ជាតិ
នយោបាយជាតិ
លោក សម រង្ស៊ី ស្នើលោក ស ខេង ឲ្យបន្ដទិដ្ឋាការជូនលោក អាឡិច
×
ក្នុងឋានៈជាប្រធានក្រុមមតិភាគតិចនៅរដ្ឋសភា លោក សម រង្ស៊ី បានស្នើឲ្យរដ្ឋមន្ត្រីក្រសួងមហាផ្ទៃ លោក ស ខេង និងជាប្រធានក្រុមមតិភាគច្រើននៅរដ្ឋសភា ត្រួតពិនិត្យឡើងវិញនូវការសម្រេចរបស់នាយកដ្ឋានអន្តោប្រវេសន៍នៃក្រសួងមហាផ្ទៃ ដែលមិនបន្ដទិដ្ឋាការជូនលោក អាឡិចសាន់ត្រូ ហ្គន់សាឡេស ដេវីតសុន ជនជាតិអេស្បាញ ដោយតម្រូវឲ្យចាកចេញពីប្រទេសកម្ពុជា។ នេះបើតាមលិខិតចុះថ្ងៃទី១៦ កុម្ភៈ របស់លោក សម រង្ស៊ី ។
លោក សម រង្ស៊ី យល់ឃើញថា លោក អាឡិច មិនមែនជាឧក្រិដ្ឋជន និងមិនបានប្រព្រឹត្តបទល្មើសអ្វីធ្ងន់ធ្ងរ ដែលត្រូវបណ្ដេញចេញពីប្រទេសកម្ពុជានោះទេ។ ហើយលោកថា កន្លងមកបុរសជនជាតិអេស្បាញរូបនេះ ចេះគោរពវប្បធម៌ និងប្រពៃណីរបស់កម្ពុជា ជាពិសេសលោក អាឡិចបានចូលរួមជួយជំរុញឲ្យប្រជាពលរដ្ឋយល់ដឹងពីបញ្ហាបរិស្ថាន និងសិទ្ធិរបស់ខ្លួនកាន់តែច្បាស់ទៀតផង។
ជាមួយគ្នានេះប្រធានក្រុមមតិភាគតិចក្នុងសភារូបនេះក៏សុំអន្តរាគមន៍ឲ្យនាយកដ្ឋានអន្តោប្រវេសន៍នៃក្រសួងមហាផ្ទៃ បន្ដទិដ្ឋាការឲ្យលោក អាឡិច ដើម្បីឲ្យមានសិទ្ធិស្នាក់នៅ និងមានសិទ្ធិបន្ដសកម្មភាពស្របច្បាប់ និងអហិង្សានៅក្នុងសង្គមស៊ីវិល នៅប្រទេសកម្ពុជាបន្ដទៀត។
គួរបញ្ជាក់ លោក អាឡិច ហ្គន់សាឡេស ប្រធានចលនាមាតាធម្មជាតិ ត្រូវប្រឈមមុខ នឹងការចាប់ខ្លួនបណ្ដេញចេញពីប្រទេសកម្ពុជា នៅថ្ងៃទី២០កុម្ភៈ បន្ទាប់ពីរដ្ឋមន្ត្រីក្រសួងមហាផ្ទៃ លោក ស ខេង បានសម្រេចចិត្តមិនបន្តទិដ្ឋាការអោយរូបលោក បន្ដរស់នៅប្រទេសកម្ពុជាទៀត៕
© រក្សាសិទ្ធិដោយ thmeythmey.com