អន្តរជាតិ
អូស្ត្រាលី៖ ចំណាប់ខ្មាំង២នាក់ទៀតរួចខ្លួនខណៈប៉ូលីសកំពុងចរចាជាមួយខ្មាន់កាំភ្លើង
× ចំណាប់ខ្មាំងប្រមាណពីរនាក់ផ្សេងទៀតបានរត់រួចខ្លួនចេញពីកណ្តាប់ដៃក្រុមប្រដាប់អាវុធនៅក្នុងហាងកាហ្វេ Martin Place នាទីក្រុងស៊ីដនី។ មកទល់ពេលនេះចំណាត់ខ្មាំងដែលបានរត់រួចខ្លួនមានសរុបចំនួន ០៥នាក់ហើយ។
សាក្សី និងមន្ត្រីប៉ូលីសនៅក្បែរកន្លែងកើតហេតុបានអោយដឹងថា គេសង្កេតឃើញចំណាប់ខ្មាំងប្រមាណ២នាក់ផ្សេងទៀតបានរំដោះខ្លួនចេញពីផុតកណ្តាប់ដៃក្រុមប្រដាប់អាវុធដែលកំពុងចាប់ចំណាប់ខ្មាំងមិនក្រោម១៣នាក់ក្នុងហាងកាហ្វេ Martin Place នាទីក្រុងស៊ីដនី។ មកទល់ពេលនេះចំនួនចំណាប់ខ្មាំងដែលរត់គេចខ្លួនបានជោគជ័យនោះមានចំនួន ០៥នាក់ហើយ។
ប្រហែលមួយម៉ោងមុននឹងមានចំណាប់ខ្មាំងពីរនាក់រត់ផ្សេងទៀតចេញពីហាងកាហ្វេនោះ គេឃើញមានមនុស្សពីរនាក់បានរត់ចេញតាមទ្វារខាងមុខហាងកាហ្វេ ខណៈពេលដែលបុរសម្នាក់ទៀតបានរត់ចញតាមច្រកទ្វារចំហៀងដែលហ៊ុំព័ទ្ធដោយប៉ូលីសដែលកំពុងកាន់អាវុធច្រោងច្រាងថែមទៀតផង។ យ៉ាងណាក៏ដោយ ស្នងការប៉ូលីសតំបន់ New South Wales បានប្រកាសបន្តប្រតិបត្តិការដោយបញ្ចប់អោយបាននូវការរំដោះចំណាប់ខ្មាំងដោយសន្តិភាព ហើយលោកសន្យាថានឹងធ្វើអ្វីគ្រប់យ៉ាងតាមដែលអាចធ្វើទៅបាន។ មកទល់ពេលនេះខាងអាជ្ញាធរអះអាងថាខ្លួនបាន និងកំពុងចរចាជាមួយខ្មាន់កាំភ្លើងដែលកំពុងចាប់ជនស៊ីវិលជាចំណាប់ខ្មាំង ។
ប៉ុន្តែព័ត៌មានលម្អិតផ្សេងទៀតនោះគេមិនទាន់បានដឹងច្បាស់នៅឡើយទេ។ ដោយឡែក ទាក់ទិននឹងចំនួនចំណាប់ខ្មាំង នាយកប្រតិបត្តិក្រុមហ៊ុនLindt បានអះអាងថា ក្នុងចំណោមចំណាប់ខ្មាំងទាំងអស់មានបុគ្គលិកប្រមាណ ១០រូប និង អតិថិជនរហូតដល់៣០នាក់ឯណោះ។ ការអះអាងនេះកើតឡើងស្របពេលដែលប៉ូលីសបញ្ជាក់ថា ចំនួនចំណាប់ខ្មាំងនៅមិនទាន់ដឹងច្បាស់នៅឡើយ៕
© រក្សាសិទ្ធិដោយ thmeythmey.com