ជាតិ
បទយកការណ៍ / បទសម្ភាសន៍
យុវជនត្រៀមខ្លួនធ្វើអ្វីខ្លះ នៅយប់ថ្ងៃចូលឆ្នាំសកល?
× ភ្នំពេញ៖ មនុស្សជាច្រើនបានត្រៀមខ្លួនជួបជុំជាមួយគ្រួសារមិត្តភក្តិ នៅពេលថ្ងៃឆ្លងឆ្នាំចាស់ផ្លាស់ចូលឆ្នាំថ្មី។ ជាពិសេសក្នុងឱកាសនេះ បានទាញអារម្មណ៍ក្រុមយុវជគ្រប់ស្រទាប់ ឲ្យបង្កើតកម្មវិធីជប់លៀង ដើរកម្សាន្ត ឬជួបជុំជាមួយមិត្តភក្តិរបស់ពួកគេ។ ខ្លះទៀតបានត្រៀមខ្លួន ដើម្បីទន្ទឹងរង់ចាំឆ្លងឆ្នាំជាមួយក្រុមគ្រួសារ ឬមិត្តភក្តិរបស់ពួកគេ។ ហេតុអ្វីបានជាយុវជនភាគច្រើនជួបជុំគ្នាឆ្លងឆ្នាំនៅទីណាខ្លះ?
ថ្ងៃឆ្លងឆ្នាំសកលជិតមកដល់ម្តងៗ វាជាទម្លាប់របស់ កញ្ញា ជា សុជាតាទៅហើយ ដែលតែងតែស្រមៃនឹកឃើញសកម្មភាពឆ្លងឆ្នាំដែលកញ្ញា និងក្រុមគ្រួសារតែងតែប្រារព្ធជាមួយគ្នារៀងរាល់ឆ្នាំនោះ។ ថ្ងៃឆ្លងឆ្នាំ ចូលឆ្នាំ២០១៥នេះ ក៏មិនមែនខុសពីរាល់ឆ្នាំដែរ។ កញ្ញាសម្បុរស ស្រស់ស្អាតរូបនេះ មានគម្រោងទៅឆ្លងឆ្នាំនៅមាត់សមុទ្រ ក្នុងក្រុងកំពង់សោម ជាមួយមិត្តភក្តិដែលជាមិត្តភក្តិជិតស្និទ្ធរៀនជាមួយគ្នានៅវិទ្យាល័យព្រះសីហនុ នៅក្នុងខេត្តកំពង់ចាម។ យុវតីវ័យ ២១ឆ្នាំរូបនេះ បានពន្យលល់ពីមូលហេតុដែលទៅឆ្លងឆ្នាំនៅមាត់សមុទ្រនោះថា៖«នៅមាត់សមុទ្រ ជាកន្លែងដែលពេញនិយមជាពិសេសនៅថ្ងៃឆ្លងឆ្នាំម្តងៗមានយុវជនច្រើនទៅលេងនៅទីនោះ។ ដូច្នេះក្រុមខ្ញុំក៏មានគម្រោងទៅដើរលេងនៅទីនោះផងដែរ ហើយនាំគ្នាដើរលេងនៅផ្សាររាត្រី ញុំាំអាហារជាមួយគ្នា ជជែកគ្នាលេងនៅទីនោះ និងដើរលេងនៅមាត់សមុទ្រ ដើម្បីរង់ចាំរហូតដល់ពេលឆ្លងឆ្នាំចូលមកដល់ និងអបអរសាទរទទួលឆ្នាំថ្មីទាំងអស់គ្នា»។
កញ្ញា សុជាតា បាននិយាយទៀតថា៖«ដើរលេងលើកនេះ ខ្ញុំត្រូវចំណាយអស់ប្រហែលជា ៥០ដុល្លារ ព្រោះទៅកន្លែងឆ្ងាយ ហើយនៅថ្ងៃដែលមានមនុស្សទៅលេងច្រើនគឺអ្វីៗក៏ឡើងថ្លៃដែរ។ ខ្ញុំមិនដឹងថា ផ្ទះសំណាក់ និងម្ហូបអាហារឡើងថ្លៃប៉ុណ្ណានោះទេ»។
និយាយពីយុវតីម្នាក់ទៀត គឺកញ្ញា ឌី ស្រីនាថ ក្នុងឱកាសថ្ងៃឆ្លងឆ្នាំលើកនេះ ស្រីនាថ មានគម្រោងរៀបចំកម្មវិធីឆ្លងឆ្នាំនៅរមណីយដ្ឋានឋានសួគ៌បូកគោនៅខេត្តកំពត ជាមួយនឹងមិត្តភក្តិ ១០នាក់ផ្សេងទៀត ដែលរៀននៅមហាវិទ្យាល័យជាមួយគ្នា ដោយត្រូវចំណាយប្រហែលជា ២០ដុល្លារក្នុងម្នាក់។យុវតីអាយុ១៩ឆ្នាំរូបនេះ បានបង្ហាញពីអារម្មណ៍សប្បាយរីករាយ ពេលដែលស្រមៃនឹកឃើញពីទេសភាពនៅលើភ្នំបូកគោនោះ។ យុវតីមាឌល្អិតរូបនេះបានពន្យល់ពីសកម្មភាពក្នុងថ្ងៃឆ្លងឆ្នាំលើកនេះថា៖«ក្រុមខ្ញុំមានគម្រោងធ្វើម្ហូប និងបង្អែមនៅផ្ទះមិត្តភក្តិដែលនៅក្បែរភ្នំបូកគោ ហើយយកទៅញុំាំនៅលើភ្នំជាមួយគ្នា ព្រោះនៅកន្លែងនោះមានទេសភាពស្អាត ខ្យល់បរិសុទ្ធល្អ និងមានមនុស្សទៅលេងនៅទីនោះច្រើន។ ពេលញុំាំអាហារហើយ នាំគ្នាដើរមើលគេរៀបចំកម្មវិធីនៅទីនោះ ហើយជជែកគ្នាលេង ដើម្បីរង់ចាំឆ្លងឆ្នាំចាស់ និងអបអរទទួលឆ្នាំថ្មីជាមួយមិត្តភក្តិទាំងអស់គ្នា»។
ងាកមកនិយាយពីយុវជន ខ្លូត សុបញ្ញា វិញម្តង។ បញ្ញា ធ្លាប់បានរៀបចំកម្មវិធីឆ្លងឆ្នាំ នៅផ្ទះជីដូន ក្នុងខេត្តកណ្តាល កាលពីឆ្នាំ២០១៣ ជាមួយនឹងមិត្តភក្តិ ៩នាក់ដែលធ្លាប់ធ្វើការស្ម័គ្រចិត្តជាមួយគ្នាកន្លងមក។ យុវជនវ័យ ២៣ឆ្នាំនេះ បានពិភាក្សាគ្នាជាមួយមិត្តភក្តិទាំងនោះ ថានឹងធ្វើកម្មវិធីនេះម្តងទៀតនៅថ្ងៃឆ្លងឆ្នាំលើកនេះ នៅផ្ទះជីដូននោះដដែល ព្រោះនៅពីនោះ វាជាកន្លែងស្ងប់ស្ងាត់ និងមានខ្យល់បរិសុទ្ធសម្រាប់រៀបចំកម្មវិធីដែលបានគ្រោងទុកឲ្យបានកាន់តែល្អជាងលើកមុន។ ការរៀបចំកម្មវិធីតាមរបៀបកូនអ្នកក្រីក្រមកពីជនបទមិនសូវមានប្រាក់កាស ដើម្បីរៀបចំកម្មវិធីធំដុំដូចកូនអ្នកមាននោះ យុវជនរាងស្តើងរូបនេះបានពន្យល់យ៉ាងដូច្នេះថា៖«ក្រុមខ្ញុំនឹងចំណាយត្រឹមតែ ១០០០០-១៥០០០រៀលប៉ុណ្ណោះក្នុងម្នាក់ ដើម្បីធ្វើអាហារសាមគ្គីញុំាំជាមួយគ្នា ហើយធ្វើនៅផ្ទះយាយរបស់ខ្ញុំមានចានឆ្នាំង និងសម្រាប់សម្ភារប្រើប្រាស់ស្រាប់ មិនចាំបាច់ត្រូវចំណាយប្រាក់ច្រើនទេ»។
នារាត្រីនោះដែរ ក្រៅពីញុំាំអាហារ ជជែកពិភាក្សា រាំច្រៀងសប្បាយជាមួយគ្នាហើយនោះ យុវជន សុបញ្ហា បានរៀបរាប់ពីសកម្មភាពបន្តទៀតថា៖«ក្រុមខ្ញុំបានត្រៀមរៀបចំពួតភ្លើងដុតដំឡូង និងអង្គុយជុំវិញពួតភ្លើងនោះ ញុំាំដំឡូងបណ្តើរ និងចែករំលែកពីបទពិសោធន៍ការងារ ចំណេះដឹងថ្មីៗ លើកពីបញ្ហាប្រឈមរបស់គ្នាទៅវិញទៅមកដើម្បីជួយដោះស្រាយគ្នា និងបង្ហាញពីគោលបំណងទៅថ្ងៃអនាគតរបស់គ្នាម្តងម្នាក់ រហូតដល់ពេលឆ្លងចូលឆ្នាំថ្មី»។
ផ្ទុយពីយុវជនខាងលើដែលមានគម្រោងដើរកម្សាន្ត ឬជួបជុំជាមួយមិត្តភក្តិក្នុងឱកាសឆ្លងឆ្នាំនាពេលខាងមុខនេះ យុវជន នូ មករា បានសម្រេចចិត្តដកខ្លួនចេញពីមិត្តភក្តិក្នុងកម្មវិធីឆ្លងឆ្នាំលើកនេះ ដោយយកឱកាសឈប់សម្រាកនៅថ្ងៃចូលឆ្នាំសកលនេះ ដើម្បីរម្លឹកពីសកម្មភាពដែល យុវជរូបនេះបានអនុវត្តន៍ ក្នុងរយៈពេលមួយឆ្នាំកន្លងមកនេះ។ បើទោះជាមានការសោកស្តាយដែលមិនបានចូលរួមឆ្លងឆ្នាំជាមួយមិត្តភក្តិក៏ដោយ ដោយយុវជនសម្បុរស្រអែមរូបនេះបានពន្យល់ថា៖«ខ្ញុំគិតថាខ្ញុំត្រូវយកឱកាសនេះសម្រាប់ខ្លួនឯងវិញម្តង។ ខ្ញុំនឹងរកកន្លែងដែលមានទេសភាពល្អ ខ្យល់បរិសុទ្ធ ដើម្បីអង្គុយឆ្លុះបញ្ចាំងពីការងារ ការសិក្សា បញ្ហាប្រឈមក្នុងជីវិត និងឆ្លុះបញ្ចាំងពីសកម្មភាពប្រចាំថ្ងៃ ហើយក៏រំលឹកពីគោលដៅដែលបានកំណត់កន្លងមក ដើម្បីអនុវត្តន៍សកម្មភាពបន្តទៀតដែរ»៕
© រក្សាសិទ្ធិដោយ thmeythmey.com