កីឡាជាតិ
ជាតិ
កីឡាករយុវជនរបស់ RSISA ទទួលបាននូវការចាប់អារម្មណ៍ខ្លាំងនៅសិង្ហបុរី
× បើទោះបីជាមិនទទួលបានជ័យលាភីក្តី ប៉ុន្តែក្រុមកីឡាករយុវជនថ្នាលរបស់សាលា Rising Stars International Sports Academy (RSISA) ទទួលបាននូវការចាប់អារម្មណ៍យ៉ាងខ្លាំងក្នុងព្រឹត្តិការណ៍ Asia Youth Cup ដែលត្រូវបានរៀបចំឡើងជាលើកដំបូងដោយស្ថាប័ន 2Touch Sports នៅក្នុងប្រទេសសិង្ហបុរី កាលពីចុងសប្តាហ៍កន្លងមក។
នៅក្នុងការប្រកួតដ៏ស្វិតស្វាញ ក្រុម U16 របស់ Rising Stars បានធ្លាក់ចេញនៅវគ្គមួយភាគបួនផ្តាច់ព្រ័ត្រក្រោយចាញ់ក្រុម WSA Youth របស់សិង្ហបុរី ក្នុងលទ្ធផល ៤-០ ។ ស្របពេលជាមួយគ្នា ក្រុម U14 បានឈានទៅកាន់វគ្គពាក់កណ្តាលផ្តាច់ព្រ័ត្រ ប៉ុន្តែបានចាញ់ក្រុម Serporn របស់ហ្វីលីពីនដោយសារការទាត់បាល់ប៉េណាល់ទី ក្រោយលទ្ធផលស្មើ ០-០ ។ ដូចគ្នាផងដែរ ក្រុម U14 ដែលតំណាងឲ្យកម្ពុជា បានចាញ់ក្រុម Amstam Soccer School របស់ឥណ្ឌូនេស៊ី ដោយសារបាល់ប៉េណាល់ ក្រោយលទ្ធផលស្មើ ០-០ នាការប្រកួតដណ្តើមយកលេខបី។
លោក Ken Gadaffi នាយកកម្មវិធី RSISA និងគ្រូបង្វឹកលោក ស៊ុំ វណ្ណា រួមទាំងកីឡាករ១៧នាក់ផ្សេងទៀតបានមកដល់កម្ពុជាកាលពីថ្ងៃចន្ទកន្លងមក។ លោក Ken Gadaffi បានវាយតម្លៃពីភាពជោគជ័យរបស់ក្រុម ជាពិសេសការទទួលបានបទពិសោធន៍ជាលក្ខណៈអន្តរជាតិរបស់យុវជន RSISA៕
© រក្សាសិទ្ធិដោយ thmeythmey.com