ជាតិ
បទសម្ភាសន៍
សង្គមជាតិ
ជាង៣០០នាក់ បានចុះឈ្មោះចូលរួម«សន្និបាតបញ្ញវន្តពិភពលោក» របស់ idp លោក ម៉ៅ ស្រេង នាយកស្ថាប័ន idp Education ប្រចាំប្រទេសកម្ពុជា
× មនុស្សជាង៣០០នាក់ចម្រុះជាតិសាសន៍ និងមកពីវិស័យផ្សេងៗ បានចុះឈ្មោះចូលរួមក្នុង«សន្និបាតបញ្ញវន្តពិភពលោក»លើកទីមួយ ដើម្បីស្តាប់បទអន្តរាគមន៍លើវិស័យជំនាញនានារបស់វាគ្មិនចម្រុះជាតិសាសន៍ និងមន្ត្រីរដ្ឋាភិបាលដែលបានបញ្ចប់ការសិក្សាមកពីបរទេស។ លោក ម៉ៅ ស្រេង ប្រធានស្ថាប័ន idp Education ប្រចាំប្រទេសកម្ពុជា ដែលជាអ្នករៀបចំកម្មវិធីអន្តរជាតិនេះ បានផ្តល់សម្ភាសន៍ដល់លោក លាង ដឺលុច និពន្ធនាយកសារព័ត៌មានថ្មីៗ ដើម្បីនិយាយអំពីសារៈប្រយោជន៍នៃសន្និបាតនេះ។
សូមស្តាប់បទសម្ភាសន៍ជាសំឡេង
លោក លាង ដឺលុច៖ នៅថ្ងៃអាទិត្យទី១៥កុម្ភៈចុងសប្តាហ៍នេះ សន្និបាតដ៏ធំលើកទីមួយ ដែលហៅជាភាសាអង់គ្លេសថា Global Alumni Convention ដែលរៀបចំដោយស្ថាប័ន idp Education នឹងត្រូវប្រព្រឹត្តិទៅដោយមានការចូលរួមពីអតីតនិស្សិតខ្មែរនៅបរទេសជាច្រើន អ្នកជំនាញបរទេស និងថ្នាក់ដឹកនាំជាន់ខ្ពស់របស់រដ្ឋាភិបាលផងដែរ ដើម្បីនិយាយ ឬក៏ចែករំលែកពិសោធន៍ និងចំណេះដឹងលើប្រធានបទសំខាន់ៗជាច្រើន។ មុននឹងយើងនិយាយអំពីសារៈសំខាន់ ឬគោលដៅនៃសន្និបាតនេះ ខ្ញុំចង់ដឹងជាដំបូងអំពីសាវតានៃគំនិតផ្តួចផ្តើមរៀបចំ Global Alumni Conventionនេះ តើវាកើតឡើងយ៉ាងដូចម្តេច?
លោក ម៉ៅ ស្រេង៖ ខ្ញុំសូមជម្រាបពី background ខ្លះៗ ថាតើហេតុអ្វីបានជាយើងបង្កើតគំនិតរៀបចំសន្និបាតនេះ។ Global Alumni Convention មានគោលបំណងប្រមូលអតីតនិស្សិត ដែលបានបញ្ចប់ការសិក្សាពីបរទេស ក្នុងនោះមានប្រទេសអូស្ត្រាលី ណូវែលហ្សេឡង់ កាណាដា អាមេរិក និងចក្រភពអង់គ្លេស។ ពួកគេនឹងមកជួបជុំគ្នា ដើម្បីចែករំលែកពិសោធន៍ និងរឹតចំណងមិត្តភាព ហើយយើងបានអញ្ជើញស្ថាប័នពាណិជ្ជកម្មនានានៃប្រទេសទាំង៥នេះមកចូលរួមផងដែរ។ សន្និបាតនេះក៏មានការសហការគាំទ្រយ៉ាងពេញទំហឹងពីបណ្តាស្ថានទូតទាំង៥ប្រចាំកម្ពុជា។ ហើយដូចលោកមានប្រសាសន៍អ៊ីចឹង គឺមានការចូលរួមពីមន្ត្រីជាន់ខ្ពស់រដ្ឋាភិបាល។ នេះជាគោលបំណងធំៗនៃសន្និបាត។ ហេតុអ្វីបានជាយើងបង្កើតកម្មវិធីនេះឡើង? ខ្ញុំសូមជម្រាបដែរថា idp Education ជាស្ថាប័នធំជាងគេក្នុងពិភពលោក លើផ្នែកផ្តល់សេវាកម្មអប់រំជាលក្ខណៈអន្តរជាតិ ដល់និស្សិតបរទេសទាំងឡាយណាដែលចង់បង្កើនចំណេះដឹងផ្នែកសិក្សាធិការ ឬជំនាញរបស់គេនៅក្នុងប្រទេសទាំង៥នេះ។ ហើយដោយសារយើងឃើញថា ចំនួនកូនសិស្ស ឬនិស្សិតកម្ពុជាយើងបន្តចាកចេញ ទៅប្រទេសផ្សេងៗ ដើម្បីយកបទពិសោធន៍លើវិស័យសិក្សាធិការអប់រំកាន់តែច្រើនទៅៗ ហើយពេលពួកគាត់ត្រឡប់មកវិញ យើងក៏មានគំនិតថា ចង់ឲ្យពួកគាត់មានឱកាសបានជួបគ្នា មួយឆ្នាំម្តងយ៉ាងហោចណាស់ ដើម្បីពួកគេអាចប្រាស្រ័យទាក់ទងគ្នា ពិភាក្សាវែកញែក ក្នុងអាជីព និងក្នុងវិស័យជំនួញផ្សេងៗ ដើម្បីលើកកំពស់ការចូលរួមអភិវឌ្ឍសេដ្ឋកិច្ចជាតិ។
លោក លាង ដឺលុច៖ ការរៀបចំនេះ បានចាប់ផ្តើមផ្សព្វផ្សាយជាផ្លូវការតាំងពីខែសីហា ដើម្បីរកអ្នកជួយឧបត្ថម្ភ និងប្រកាសចុះឈ្មោះអ្នកចង់ចូលរួមពីខែតុលាឆ្នាំ២០១៤ ។ នៅសល់តែ២ថ្ងៃទៀតទេ ថ្ងៃសន្និបាតនឹងមកដល់។ តើលោកបានទទួលចំនួនអ្នកចូលរួមប៉ុន្មាននាក់ដែរ? តើពួកគេជាអ្នកណា មកពីមជ្ឈដ្ឋានណាខ្លះ?
លោក ម៉ៅ ស្រេង៖ ដូចលោកមានប្រសាសន៍អ៊ីចឹង សម្រាប់កម្មវិធីកម្រិតអន្តរជាតិបែបនេះ ថ្វីដ្បិត idp មានបទពិសោធន៍រៀបចំនៅក្នុងប្រទេសកម្ពុជា និងនៅប្រទេសផ្សេងៗទៀត ដូចជាប្រទេសអូស្ត្រាលីជាដើម តែយើងត្រូវការពេលវេលាយូរ ដើម្បីឲ្យកម្មវិធីនេះ មានលក្ខណៈល្អប្រសើរ និងជំរុញឲ្យមានការចូលរួមកាន់តែច្រើន។ ចំនួនអ្នកចុះឈ្មោះចូលរួមមកដល់ថ្ងៃនេះ (ព្រហស្បតិ៍) មានប្រហែល៣០០នាក់ហើយ។ យើងសង្ឃឹមថាមានការចុះឈ្មោះបន្ថែមទៀត ដើម្បីមានឱកាសទទួលផលប្រយោជន៍ពីកម្មវិធីដ៏ធំនេះ។
លោក លាង ដឺលុច៖ ពួកគេជាអ្នកណា? មានបរទេសច្រើនទេ? ឬក៏ភាគច្រើនជាជនជាតិខ្មែរ?
លោក ម៉ៅ ស្រេង៖ បាទអរគុណ។ កម្មវិធីនេះ បើកទូលាយសម្រាប់អតីតនិស្សិតដែលបញ្ចប់ការសិក្សានៅក្នុងប្រទេសទាំង៥ ។ អ៊ីចឹង មិនមែនសម្រាប់តែជនជាតិខ្មែរទេ ក៏មានជនជាតិដទៃទៀតដែលបានបញ្ចប់ការសិក្សាក្នុងប្រទេសទាំង៥ ក៏ពួកគេអាចចូលរួមបានដែរ។ យើងក៏បើកទូលាយដល់អ្នកដឹកនាំខាងផ្នែកធុរៈកិច្ច ឬជំនួញ សង្គមស៊ីវិលនៅក្នុងប្រទេសកម្ពុជា ស្ថានទូតជាដើម។ ដូច្នេះ ចំនួន៣០០នាក់ដែលចុះឈ្មោះ ពួកគេសឹងតែមកពីគ្រប់ស្ថាប័ន និងវិស័យទាំងអស់ និងមានជនជាតិចម្រុះផ្សេងៗគ្នា។
លោក លាង ដឺលុច៖ មានអ្នកចូលរួមរហូតដល់ជាង៣០០នាក់ សម្រាប់លោកដែលជាអ្នករៀបចំ តើនេះគឺជាជោគជ័យមួយហើយឬនៅ?
លោក ម៉ៅ ស្រេង៖ ដោយសារតែ Global alumni Convention ទើបតែផ្តួចផ្តើមធ្វើជាលើកទីមួយនៅប្រទេសកម្ពុជា ហើយមានការចូលរួមប៉ុណ្ណឹង ខ្ញុំយល់ថាវាជាចំនួនមួយ ដែលយើងគួរតែសប្បាយចិត្តជាមួយ និងបន្តជំរុញឲ្យមានកម្មវិធីនេះប្រព្រឹត្តិទៅទៀតនៅឆ្នាំខាងមុខៗ ។ ខ្ញុំក៏សូមជម្រាបជូនផងដែរថា នៅក្នុងឆ្នាំបន្ទាប់ទៀត ក៏នឹងមានការលើកទឹកចិត្តដល់និស្សិត ឬអតីតនិស្សិតដែលបានបញ្ចប់ការសិក្សាពីតំបន់ដទៃទៀត ព្រមទាំងប្រទេសនានាក្នុងសហភាពអឺរ៉ុប និងអាស៊ីផងដែរ។
លោក លាង ដឺលុច៖ និយាយអំពីគោលដៅ ឬគោលបំណងអំពីការរៀបចំសន្និបាតនេះបន្ថែមទៀត។ ក្នុងដំណើរការពេញមួយថ្ងៃ នៅថ្ងៃទី១៥កុម្ភៈ នៅសណ្ឋាគារ សូហ្វីតែល ខ្ញុំឃើញមានវាគ្មិនមិនតិចជាង៣០រូបទេ ដែលជាអតីតនិស្សិតមកពីប្រទេសអូស្ត្រាលី ញូហ្ស៊ីលេន អាមេរិក បារាំង ជាដើម ត្រូវធ្វើបទបង្ហាញលើប្រធានបទ ជាច្រើនដូចជា ភាពជោគជ័យ និងឧបសគ្គរបស់សហគ្រិនវ័យក្មេង ទេសចរណ៍ និងបដិសណ្ឋាកិច្ច និងវិស័យអប់រំក្នុងរយៈពេល៥ខាងមុខជាដើម។ តើលោក រំពឹងទទួលបានអ្វីពីសន្និបាតនេះ? ឬក៏ថាអ្វីជាគោលដៅនៃសន្និបាត ក្រៅតែពីការផ្តល់ឱកាសឲ្យអតីតនិស្សិតមកពីបរទេសបានជួបជុំគ្នា?
លោក ម៉ៅ ស្រេង៖ ការជួបជុំគ្នានេះ មិនត្រឹមតែបង្កលក្ខណៈផ្តល់ឲ្យអ្នកចូលរួមទទួលបានប្រយោជន៍ជាលក្ខណៈបុគ្គលទេ វាក៏បង្កលក្ខណៈឲ្យមានការពិភាក្សាលើកម្មវិធីផ្សេងៗ រួមទាំងការវិនិយោគពីប្រទេសដទៃទៀត និងការលើកម្ពស់វិស័យអប់រំនៅកម្ពុជា ការជំរុញឲ្យមានវប្បធម៌ជជែកគ្នាទូលំទូលាយជាងមុន បន្ទាប់ពីសន្និបាតនេះ។
លោក លាង ដឺលុច៖ តើវាគ្មិនត្រូវនិយាយអំពីប្រធានបទទាំងនោះបែបទ្រឹស្តីទូលំទូលាយ ឬក៏ idp បានស្នើឲ្យពួកគាត់និយាយភ្ជាប់បរិបទរបស់កម្ពុជាឲ្យបានច្រើនជាង?
លោក ម៉ៅ ស្រេង៖ កម្មវិធី Global alumni Convention ថ្វីដ្បិតតែយើងកៀងគរ ប្រមែប្រមូលនិស្សិតដែលរៀនចប់ពីបរទេសមែន ឬជនជាតិបរទេសបន្ថែមពីលើជនជាតិខ្មែរមែន ប៉ុន្តែប្រធានបទសំខាន់ៗ គឺផ្តោតទៅលើបរិបទនៃប្រទេសកម្ពុជា។ ហើយដោយសារតែសហគមន៍សេដ្ឋកិច្ចអាស៊ាន នឹងចាប់ផ្តើមនៅចុងឆ្នាំ២០១៥នេះ ការពិភាក្សាមួយចំនួនក៏ផ្តោតទៅលើក្របខណ្ឌអាស៊ានផងដែរ។
លោក លាង ដឺលុច៖ មានវាគ្មិនមួយចំនួន ដូចជាឯកឧត្តមរដ្ឋមន្ត្រី ស៊ុន ចាន់ថុល ឯកឧត្តមតំណាងរាស្ត្រ ហ៊ុន ម៉ានី និង ឯកឧត្តមរដ្ឋមន្ត្រីបរិស្ថាន សាយ សំអាល់ជាដើម ដែលនឹងមានវត្តមាននៅក្នុងសន្និបាតនោះ។ តើលោកអាចពន្យល់បានទេថា ពួកគាត់មានវត្តមាននៅទីនោះ ដោយសារគ្រាន់តែជាអតីតនិស្សិតមកពីបរទេសទេ ឬក៏មុខងារ និងតួនាទីរបស់ពួកគាត់ វាមានសារៈសំខាន់ក្នុងការគោលដៅនៃការរៀបចំសន្និបាតនេះដែរ?
លោក ម៉ៅ ស្រេង៖ ការជ្រើសរើសវាគ្មិន ជាពិសេសថ្នាក់ដឹកនាំពីរដ្ឋាភិបាល ឬពីស្ថាប័នជំនួញក្នុងសន្និបាតនេះ គឺមានការផ្តោតទៅលើ ប្រវត្តិនៃការសិក្សារបស់ពួកគាត់ ទីមួយ។ ដូចលោកមានប្រសាសន៍អ៊ីចឹង វាគ្មិនមកពីរដ្ឋាភិបាល សុទ្ធតែមានប្រវត្តិធ្លាប់បានសិក្សានៅបរទេស ពិសេសប្រទេសទាំង៥ ។ ទី២ ដោយសារតែតួនាទីដែលពួកគាត់កំពុងមានសព្វថ្ងៃ លើវិស័យអាទិភាពមួយចំនួន ហើយវិស័យទាំងនោះ គឺជាប្រធានបទនៃការជជែកវែកញែកនៅក្នុងសន្និបាតលើកទីមួយនេះដែរ ដូច្នេះពួកគាត់អាចយកពិសោធន៍មកចែករំលែកនៅក្នុងសន្និបាតជាមួយអ្នកចូលរួមបាន។
© រក្សាសិទ្ធិដោយ thmeythmey.com