ជាតិ
លោក ហោ ណាំហុង ស្នើឲ្យអភិបាលក្រុងណូវែលសង់ស្ដុបរចនាបថខ្មែរតំណាងឲ្យកម្ពុជា
× លោក ហោ ណាំហុង រដ្ឋមន្ត្រីការបរទេសនិងកិច្ចសហប្រតិបត្តិការអន្តរជាតិ ស្នើឲ្យអភិបាលក្រុងឡូវែល រដ្ឋម៉ាស្សាឈូសេត សហរដ្ឋអាមេរិក លោក រ៉ូដនី អិម អ៊ីលៀត(Rodney M. ELLIOTT) ជួយរៀបចំសង់ស្ដូបបែបរចនាបថខ្មែរមួយ ដើម្បីតំណាងឲ្យប្រជាពលរដ្ឋខ្មែររស់នៅទីនោះ ។ ការស្នើសុំនេះគឺធ្វើឡើងនៅក្នុងជំនួបពិភាក្សាគ្នារវាង លោក ហោ ណាំហុង និងលោក រ៉ូដនី អិម អ៊ីលៀត អភិបាលក្រុងឡូវែល របស់អាមេរិក នៅព្រឹកថ្ងៃទី១៤មករានេះ នៅក្រសួងការបរទេសកម្ពុជា។
ក្នុងជំនួបនោះ លោកប្រមុខការទូតកម្ពុជា បានបញ្ជាក់ដូច្នេះថា ៖«យើងបានពិភាក្សាគ្នាទាក់ទងនឹងប្រជាពលរដ្ឋខ្មែររស់នៅទីនោះ ដើម្បីបង្ហាញប្រាប់អភិបាលក្រុងណូវែល។ ហើយយើងក៏បានស្នើឲ្យអភិបាលក្រុងណូវែល សង់ស្ដុបមួយតាមរចនាបថខ្មែរ សម្រាប់ពលរដ្ឋខ្មែរនៅទីនោះ ដើម្បីតំណាងឲ្យស្រុកខ្មែរ»។ ជាមួយលោក ហោ ណាំហុង ក៏បានស្នើឲ្យលោក រ៉ូដនី អិម អ៊ីលៀត ជួយថែរក្សាយកចិត្តទុកដាក់ ចំពោះប្រជាពលរដ្ឋខ្មែរជាង៤ម៉ឺននាក់ ដែលរស់នៅក្នុងទីក្រុងណូវែលផងដែរ។
ក្រៅពីជំនួបពិភាក្សាជាមួយរដ្ឋមន្ត្រីក្រសួងការបរទេស អភិបាលក្រុងណូវែល លោក រ៉ូដនី អិម អ៊ីលៀត នឹងមានជំនួបដាច់ដោយឡែកជាមួយរដ្ឋមន្ត្រីមួយចំនួនទៀត ដោយមានការចុះហត្ថលេខាលើអនុស្សារណៈ នៃការយោគយល់គ្នាស្ដីពីការបង្កើតចំណងមេត្រីភាពរវាងរាជធានីភ្នំពេញ និងក្រុងណូវែលផងដែរ៕
© រក្សាសិទ្ធិដោយ thmeythmey.com