ជាតិ
សេដ្ឋកិច្ច
លោក ហ៊ុន សែន ស្នើរថយន្តឈ្នួលបញ្ចុះថ្លៃសេវា ស្របនឹងតម្លៃប្រេងធ្លាក់ចុះ
× ប្រមុខរាជរដ្ឋាភិបាលកម្ពុជា លោក ហ៊ុន សែន បានអំពាវនាវដល់ម្ចាស់រថយន្តឈ្នួលដឹកអ្នកដំណើរទាំងអស់ បញ្ចុះថ្លៃសេវាកម្ម ស្របនឹងការធ្លាក់ចុះតម្លៃប្រេងសាំង។ លោកនាយក រដ្ឋមន្ត្រីបានអំពាវនាវរបស់យ៉ាងដូច្នេះ នៅក្នុងពិធីចែកសញ្ញាបត្រដល់និស្សិតជាង ៤ពាន់នាក់ នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នៅក្នុងមជ្ឈមណ្ឌលកោះពេជ្រ។
នៅចំពោះមុខនិស្សិតដែលទើបបញ្ចប់ការសិក្សា និងមន្ត្រីរដ្ឋាភិបាលជាច្រើនរូប លោកនាយករដ្ឋមន្ត្រីបានលើកជាចំងល់ចំពោះម្ចាស់រថយន្តឈ្នួលដែលមិនព្រមទម្លាក់ថ្លៃឈ្នួល បើទោះជាតម្លៃប្រេងបានធ្លាក់ចុះជាទូទៅហើយក៏ដោយ។
កាលពីថ្ងៃទី៣០ ខែមករា កន្លងមកនេះ ក្រសួងសាធារណការ និងដឹកជញ្ជូន ក៏បានចេញលិខិតអំពាវនាវឲ្យបញ្ចុះតម្លៃសំបុត្ររថយន្តដឹកអ្នកដំណើរផងដែរ។ សេចក្តីអំពាវនាវស្តីពីការបញ្ចុះតម្លៃសំបុត្រជិះរថយន្តដឹកជញ្ជូនអ្នកដំណើរនោះ បានផ្សាយថាមួយរយៈកន្លងមកនេះ អគ្គនាយកដ្ឋានដឹកជញ្ជូនសង្កេតឃើញថា តម្លៃប្រេងឥន្ធនៈនៅទីផ្សារអន្តរជាតិបានធ្លាក់ចុះទាប មូលហេតុនេះប្រេងឥន្ធនៈនៅប្រទេសកម្ពុជាក៏បានធ្លាក់ចុះទាបជាងមុនដែរ ចាប់ពីមុន ៥២០០រៀល មកនៅត្រឹម ៣៦០០រៀលក្នុងមួយលីត្រ។
ក្នុងសំណុំរឿងតម្លៃប្រេងនេះដដែល ប្រមុខរដ្ឋាភិបាលក៏បានអំពាវនាវឲ្យមានការទម្លាក់តម្លៃប្រេងបន្ថែមទៀតដែរ។ ទន្ទឹមគ្នានេះលោកក៏បានណែនាំឲ្យក្រសួងសេដ្ឋកិច្ច និងហិរញ្ញវត្ថុបង្កើតកញ្ចប់មួយសម្រាប់ទិញប្រេងសាំង ស្តុកទុក សម្រាប់ផ្គត់ផ្គង់ ការងាររដ្ឋទូទាំងប្រទេស៕
© រក្សាសិទ្ធិដោយ thmeythmey.com