អន្តរជាតិ
នយោបាយអន្តរជាតិ
×![]()
ក្រៅពីចោទប្រកាន់ក្រុងព្យុងយ៉ាងថា ជាអ្នកនៅពីក្រោយការវាយប្រហារតាមអ៊ិនធឺណែតប្រឆាំងក្រុមហ៊ុនសូនី សមាជិកសភាអាមេរិកម្នាក់ឈ្មោះ Lindsey Grahamបានបង្ហាញការសង្ស័យដោយលើកឡើងថា រដ្ឋាភិបាលក្រុងប៉េកាំងអាចជាប់ពាក់ព័ន្ធការវាយប្រហារក្រុមហ៊ុនសូនីនេះដែរ។ មិនត្រឹមតែចោទប្រកាន់ចិនឡើយ សមាជិកសភាអាមេរិកខាងលើក៏បានស្នើអោយមានការដាក់ទណ្ឌកម្មបន្ថែមប្រឆាំងកូរ៉េខាងជើងនិងបញ្ចូលឈ្មោះប្រទេសនេះចូលក្នុងបញ្ជីរដ្ឋគាំទ្រភេរវជនឡើងវិញ។
លោក មុំ ពិទួរ្យ លម្អិតព័ត៌មាននេះ
ក្រោយចោទប្រកាន់រដ្ឋាភិបាលកូរ៉េខាងជើង ថាជាអ្នកដែលស្ថិតនៅពីក្រោយការវាយប្រហារតាមប្រព័ន្ធអ៊ិនធឺណែតប្រឆាំងក្រុមហ៊ុនសូនី សមាជិកព្រឺទ្ធសភាអាមេរិកម្នាក់លោក Linsey Graham បានថ្លែងចោទប្រកាន់ថាចិនក៏ជាប់ពាក់ព័ន្ធក្នុងការវាយប្រហារនេះដែរ។
លោកបានលើកឡើងថា បើគ្មានការចូលរួម ឬយ៉ាងហោចណាស់ការដឹងលឺរបស់ក្រុងប៉េកាំងក្នុងការបង្កើតសកម្មភាពលួចទិន្នន័យតាមប្រព័ន្ធអ៊ិនធឺណែតទេ កូរ៉េខាងជើងម្នាក់ឯងប្រហែលជាមិនអាចធ្វើបានឡើយ។ ព្រឹទ្ធសមាជិកមកពីគណបក្សសាធារណរដ្ឋម្នាក់នេះ បានអះអាងថា យើងហាក់ដូចជាជឿជាក់ណាស់ថា រឿងរ៉ាវដែលបានកើតឡើងប្រាកដជាមានការជួយជ្រោមជ្រែងពីរបបដឹកនាំក្រុងប៉េកាំង។ យ៉ាងណាក៏ដោយសមាជិកព្រឹទ្ធសភារូបនេះ បានស្នើសុំអោយរដ្ឋាភិបាលលោក ប៉ារ៉ាក់អូបាម៉ា ពិចារណាលើការដាក់ទណ្ឌកម្មបន្ថែមប្រឆាំងរដ្ឋាភិបាលក្រុងព្យុងយ៉ាង និងបញ្ចូលឈ្មោះរដ្ឋាភិបាលនេះនៅក្នុងបញ្ជីខ្មៅនៃរដ្ឋគាំទ្រក្រុមភេរវជនឡើងវិញ។
សមាជិកព្រឹទ្ធសភាអាមេរិកនេះ បានបង្ហាញការគាំទ្ររដ្ឋាភិបាលលោកបារ៉ាក់ អូបាម៉ា ដែលព្រមានឆ្លើយតបកូរ៉េខាងជើង ហើយនឹងហៅការវាយប្រហារតាមអ៊ីនធឺណែតនេះថា ជាចលនាភេរវកម្ម។
រដ្ឋាភិបាលក្រុងវ៉ាស៊ីនតោនមិនទាន់បានប្រកាសបន្ថែមទណ្ឌកម្ម និងបញ្ចូលឈ្មោះប្រទេសកូរ៉េខាងជើងចូលក្នុងបញ្ជីរដ្ឋគាំទ្រភេរវជនជាថ្មីទៀតឡើយ។ ប៉ុន្តែមកទល់ពេលបច្ចុប្បន្នទីភ្នាក់ងារចារកម្មអាមេរិក បានត្រឹមតែអះអាងថា កូរ៉េខាងជើងជាប្រទេសដែលនៅពីក្រោយការវាយប្រហារតាមប្រព័ន្ធអ៊ិនធឺណែត ប្រឆាំងក្រុមហ៊ុនសូនី ប៉ុន្តែគេមិនបានអោយដឹងថា មានប្រទេសណាផ្សេងទៀតដែលរួមគំនិត និងជួយសហការជាមួយកូរ៉េខាងជើងនោះឡើយ។
បើតាមការអះអាងខាងលើ ការចោទប្រកាន់រដ្ឋាភិបាលក្រុងប៉េកាំងដែលមានជាប់ពាក់ព័ន្ធករណីវាយប្រហារនេះ គឺជារឿងមិនច្បាស់លាស់និងស្រពិចស្រពិលនៅឡើយទេ។ បើទោះជាយ៉ាងណាក្តី គេមិនទាន់ឃើញមានការឆ្លើយតបពីសំណាក់ក្រុងប៉េកាំងចំពោះការចោទប្រកាន់នេះឡើយ។
ក្រោយរងការរិះគន់ និងការចោទប្រកាន់ រដ្ឋាភិបាលលោក គិម ជុងអ៊ុន បានប្រកាសថ្កោលទោសរដ្ឋាភិបាលក្រុងវ៉ាស៊ីនតោន និងប្រដូចប្រធានាធិបតីអាមេរិកទៅនឹងសត្វស្វានៅក្នុងព្រៃត្រូពិកផងដែរ។
គួរបញ្ជាក់ថា ការវាយប្រហារតាមប្រព័ន្ធអ៊ិនធឺណែតប្រឆាំងក្រុមហ៊ុនសូនី កើតឡើង ដោយសារក្រុមហ៊ុននេះបង្ហាញវីដេអូមួយ ដែលបង្ហាញពីឈុតឆាកប្រមាថមេដឹកនាំកំពូលកូរ៉េខាងជើង និងគម្រោងធ្វើឃាតលោក គីម ជុងអ៊ុន របស់ក្រុម CIAអាមេរិក៕
© រក្សាសិទ្ធិដោយ thmeythmey.com
