អន្តរជាតិ
នយោបាយអន្តរជាតិ
ណាតូរៀបចំដកទ័ពនិងបញ្ចប់ប្រតិបត្តិការរបស់ខ្លួននៅអាហ្វហ្កានីស្ថាន
× បក្សសម្ព័ន្ធយោធាណាតូបានរៀបចំពីធីបិទបញ្ចប់ប្រតិបត្តិការយោធារបស់ខ្លួននៅក្នុងទឹកដីអាហ្វហ្កានីស្ថាន។ ពិធីដែលប្រារព្ធជាផ្លូវការកាលពីម្សិលមិញនេះបញ្ជាក់ពីការបញ្ចប់ប្រតិបត្តិការយោធា និងបញ្ចប់សង្គ្រាមលោកខាងលិចប្រឆាំងនឹងក្រុមភេរវជន ដោយទុកអោយរដ្ឋាភិបាលក្រុងកាប៊ុលដោះស្រាយបញ្ហាខ្លួនឯង និងប្រឈមមុខនឹងជម្លោះប្រដាប់អាវុធជាមួយក្រុមកងកម្លាំងប្រឆាំងរដ្ឋាភិបាល។
លោក សៅ ផលនិស្ស័យ លម្អិតព័ត៌មាននេះ!
កាលពីម្សិលមិញនេះបក្សសម្ព័ន្ធយោធាណាតូបានរៀបចំពិធីមួយបង្ហាញពីការបិទបញ្ចប់ប្រតិបត្តិការយោធារបស់ខ្លួននៅក្នុងប្រទេសអាហ្វហ្កានីស្ថាន។ ពិធីជាផ្លូវការរបស់បក្សសម្ព័ន្ធយោធាណាតូនេះ បង្ហាញថាណាតូបញ្ចប់យុទ្ធនាការយោធារបស់ខ្លួនដើម្បីប្រឆាំងក្រុមភេរវជននៅអាហ្វហ្កានីស្ថាន ដោយទុកការទទួលខុសត្រូវដល់រដ្ឋាភិបាលប្រទេសនេះ និងប្រឈមមុខនឹងជម្លោះប្រដាប់អាវុធជាមួយក្រុមកងម្លាំងប្រឆាំងរដ្ឋាភិបាល។ ការប្រកាសដកកងទ័ពរបស់ណាតូនេះ នេះកើតឡើងក្នុងរយៈពេល១៣ឆ្នាំក្រោយពេលដែលកងកម្លាំងនេះបានចូលរួមធ្វើសង្គ្រាមប្រឆាំងក្រុមភេរវជនដែលដឹកនាំដោយរដ្ឋាភិបាលក្រុងវ៉ាស៊ីនតោន។
យ៉ាងណាក៏ដោយ ចាប់ពីថ្ងៃទី១ខែមករាឆ្នាំ ២០១៥ទៅ កងកម្លាំងជំនួយសន្តិសុខអន្តរជាតិដឹកនាំដោយរដ្ឋាភិបាលក្រុងវ៉ាស៊ីនតោន នឹងត្រូវជំនួសដោយកងកម្លាំងគណកម្មការជួយបណ្តុះបណ្តាលនិងគាំទ្រកងកម្លាំងរដ្ឋាភិបាលអាហ្វហ្កានីស្ថាន និងមិនមានកងកម្លាំងសម្រាប់ប្រយុទ្ធដូចមុនឡើយ។ មន្ត្រីយោធាជាន់ខ្ពស់របស់ក្រុងវ៉ាស៊ីតោន John F Campbellបានប្រាប់ទៅកាន់មន្ត្រីយោធាដែលចូលរួមក្នុងពិធីម្សិលមិញនេះថា ណាតូ និងអាហ្វហ្កានីស្ថាននឹងនៅបន្តភាពជាដៃគូជាមួយគ្នាក្នុងការដោះស្រាយបញ្ហាសន្តិសុខ នានាបន្តទៀត។
ក្រៅពីលើកឡើងពីការបន្តកិច្ចសហប្រតិបត្តិការជាមួយរដ្ឋាភិបាលក្រុងកាប៊ុល មន្ត្រីយោធាខាងលើក៏បានបង្ហាញការគោរពដល់វិញ្ញណក្ខ័ន្ធកងកម្លាំងអន្តរជាតិ និងអាហ្វហ្កានីស្ថានដែលបានពលីក្នុងភ្លើងសង្គ្រាមប្រឆាំងនឹងក្រុមភេរវជនតាលីបង់ផងដែរ ហើយលោកបានថ្លែងថាផ្លូវដែលត្រូវដើរនៅមានឧបសគ្គច្រើន ប៉ុន្តែលោកជឿជាក់ថាជ័យជំនះនឹងកើតមានឡើងនៅពេលខាងមុខ។ ក្នុងការធ្វើសង្គ្រាមប្រឆាំងក្រុមភេរវជនអស់ប៉ុន្មានឆ្នាំនេះ គេអះអាងថា កងកម្លាំងនិងប៉ូលីសអាហ្វហ្កានីស្ថានយ៉ាងហោចណាស់ ៤៦០០នាក់បានស្លាប់បាត់បង់ជីវិត និងជនស៊ីរិលជាច្រើននាក់ផ្សេងទៀតបានស្លាប់បាត់បង់ជីវិត។
បើតាមការអោយដឹងពីមន្ត្រីណាតូ កងកម្លាំងអន្តរជាតិប្រមាណ ១២៥០០នាក់នឹងនៅបន្តវត្តមាននៅក្នុងប្រទេសអាហ្វហ្កានីស្ថាន ហើយពួកគេកាតព្វកិច្ចជួយគាំទ្រកងកម្លាំងរដ្ឋាភិបាលក្រុងកាប៊ុលដើម្បីប្រឆាំងកម្លាំងតាលីបង់ ដែលធ្លាប់គ្រប់គ្រងប្រទេសនេះពីឆ្នាំ ១៩៩៦ដល់ឆ្នាំ ២០០១នោះ។ កាលពីឆ្នាំ ២០១១ កងកម្លាំងណាតូដែលស្ថិតនៅប្រទេសអាហ្វហ្កានីស្ថានមានរហូតដល់ជាង ១សែននាក់ ដែលមកពីប្រទេសចំនួន៥០ ដែលជាដៃគូនិងសមាជិកបក្សសម្ព័ន្ធយោធាណាតូ។ ដោយឡែកប្រធានាធិបតីអាមេរិក លោក បារ៉ាក់ អូបាម៉ា បានប្រកាសអបអរសារទរការបញ្ចប់ប្រតិបត្តិការយោធារបស់បក្សសម្ព័ន្ធយោធាណាតូនៅអាហ្វហ្កានីស្ថានផងដែរ ដោយលោកលើកឡើងថា វាជាព្រឹត្តការណ៍ប្រវត្តិសាស្ត្រមួយ។
លោកបានបានបន្ថែមថា សង្គ្រាមដែលវែងបំផុតក្នុងប្រវត្តិសាស្ត្រអាមេរិកនេះបានឈានដល់ទីបញ្ចប់ហើយ ហើយលោកអរគុណដល់បណ្តាកងទ័ពដែលពលីមិនខា្លចនឿយហត់ធ្វើសង្គ្រាមប្រឆាំងកងកម្លាំងភេរវជន ជាពិសេសធ្វើអោយរបបដឹកនាំក្រុមភេរវជនអាល់កៃដា បែកខ្ចាត់ខ្ចាយ និងធ្វើអោយកងកម្លាំងភេរវជនទៀតចុះអន់ខ្សោយ ជាពិសេសជួយសង្គ្រោះជីវិតប្រជាជនអាមេរិករាប់មិនអស់ផង។ ប៉ុន្តែយ៉ាងណាក៏ដោយលោក អូបាម៉ា បានព្រមានផងដែរថា អាហ្វហ្កានីស្ថានៅតែជាទីកន្លែងគ្រោះថ្នាក់បំផុត ហើយកងកម្លាំង និងប្រជាជននៃប្រទេសនេះត្រូវលះបង់ និងប្រឹងប្រែងដើម្បីការពារប្រទេសរបស់ពួកគេនៅពេលខាងមុខ៕
© រក្សាសិទ្ធិដោយ thmeythmey.com