ជាតិ
សង្គមជាតិ
×![]()
សៀមរាប៖ បន្ទាប់ពីមានការរិះគន់ ជុំវិញបញ្ហាអនាម័យខេត្តសៀមរាបរួចមក ថ្នាក់ដឹកនាំ បានចាត់វិធានការ និងពង្រឹងបញ្ហាអនាម័យនេះជាថ្មី ដោយក្នុងនោះ ក្រុមសម្អាតអនាម័យថ្មីមួយទៀត ត្រូវបានបង្កើតឡើង ក្នុងគោលបំណង ប្រែក្លាយខេត្តសៀមរាប មិនត្រឹមតែជាខេត្តទេសចរណ៍លេខមួយនោះទេ ថែមទៀតទាំងឲ្យមានឈ្មោះជាខេត្ត ដែលមានបរិស្ថានក៏ស្រស់ស្អាតផងដែរ។
ក្រុមអនាម័យថ្មីដែលមានគ្នាចំនួន៩០នាក់ ត្រូវបានបង្កើតឡើងដោយសាលាក្រុងសៀមរាប ដើម្បីជួយការងារសម្អាតបរិស្ថានក្នុងក្រុងទាំងមូល។ ក្រុមថ្មីនេះ នឹងជំរុញឲ្យខេត្តសៀមរាប ឈានដល់ការទទួលបានរំដួល៣ទង ជាទីក្រុងស្អាត ខណៈដែលឆ្នាំមុន សៀមរាប ទទួលបានតែ២ទងតែប៉ុណ្ណោះ។
អភិបាលខេត្តសៀមរាប ក្នុងឱកាសដឹកនាំក្រុមសម្អាតថ្មីកាលពីថ្ងៃម្សិលមិញ បានឲ្យដឹងថា ក្រុមសម្អាតថ្មីនេះ គ្រប់គ្រងផ្ទាល់ដោយអាជ្ញាធរក្រុងសៀមរាប ក្នុងគោលដៅប្រែក្លាយក្រុងសៀមរាប ឲ្យមានសោភ័ណ្ឌភាពស្អាតលើសគេ ដើម្បីឲ្យសក្តិសមនឹងការចង់បានរបស់រដ្ឋាភិបាល ក៏ដូចជាភ្ញៀវទេសចរផង។ លោក ឃឹម ប៊ុនសុង បន្ថែមថា កន្លងមកដោយសារខេត្តសៀមរាប មិនទាន់មានប្រព័ន្ធផ្លូវថ្នល់កៅស៊ូទាំងអស់ ទើបធ្វើឲ្យការងារសម្អាតរបស់បុគ្គលិកក្រុមហ៊ុនឯកជន មិនអាចរត់ទាន់បាន។ លោក ឃឹម ប៊ុនសុង រំពឹងថា ក្រុមការងារថ្មី ដែលមានគ្នា៩០នាក់ បូកនឹងបុគ្គលិកក្រុមហ៊ុនឯកជនចំនួន៦៥នាក់ទៀត ពួកគេនឹងរួមគ្នា សម្អាតទីក្រុងសៀមរាប ឲ្យមានភាពស្រស់បំព្រងជាក់ជាមិនខាន។
គួររំលឹកផងដែរ កាលពីពេលថ្មីៗនេះ ក្នុងគោលបំណងបង្កើនការងារសម្អាតបរិស្ថាន ក្រសួងបរិស្ថានបានផ្តល់ថវិកាចំនួន៥លានដុល្លារសហរដ្ឋអាមេរិក ទៅដល់បណ្តាខេត្តក្រុងរាជធានី សំដៅធ្វើយ៉ាងណាឲ្យការងារសម្អាតបរិស្ថានមានប្រសិទ្ធិភាព និងដើម្បីប្រកួតប្រជែងទីក្រុងស្អាតប្រចាំតំបន់មួយៗផងដែរ៕
© រក្សាសិទ្ធិដោយ thmeythmey.com
