អន្តរជាតិ
ក្រុមហ៊ុនមួយនៅចិនដាក់លុយ១២ម៉ឺនដុល្លារក្នុងធុងរួចឲ្យបុគ្គលិកចាប់យកម្នាក់ម្ដងៗ
× នៅសល់តែរយៈពេល ២ ថ្ងៃទៀតតែប៉ុណ្ណោះ ឆ្នាំសកល ២០១៥ នឹងត្រូវចូលមកដល់ ហើយប្រជាជននៅទូទាំងពិភពលោកកំពុងតែរងចាំថ្ងៃនោះ ព្រោះថានឹងមានកម្មវិធីជាច្រើនត្រូវបានគេរៀបចំឡើងដើម្បីអបអរឆ្នាំថ្មី។
យោងតាមការផ្សាយរបស់ទូរទស្សន៍ CCTV មានក្រុមហ៊ុនមួយ ដែលស្ថិតនៅក្នុងទីក្រុងWenzhou ខេត្ត Zhejiang ភាគខាងកើតប្រទេសចិន បានរៀបចំកម្មវិធីផ្ដល់កាដូ ដល់បុគ្គលិករបស់ខ្លួន សម្រាប់ឱកាសឆ្នាំថ្មី ដោយបានដាក់ប្រាក់ចំនួន ៨០ ម៉ឺនយន់ ឬស្មើនឹងជាង ១២ ម៉ឺនដុល្លារ ទៅក្នុងធុងមួយ រួចហើយឲ្យបុគ្គលិកមកចាប់យកម្នាក់ម្ដងៗ ។
ប្រភពដដែលនេះក៏បានផ្សាយថា បុគ្គលិកក្រុមហ៊ុនទាំងអស់ នឹងមានឱកាសម្នាក់ម្ដង ក្នុងការប្រើដៃម្ខាងដើម្បីចាប់យកប្រាក់សុទ្ធមួយដៃពេញ ពីក្នុងធុងនោះ តាមដែលអាចចាប់បាន។
ក្រោយពីកម្មវិធីចាប់ឆ្នោតត្រូវបានបញ្ចប់ អ្នកដែលអាចចាប់យកប្រាក់បានច្រើនជាងគេ គឺបានទៅលើបុគ្គលិកភេទប្រុសម្នាក់ ដែលគាត់អាចច្បាមយកលុយពីក្នុងធុងសំណាង បានរហូតសល់ ២ ម៉ឺនយន់ ឬស្មើនឹង ៣ ២១៨ ដុល្លារ ព្រោះតែគាត់មានបាតដៃធំជាងគេ ក្នុងក្រុមហ៊ុន៕
© រក្សាសិទ្ធិដោយ thmeythmey.com