ជាតិ
បទយកការណ៍ / បទសម្ភាសន៍
×![]()
ភ្នំពេញ៖ លោកបណ្ឌិតសេដ្ឋកិច្ច កង ច័ន្ទតារារ័ត្ន បានអត្ថាធិប្បាយថា ស្ថានភាពសេដ្ឋកិច្ចទូទៅនៅឆ្នាំ២០១៥ នឹងមានលក្ខណៈល្អប្រសើរជាងឆ្នាំ២០១៤កន្លងមក។ មូលហេតុ គឺដោយសារឆ្នាំចាស់ ប្រទេសកម្ពុជាបានជួបប្រទះវិបត្តិនយោបាយ។ វិបត្តិនេះបានអូសបន្លាយស្ទើរពាក់កណ្តាលឆ្នាំ២០១៤ទៅហើយ។ ឆ្នាំថ្មីគឺជាឱកាសថ្មីសម្រាប់កម្ពុជា ប៉ុន្តែចាប់ពីឆ្នាំ២០១៧ និង២០១៨ ស្ថានភាពនយោបាយអាចបង្អាក់ដំណើរការសេដ្ឋកិច្ចឡើងវិញ ប្រសិនបើអ្វីៗមិនបានដោះស្រាយអស់នៅពេលនេះ។ ខាងក្រោមនេះជាបទសម្ភាសន៍ខ្លីរវាងលោក គី សុខលីម អគ្គនាយកសារព័ត៌មានអេឡិចត្រូនិកថ្មីៗ និងលោក កង ច័ន្ទតារារ័ត្ន សេដ្ឋវិទូឯករាជ្យនៅក្នុងប្រទេសកម្ពុជា។
លោក គី សុខលីម៖ តើស្ថានភាពសេដ្ឋកិច្ចនៅឆ្នាំ២០១៥ នឹងខុសពីឆ្នាំ២០១៤យ៉ាងដូចម្តេចដែរ?
លោក កង ច័ន្ទតារារ័ត្ន៖ នៅឆ្នាំ២០១៥ខាងមុខនេះ ខ្ញុំមិនឃើញមានសញ្ញាអាក្រក់ណាមួយសម្រាប់សេដ្ឋកិច្ចកម្ពុជានោះទេ។ ផ្ទុយទៅវិញ ខ្ញុំគិតថា អ្វីៗវានិងប្រសើរល្អជាងឆ្នាំ២០១៤កន្លងមក។ ឆ្នាំ២០១៤កន្លងមក ដោយសារបញ្ហានយោបាយកម្ពុជា និងបញ្ហានយោបាយថៃ កើតឡើងព្រមពេលជាមួយគ្នា ដូច្នេះស្ថានការសេដ្ឋកិច្ចរបស់កម្ពុជាជួបការលំបាកច្រើន។ តែឆ្នាំ២០១៥នេះ ស្ថានភាពនឹងប្រសើរជាងមុន ពីព្រោះស្ថានភាពនយោបាយនឹងមានស្ថិរភាពល្អប្រសើរជាងមុនទាំងនៅកម្ពុជា និងថៃ ។ ទីផ្សារអង្ករអាចប្រសើរជាងមុនដោយសារមានការវិនិយោគក្នុងវិស័យកសិកម្មកាន់តែច្រើន។ ចំនួនភ្ញៀវទេសចរនឹងអាចកើនឡើងច្រើនជាងមុន។ ការវិនិយោគនឹងអាចកើនឡើងដោយសារការបង្កើតទីផ្សារអាស៊ានរួមនៅឆ្នាំ២០១៥ ។ ហេដ្ឋារចនាសម្ព័ន្ធ ដូចជា ផ្លូវ ស្ពាន ធារាសាស្ត្រ នឹងផ្តល់ផលជាវិជ្ជមានមួយចំនួននៅក្នុងខាងមុខ។
លោក គី សុខលីម៖ ឆ្នាំ២០១៥ គឺជាពេលវេលាបង្កើតទីផ្សារអាស៊ានរួម។ អ៊ីចឹងវាមិនមែនជាការប្រឈមរបស់កម្ពុជាទេឬ?
លោក កង ច័ន្ទតារារ័ត្ន៖ នៅពេលដែលយើងបង្កើតទីផ្សារអាស៊ានរួម មានន័យថា អ្នកវិនិយោគអាចនឹងមើលមកកម្ពុជាក្នុងន័យទីផ្សារនៃប្រទេសអាស៊ានដែលជាទីផ្សាររួមគ្នា។ ដូច្នេះ អ្នកវិនិយោគបរទេសអាចនឹងបណ្តាក់ទុនច្រើនក្នុងប្រទេសកម្ពុជាក្នុងក្របខ័ណ្ឌទីអាស៊ានរួម ជាជាងសម្លឹងមើលកម្ពុជាក្នុងនាមជាទីផ្សារទោលតែឯង។ បង្កើតទីផ្សារអាស៊ានរួមគ្នានេះអាចអនុញ្ញាតអោយប្រទេសអភិវឌ្ឍន៍របស់អាស៊ានមួយចំនួនទទួលបានផលចំណេញភ្លាមៗពីការធ្វើសមាហរណកម្មសេដ្ឋកិច្ច។ ប៉ុន្តែកម្ពុជាត្រូវការពេលវេលាពី២ ទៅ៣ឆ្នាំដើម្បីបង្កើនប្រសិទ្ធភាពគ្រប់យ៉ាង មុននឹងទទួលបានផលប្រយោជន៍ច្រើនដូចប្រទេសដទៃទៀត។
លោក គី សុខលីម៖ លោកមានប្រសាសន៍ខាងដើមថា ស្ថានភាពសេដ្ឋកិច្ចអាចប្រសើរនៅឆ្នាំ២០១៥ដោយសារបរិយាកាសនយោបាយល្អ។ ចុះឆ្នាំ២០១៦ ឬ២០១៧វិញ វាយ៉ាងដូចម្តេចដែរ?
លោក កង ច័ន្ទតារារ័ត្ន៖ ពីឆ្នាំ២០១៥ ឬ២០១៦ ស្ថានភាពវិនិយោគ និងស្ថានភាពសេដ្ឋកិច្ចទូទៅវានឹងប្រសើរដូចអ្វីដែលខ្ញុំបានលើកឡើងខាងដើមអ៊ីចឹង។ តែនៅឆ្នាំ២០១៧វិញ វាជាពេលវេលាដែលកម្ពុជាត្រូវបោះឆ្នោតឃុំសង្កាត់ ហើយនៅឆ្នាំ២០១៨ វាជាពេលវេលាការបោះឆ្នោតជាតិ។ ដូច្នេះ ស្ថានភាពនយោបាយអាចរំខានបរិយាកាសវិនិយោគខ្លះដែរ។
លោក គី សុខលីម៖ អ្វីដែលលោកបានលើកឡើងខាងលើ ពិតជាមានន័យថា ស្ថានភាពសេដ្ឋកិច្ចកម្ពុជាទៅថ្ងៃខាងមុខអាចប្រសើរជាងមុន។ តែចលនាចំណាកស្រុកពីខេត្តចូលក្រុង ពីប្រទេសកម្ពុជា ទៅក្រៅប្រទេសនៅតែកើនឡើងជាលំដាប់ តើនេះជាបញ្ហាដែរឬទេ?
លោក កង ច័ន្ទតារារ័ត្ន៖ សម្រាប់អ្នកសេដ្ឋកិច្ច ចលនាចំណាកស្រុក មិនមែនជាបញ្ហាទេ ពីព្រោះចលនាចំណាកស្រុក មានន័យថា ពួកគេគេចចេញពីកន្លែងមួយដែលមានប្រាក់ចំណូលតិចដើម្បីស្វែងរកទីកន្លែងដែលមានប្រាក់ចំណូលខ្ពស់។ ដូច្នេះ វាជារឿងល្អ។ តែសម្រាប់អ្នកវិភាគសង្គមវិញ ពួកគេអាចវិភាគថា វាអាក្រក់ទៅវិញក៏ថាបាន ពីព្រោះ វាអាចមានបញ្ហាសង្គមផ្សេងៗកើតឡើងដែរ៕
© រក្សាសិទ្ធិដោយ thmeythmey.com
«នាំអាត» និង«នាំអាទិ៍»មួយណាត្រឹមត្រូវ?
1 សប្តាហ៍
