ជាតិ
សង្គមជាតិ
មិនមានអ្នកតំណាងរាស្ត្រផ្តល់ឈាមនៅក្នុងព្រឹត្តិការណ៍បរិច្ចាគឈាមនៅរដ្ឋសភាឡើយ
× អគ្គលេខាធិការដ្ឋានរដ្ឋសភា និងមជ្ឈមណ្ឌលជាតិផ្តល់ឈាម (NBTC) បានរៀបចំកម្មវិធីបរិច្ចាគឈាមដោយស្ម័គ្រចិត្តក្រោមប្រធានបទ«បរិច្ចាគឈាមដើម្បីមាតាជាអ្នកផ្តល់ កំណើត» នៅវិមានរដ្ឋសភានៅថ្ងៃទី២២មករា។ ក្រុមការងារនៃមជ្ឈមណ្ឌលជាតិផ្តល់ឈាមមិនបានទទួលឈាមមួយប្លោកពីអ្នកតំណាងរាស្ត្រឡើយ។ មានតែមន្ត្រីនៃអគ្គលេខា ធិការដ្ឋានរដ្ឋសភា៨៧នាក់ប៉ុណ្ណោះដែលបានផ្តល់ឈាម។
នៅក្នុងព្រឹត្តិការណ៍បរិច្ចាគឈាមនៅរដ្ឋសភានៅថ្ងៃទី២២មករា មានតែលោក ឈាង វុន មួយរូបប៉ុណ្ណោះ ដែលជាអ្នកតំណាងរាស្ត្រ ដែលបានមកចុះឈ្មោះដើម្បីផ្តល់ឈាម។ ប៉ុន្តែអ្នកតំណាងរាស្ត្ររូបនេះ ត្រូវបានបដិសេធដោយក្រុមការងារមជ្ឈមណ្ឌលជាតិផ្តល់ឈាម ដោយសារតែលោកបានលើសអាយុកំណត់ដែលអាចផ្តល់ឈាមបាន។ មជ្ឈមណ្ឌលជាតិផ្តល់ឈាមបានកំណត់ទទួលយកការផ្តល់ឈាមពីប្រជាជនដែលមានអាយុពី១៨ឆ្នាំដល់៦០ឆ្នាំប៉ុណ្ណោះ។
បើទោះមិនបានទទួលអំណោយឈាមរបស់អ្នកតំណាងរាស្ត្រក៏ដោយ ប៉ុន្តែមជ្ឈមណ្ឌលក៏បានទទួលអំណោយឈាម៨៧ប្លោកពីមន្ត្រីនៃអគ្គលេខាធិការដ្ឋានរដ្ឋសភាដែរ ហើយវាក៏ជាសញ្ញាល្អ និងជារូបភាពវិជ្ជមានមួយដែលសកម្មភាពផ្តល់ឈាមបានកើតឡើងនៅក្នុងស្ថាប័នកំពូលមួយរបស់រដ្ឋ។ នេះបើការពន្យល់របស់កញ្ញា អ៊ូ បាណុង មន្ត្រីទំនាក់ទំនងសាធារណៈនៃមជ្ឈមណ្ឌលជាតិផ្តល់ឈាម។ មន្ត្រីដដែលបានបញ្ជាក់ប្រាប់សារព័ត៌ថ្មីៗ យ៉ាងដូច្នេះថា៖«យើងមិនមានអ្វីត្រូវនិយាយអំពីការសោកស្តាយ ដោយសារតែយើងមិនបានទទួលការផ្តល់ឈាមពីអ្នកតំណាងរាស្ត្រនោះទេ។ កន្លងមក យើងក៏ទទួលបានការផ្តល់ឈាមជាប្រចាំពីឯកឧត្តម ហ៊ុន ម៉ានី ដែរ។ ប៉ុន្តែអ្វីដែលសំខាន់នៅពេលនេះ គឺរូបភាពនៃការផ្តល់ឈាមដែលត្រូវរៀបចំធ្វើនៅរដ្ឋសភា។ យើងទទួលបានការចុះឈ្មោះច្រើនពីមន្ត្រីរដ្ឋសភា ប៉ុន្តែដោយសារអ្នកខ្លះត្រូវបានបដិសេធពីក្រុមសម្ភាសន៍ ដោយសារតែបញ្ហាសុខភាពរបស់ពួកគេ ទើបយើងទទួលបាន៨៧ប្លោក»។ កញ្ញា អ៊ូ បាណុង សង្ឃឹមថា មជ្ឈមណ្ឌលជាតិផ្តល់ឈាមនឹងទទួលបានអំណោយឈាមកាន់តែច្រើនពីស្ថាប័នរដ្ឋសភានាឱកាសក្រោយទៀត។
ជាមួយគ្នានោះ កញ្ញា អ៊ូ បាណុង ក៏បានលើកទឹកចិត្ត ទៅដល់ប្រជាពលរដ្ឋបុគ្គលិកដែលធ្វើការនៅស្ថាប័នឯកជន ក៏ដូចជាមន្ត្រីរាជការ ពិសេសយុវជន ចូលរួម បរិច្ចាគឈាមឲ្យបានច្រើន ដើម្បីជួយ អ្នកជំងឺដែលត្រូវការឈាមសង្គ្រោះជីវិតជាបន្ទាន់។ មន្ត្រីទំនាក់ទំនងសាធារណៈរូបនេះ បានសង្កត់ធ្ងន់ថា៖«ឈាមមួយដំណក់ របស់លោកអ្នក ស្មើនឹងការផ្តល់ស្នាមញញឹម ក្តីសង្ឃឹម និងសុភមង្គលទៅដល់គ្រួសារមួយ ឬប្រទេសជាតិមួយ»។
នៅឆ្នាំ២០១៥នេះ មជ្ឈមណ្ឌលជាតិផ្តល់ឈាមគ្រោងប្រមូលឈាមដែលជាការបរិច្ចាគដោយស្ម័គ្រចិត្តពីសប្បុរសជន ឲ្យបានច្រើនជាង៥០ភាគរយ នៃឈាមដែលប្រមូលបានសរុប ដើម្បីផ្គត់ផ្គង់តម្រូវការឈាមនៅក្នុងប្រទេស។ ដើម្បីឱ្យការប្រមូលឈាមបានតាមផែនការគ្រោងទុក មជ្ឈមណ្ឌលជាតិផ្តល់ឈាម នឹងបង្កើនយុទ្ធនាការអប់រំផ្សព្វផ្សាយ នៅតាមសាកលវិទ្យាល័យ អង្គការ និងនៅតាមមូលដ្ឋាន ដោយជំរុញយុវជនឱ្យមកបរិច្ចាគឈាមដោយស្ម័គ្រចិត្តជាទៀងទាត់ និងច្រើនដង។
នៅក្នុងឆ្នាំ២០១៤កន្លងទៅ NBTC ទទួលឈាមបរិច្ចាគសរុបចំនួន ៥២៨៦៧ប្លោក នៅទូទាំងប្រទេស ក្នុងនោះឈាមដែលបរិច្ចាគតាមការស្ម័គ្រចិត្តមានចំនួន ១៧៧៩០ប្លោក ស្មើនឹង៣៤ភាគរយ នៃឈាមដែល NBTC ទទួលបាន។ ដោយឡែកនៅទីក្រុងភ្នំពេញ NBTC ប្រមូលបានឈាមបរិច្ចាគសរុបចំនួន ៣២,៦៤៨ប្លោក ក្នុងនោះឈាមដែលបរិច្ចាគតាមការស្ម័គ្រចិត្តមានចំនួន ១២៣៤៦ប្លោក ស្នើនឹង៣៨ភាគរយ នៃឈាមដែលបរិច្ចាគសរុប៕
© រក្សាសិទ្ធិដោយ thmeythmey.com