សង្គមអន្តរជាតិ
អន្តរជាតិ
ទីក្រុងញូវយ៉ក មានចំនួនមហាសេដ្ឋីច្រើនជាងគេបំផុតនៅក្នុងពិភពលោក
×
ទីក្រុងញូវយ៉ក របស់សហរដ្ឋអាមេរិកបានក្លាយជាទីក្រុងដែលមានចំនួនមហាសេដ្ឋីច្រើនជាងគេបំផុតនៅក្នុងពិភពលោក ជាមួយនឹងមហាសេដ្ឋីសរុបចំនួន ១០៣ នាក់។ នេះបើតាមរបាការណ៍ស្រាវជ្រាវមួយរបស់មជ្ឈមណ្ឌលសិក្សាទ្រព្យសម្បត្តិ Wealth-X និងជំរឿន UBS Billionaire Census 2014 ។
របាយការណ៍ដដែលក៏បានឲ្យដឹងថា ទីក្រុងម៉ូស្គូស្ថិតនៅចំណាត់ថ្នាក់ទី ២ ដែលមានមហាសេដ្ឋី ៨៥ នាក់តាមពីក្រោយដោយទីក្រុងហុងកុង (៨២ នាក់)ទីក្រុងឡុងដ៍(៧២ នាក់) និងទីក្រុងប៉េកាំង(៣៧ នាក់) ។ទិន្នន័យដដែលបានបង្ហាញថា នៅទូទាំងពិភពលោកចំនួនមហាសេដ្ឋីបានកើនឡើងដល់២៣២៥ នាក់ជាមួយនឹងការកើនឡើងមហាសេដ្ឋីថ្មីចំនួន ១៥៥ នាក់បន្ថែមទៀតថានៅឆ្នាំនេះ។
ការបូកបញ្ចូលគ្នានៃទ្រព្យសម្បត្តិរបស់មហាសេដ្ឋីនៅលើពិភពលោកបានកើនឡើងដល់ ៧,៣លានលានដុល្លារ។ ការសិក្សានេះបានបង្ហាញថាទ្វីបអឺរ៉ុបជាតំបន់មានមហាសេដ្ឋីច្រើនជាងគេចំនួន ៧៧៥ នាក់ជាមួយនឹងទ្រព្យសម្បត្តិសរុប ២,៣៧លានលានដុល្លារ។ខណៈពេលដែលទ្វីបអាមេរិកខាងជើងដែលមានមហាសេដ្ឋីច្រើនបំផុតកាលពីក្នុងឆ្នាំ ២០១៣ នោះបានធ្លាក់ទៅនៅចំណាត់ថ្នាក់ទី២ វិញ។
សហរដ្ឋអាមេរិកបានរក្សាតំណែងរបស់ខ្លួនជាប្រទេសដែលមានមហាសេដ្ឋីកំពូលរបស់ពិភពលោកដែលមានប្រជាជនចំនួន ៥៧១ នាក់ជាមហាសេដ្ឋីនៅឆ្នាំ ២០១៤ នេះ តាមពីក្រោយដោយប្រទេសចិន មានមហាសេដ្ឋី ១៩០ នាក់ខណៈពេលដែលមហាសេដ្ឋីនៅចក្រភពអង់គ្លេស កើនឡើងដល់ ១៣០ នាក់ធ្វើឲ្យអង់គ្លេសដណ្ដើមយកតំណែងចំណាត់ទី៣ ពីប្រទេសអាឡឺម៉ង់ដែលមានមហាសេដ្ឋីតែចំនួន ១២៣ នាក់នោះ៕
© រក្សាសិទ្ធិដោយ thmeythmey.com