីនធើណែត Baidu ដែលមានភ្ជាប់នៅក្នុងកង់ឆ្លាតវៃនេះ នឹងបង្ហាញពីទិសដៅរបស់អ្នកធ្វើដំណើរ ដែលមានបំពាក់នៅនឹងដៃកង់។ ក្នុងពេលជាមួយគ្នានេះដែរឧបករណ៍ចាប់សញ្ញាក៏នឹងត្រួតពិនិត្យពីព័ត៌មានផ្សេងៗទៀតផងដែរ ដូចជាកម្រិតកាឡូរី និងចង្វាក់បេះដូងរបស់អ្នកជិះផងដែរ។លើសពីនេះទៅទៀត វាក៏អាចបញ្ជាក់ប្រាប់អ្នកជិះកង់ឆ្លាតម្នាក់ ទៅកាន់អ្នកជិះម្នាក់ទៀត ពីទីតាំងរបស់គេកំពុងស្ថិតនៅថែមទៀតផង។
គេនៅមិនទាន់ដឹងថាកង់ឆ្លាតវៃនេះ ត្រូវគេដាក់លក់នៅពេលណា និងក្នុងតម្លៃប៉ុន្មាននោះទេ។ ប៉ុន្តែគេគ្រាន់តែដឹងថា បច្ចុប្បន្ននេះក្រុមហ៊ុនដែលកំពុងអភិវឌ្ឍន៍កង់ប្រភេទថ្មីនេះ គឺនឹងផលិតសម្រាប់លក់នៅក្នុងប្រទេសចិនតែប៉ុណ្ណោះ ហើយចំនួនមានកំណត់ទៀតផង។
ទោះជាយ៉ាងណាក៏ដោយ នៅក្នុងរយៈពេលថ្មីនេះគេសង្កេតឃើញថា ក្រុមហ៊ុន global dot-com បានច្នៃប្រឌិតចាប់ពីទូរទស្សន៍ឆ្លាតវៃ រហូតដល់នាឡិកាដៃឆ្លាតវៃ និងបច្ចុប្បន្ននេះគេកំពុងតែអភិវឌ្ឍន៍រថយន្តឆ្លាតវៃបន្ថែមទៀត។ ប៉ុន្តែសម្រាប់ក្រុមហ៊ុនចិនខាងលើនោះវិញ គឺពួកគេគ្រាន់តែចង់ផលិតកង់សម្រាប់អតិថិជន ដែលចូលចិត្តជិះកង់នៅក្នុងប្រទេសនេះ សរុបប្រមាណជា ៤៣០ លាននាក់តែប៉ុណ្ណោះ៕
© រក្សាសិទ្ធិដោយ thmeythmey.com