ជាតិ
សង្គមជាតិ
«គម្រោងជួយមើលសាលារៀន» ត្រូវបានសម្ពោធ លោក សេង ឬទ្ធី នាយកប្រតិបត្តិវិទ្យាស្ថានខ្មែរសម្រាប់អភិវឌ្ឍន៍ជាតិ
× នៅថ្ងៃចន្ទម្សិលមិញ វិទ្យាស្ថានខ្មែរសម្រាប់អភិវឌ្ឍន៍ជាតិ (KIND) និងសម្ព័ន្ធគណនេយ្យភាពសង្គមអាស៊ីបូព៌ា និងប៉ាស៊ីហ្វិក (ANSA-EAP) បានរៀបចំសម្ពោធគម្រោងគេហទំព័រ និងប្រព័ន្ធឆ្លើយតបសារជាសំឡេង ដើម្បីពង្រឹងប្រព័ន្ធអប់រំឲ្យកាន់តែប្រសើរ។
គម្រោងជួយមើលសាលារៀន គឺជាកម្មវិធីតាមដានការខ្វះខាត និងតម្រូវការនៅតាមសាលារៀន ដែលត្រូវបានផ្តល់ព័ត៌មានដោយ សិស្សានុសិស្ស គ្រូបង្រៀន ប្រជាពលរដ្ឋ តាមរយៈការប្រើប្រាស់ ប្រព័ន្ធបណ្តាញសង្គម និងប្រព័ន្ធទូរសព្ទ។ គម្រោងនេះត្រូវបានបង្កើតរួមគ្នាដោយវិទ្យាស្ថានខ្មែរសម្រាប់អភិវឌ្ឍន៍ជាតិ (KIND) និងសម្ព័ន្ធគណនេយ្យភាពសង្គមអាស៊ីបូព៌ា និងប៉ាស៊ីហ្វិក (ANSA-EAP) ក្រសួងអប់រំ និងអង្គការមួយចំនួនទៀត។
គម្រោងជួយសាលារៀន ត្រូវបានអនុវត្តសាកល្បងនៅក្នុងសាលារៀនចំនួន១២ (៦នៅជាយរាជធានីភ្នំពេញ និង៦ទៀតនៅក្នុងខេត្តកំពង់ចាម) នៅក្នុងឆ្នាំ២០១៤នេះ។
ចាប់ពីការសម្ពោធ«គម្រោងជួយសាលារៀន»ជាផ្លូវការពីថ្ងៃនេះទៅ សិស្ស គ្រូបង្រៀន និងមហាជនទាំងអស់ អាចរាយការណ៍ព័ត៌មានអំពីបញ្ហារបស់សាលារៀនតាមរយៈ គេហទំព័រwww.cmscambodia.org, ទំព័រហ្វេសប៊ុកជាភាសាអង់គ្លេស «CheckmyschoolCambodia», ជាហ្វេសប៊ុកជាភាសាខ្មែរ «ជួយមើលសាលារៀន» និងទូរសព្ទលេខ ០៧០ ២២ ១១ ២៥ ។
លោក សេង ឬទ្ធី នាយកប្រតិបត្តិវិទ្យាស្ថានខ្មែរសម្រាប់អភិវឌ្ឍន៍ជាតិបានបញ្ជាក់ថា៖ «រាល់ការរាយការណ៍របស់ប្រជាពលរដ្ឋ សិស្សានុសិស្ស លោកគ្រូ អ្នកគ្រូទាំងអស់ គឺមិនត្រូវបានបង្ហាញពីអត្តសញ្ញាណរបស់ពួកគេទេ ហើយសំឡេង និងយោបល់ទាំងអស់ នឹងត្រូវយកទៅចងក្រងជារបាយការណ៍ ដើម្បីយកទៅពិភាក្សា និងជំរុញឲ្យមានការចូលរួមដោះស្រាយពីរដ្ឋាភិបាល និងភាគីពាក់ព័ន្ធទាំងអស់ ក្នុងគោលបំណងលើកកម្ពស់គុណភាពអប់រំក្នុងសាលារៀនរបស់រដ្ឋ»។
លោក សន ជ័យ តំណាងសម្ព័ន្ធគណនេយ្យភាពសង្គមអាស៊ីបូព៌ា និងប៉ាស៊ីហ្វីក បានថ្លែងក្នុងពិធីសម្ភោធគម្រោងជួយមើលសាលារៀននោះថា គម្រោងនេះនឹងផ្តល់ឱកាសឲ្យប្រជាពលរដ្ឋ សិស្សានុសិស្ស និងលោកគ្រូ អ្នកគ្រូ បានផ្តល់យោបល់ទៅលើសេវាអប់រំ តាមរយៈការប្រើប្រាស់ប្រព័ន្ធបច្ចេកវិទ្យាមួយ ដើម្បីធ្វើឲ្យគុណភាពអប់រំនៅកម្ពុជាកាន់តែប្រសើរ។ លោក សន ជ័យ បានថ្លែងបន្តទៀតថា៖ «គម្រោងជួយមើលសាលា ជាគម្រោងកំរិតថ្នាក់អន្តរជាតិមួយ ដូចសាលារៀនភាគច្រើននៅប្រទេសហ្វីលីពីនដែរ។ គេមានរហូតដល់ទៅបន្ទប់រៀនមួយ មានបន្ទប់ទឹកមួយ និងមានអាហាររដ្ឋានសម្រាប់សិស្សរបស់គេ។ ទាំងអស់នេះជាក្តីរំពឹងទុករបស់យើង ហើយយើងនឹងអាចកៀងគរប្រជាពលរដ្ឋ សិស្សានុសិស្ស លោកគ្រូ អ្នកគ្រូ រដ្ឋាភិបាល អង្គការសង្គមស៊ីវិល និងវិស័យឯកជន ឲ្យចូលរួមលើកកម្ពស់វិស័យអប់រំនៅកម្ពុជា»។
តាមរយៈការអនុវត្តគម្រោងសាកល្បងក្នុងឆ្នាំ២០១៤ នៅតាមសាលារៀនចំនួន១២នោះ សេចក្តីរាយការណ៍របស់សិស្ស និងគ្រូបង្រៀនបានបង្ហាញថា មានកង្វះខាតបណ្ណាល័យ សៀវភៅសិក្សាគោល បន្ទប់រៀនចាស់ និងបញ្ហាបរិស្ថានផងដែរ។
លោក សេង ឬទ្ធី ក៏បានបង្ហាញពីគម្រោងនៅដើមឆ្នាំ២០១៥ខាងមុខទៀតថា គម្រោងជួយសាលារៀននឹងអនុវត្តន៍ទៅលើសាលានៅរាជធានីភ្នំពេញចំនួន ៦ និងខេត្តកំពង់ចាមចំនួន៦ បន្ថែមទៀត៕
© រក្សាសិទ្ធិដោយ thmeythmey.com