ជាតិ
នយោបាយជាតិ
មេដឹកនាំកំពូលបក្សទាំងពីរជួបគ្នាវិញនៅថ្ងៃស្អែកបន្ទាប់ពីលោក ហ៊ុន សែន មកដល់កម្ពុជា
× ក្រោយពីប្រកាសលើកពេលក្នុងជំនួបដែលគ្រោងធ្វើកាលពីថ្ងៃទី ២៧ ម្សិលមិញ នៅថ្ងៃនេះ ប្រមុខដឹកនាំតំណាងរាស្ត្រនៃគណបក្សប្រជាជនកម្ពុជា និងគណបក្សសង្គ្រោះជាតិ បានសម្រេចជួបគ្នាវិញនៅព្រឹកថ្ងៃព្រហស្បតិ៍ទី ២៩ ខែមករា ឆ្នាំ ២០១៥ ស្អែកនេះ ។ គម្រោងជួបគ្នានេះ បានធ្វើឡើងស្រពេលដែលលោកនាយករដ្ឋមន្ត្រី ហ៊ុន សែន បានត្រឡប់មកពីក្រៅប្រទេសវិញ។
គ្រាន់តែលោកនាយករដ្ឋមន្ត្រី ហ៊ុន សែន មកដល់ប្រទេសកម្ពុជាភ្លាម មន្ត្រីកំពូលៗនៃតំណាងរាស្ត្រគណបក្សប្រជាជនកម្ពុជា និងគណបក្សសង្គ្រោះជាតិ បានណាត់ជួបគ្នាជាលើដំបូងឡើងវិញនៅព្រឹកថ្ងៃព្រហស្បតិ៍ស្អែកនេះ នាវិមានរដ្ឋសភា ក្រោយពីពួកគេសម្រេចលុបចោលគម្រោងជួបគ្នាកាលពីថ្ងៃទី ២៧ ខែមករា កន្លងទៅ។ ការលុបចោលជំនួបនៅថ្ងៃទី ២៧ ខែមករា កន្លងទៅនោះ ត្រូវអ្នកតាមដានស្ថានការណ៍នយោបាយលើកឡើងថា អាចបណ្តាលមកពីលោកនាយករដ្ឋមន្ត្រី ហ៊ុន សែន មិនមានវត្តមាននៅក្នុងប្រទេស ដែលជាការលំបាកដល់ការធ្វើសេចក្តីសម្រេចចិត្តមួយរបស់តំណាងមេដឹកនាំខាងគណបក្សប្រជាជនកម្ពុជា។
បើផ្អែកតាមសេចក្តីប្រកាសព័ត៌មានរបស់រដ្ឋសភានៅថ្ងៃនេះ ជំនួបនៅថ្ងៃស្អែកនេះ ខាងតំណាងរាស្ត្រគណបក្សប្រជាជនកម្ពុជា មានលោក ស ខេង ជាប្រធាន អនុប្រធានពីររូប គឺ លោក គាត ឈន់ លោកស្រី ម៉ែន សំអន ។ ចំណែកខាងគណបក្សសង្គ្រោះជាតិវិញ លោក សម រង្ស៊ី ជាប្រធាន លោក កឹម សុខា ជាអនុប្រធាន និងលោក យឹម សុវណ្ណ ជាលេខាធិការ ។
យ៉ាងណាក៏ដោយជំនួបរបស់ថ្នាក់ដឹកនាំជាន់ខ្ពស់បក្សទាំងពីរស្អែកនេះ គេនៅមិនទាន់ដឹងពីប្រធានបទដែលត្រូវពិភាក្សាគ្នាឲ្យច្បាស់នោះឡើយ។ លោក យឹម សុវណ្ណ តំណាងរាស្ត្របក្សប្រឆាំង ដែលនឹងមានវត្តមាននៅក្នុងកិច្ចប្រជុំនៅថ្ងៃស្អែកនេះផងនោះ មិនអាចទាក់ទងសុំការអត្ថាធិប្បាយបានទេ នៅថ្ងៃនេះ។
សូមបញ្ជាក់ថា ជំនួបរបស់មេដឹកនាំតំណាងរាស្ត្របក្សទាំងពីរនៅថ្ងៃស្អែកនេះ ធ្វើឡើងក្រោយពីប្រធានរដ្ឋសភា លោក ហេង សំរិន បានប្រកាសទទួលស្គាល់លោក ស ខេង ជាប្រធានតំណាងរាស្ត្រគណបក្សប្រជាជនកម្ពុជា និងលោក សម រង្ស៊ី ជាប្រធានតំណាងរាស្ត្រគណបក្សសង្គ្រោះជាតិ និងជាប្រធានក្រុមមតិភាគតិចក្នុងរដ្ឋសភា កាលពីថ្ងៃទី ២០ ខែមករា កន្លងទៅ៕ © រក្សាសិទ្ធិដោយ thmeythmey.com