ជាតិ
សង្គមជាតិ
ធនាគារANZសហការជាមួយអង្គការហ្វារលើកស្ទួយវិស័យសិល្បៈខ្មែរ
× សៀមរាប៖ ក្នុងការងារដើម្បីការអប់រំ តាមរយៈវិស័យសិល្បៈ ធនាគារ ANZ Royal ប្រកាសផ្តល់ថវិកាចំនួន២ម៉ឺនដុល្លារ ក្នុងការគាំទ្រសហគ្រាសសង្គមហ្វារ ដើម្បីបណ្តុះបណ្តាល និងផលិតធនធានសិល្បៈ ក្នុងសង្គមកម្ពុជាឲ្យមានការរីកចម្រើនកាន់តែប្រសើរថែមទៀត។
ពិធីចុះកិច្ចសហប្រតិបត្តិការគ្នារវាងសហគ្រាសសង្គមហ្វារ ដែលជាសម្ព័ន្ធមេរបស់អង្គការហ្វារពន្លឺសិល្បៈ និងធនាគារ ANZ Royal បានរៀបចំឡើងនៅរសៀលថ្ងៃទី១៩ ខែកុម្ភៈ ដើម្បីឲ្យហ្វារ បន្តសកម្មភាពការងាររបស់ខ្លួន ក្នុងការជួយកុមារក្រីក្រ ឲ្យមានឳកាសរៀនពីសិល្បៈ។ កិច្ចសហប្រតិបត្តិការនេះធ្វើឡើង ក្រោយពេលហ្វារ ធ្លាប់បានប្រកាសថាខ្លួនកំពុងប្រឈមនឹងការបិទទ្វារ ព្រោះគ្មានថវិកាសម្រាប់ទ្រទ្រង់ការចំណាយតទៅទៀត។ ការចំណាយ ដែលនាយកប្រតិបត្តិសហគ្រាសសង្គមហ្វារ អះអាងថា មានចន្លោះពី១លានដុល្លារ រហូតដល់១លានកន្លះក្នុងមួយឆ្នាំ លើការបង្រៀន ម្ហូបអាហារ និងការស្នាក់នៅផ្សេងៗរបស់កុមារ ដែលកំពុងរស់នៅជាមួយហ្វារសព្វថ្ងៃ។
លោក ហួត តារា នាយកប្រតិបត្តិសហគ្រាសសង្គមសង្គមហ្វារ ដែលជាស្ថាប័នដើរតួជាអ្នករកប្រាក់ចំណូលដល់អង្គការហ្វារ បានលើកឡើងក្នុងពិធីចុះកិច្ចសហប្រតិបត្តិការនៅស្នាក់ការអង្គការហ្វារ ខេត្តសៀមរាបថា ថវិកាចំនួន២ម៉ឺនដុល្លារដែលផ្តល់ជូនដល់ហ្វារនៅពេលនេះ គឺបញ្ជាក់ថា ពីការយកចិត្តទុកដាក់ខ្ពស់លើវិស័យសិល្បៈខ្មែរ ហើយថវិកានេះ ពិតជាចំណែកមួយ ដើម្បីឲ្យស្ថាប័នរបស់លោកអាចដំណើរការបានតទៅមុខទៀត។
សកម្មភាពដែលនឹងត្រូវរៀបចំធ្វើក្រោមកិច្ចសហប្រតិបត្តិការរវាងហ្វារ និងធនាគារ ANZ Royal មានការបង្រៀនសិល្បៈ ការប្រគំតន្ត្រីតាមជនបទ និងការបើកវគ្គបង្រៀនដល់យុវជនហ្វារ ពីរបៀបសន្សំប្រាក់ ដែលណែនាំដោយបុគ្គលិកធនាគារ ANZ Royal ផ្តល់។ លោក ហួត តារា បន្តថា៖« យើងមិនត្រឹមប្រើប្រាស់តែក្នុងហ្វារមួយទេ ក្នុងនោះមានសាលាបាយ ដែលជាដៃគូរក្នុងការអភិវឌ្ឍរបស់យើងផងដែរ។ គោលបំណងរបស់យើង គឺផ្សព្វផ្សាយរាល់ការសម្តែងទាំងឡាយទៅដល់ទស្សនិកជននៅទូទាំងប្រទេសកម្ពុជា ក្នុងការរួមដំណើរ និងដឹងពីសិល្បៈ និងវប្បធម៌ខ្មែរ»។
តំណាងធនាគារ ANZ Royal លោក Garnt Knuchey បាននិយាយថា ការសហការជាមួយហ្វារនៅពេលនេះ គឺពិតជាមានសារសំខាន់ណាស់ ព្រោះហ្វារមានឈ្មោះល្បីលើវិស័យសិល្បៈ និងអប់រំដល់កុមារនៅកម្ពុជា។ លោកបន្តថា ការចួលរួមរបស់ធនាគារ ANZ Royal នៅពេលនេះ គឺជាទិសដៅទាំង៤ របស់ខ្លួននៅទូទាំងពិភពលោក ក្នុងនោះក៏មានការអប់រំផងដែរ។
យ៉ាងណាមិញ ទន្ទឹមនឹងការពឹងផ្អែកស្ទើរតែទាំងស្រុងពីការសម្តែងសិល្បៈ ដើម្បីផ្គត់ផ្គង់ការចំណាយរបស់ខ្លួន សហគ្រាសសង្គមហ្វារ កំពុងជួបប្រទះបញ្ហាហរិញ្ញវត្ថុផងដែរ។ ក្នុងរយៈពេលប្រមាណ២០ឆ្នាំ ក្រោយការបង្កើត មានកុមារក្រីក្ររាប់ម៉ឺននាក់ ត្រូវបានហ្វារបណ្តុះបណ្តាល និងក្លាយជាធនធានម្នាក់ក្នុងសង្គម។ ក្នុងមួយថ្ងៃ មានសិស្សជាង១ពាន់នាក់ ដែលមកទទួលការបង្ហាត់បង្រៀនសិល្បៈ មានការគូរគំនូរ និងសម្តែងសៀក ហើយមានសិស្សប្រមាពជិត២០០នាក់ កំពុងស្នាក់នៅក្រោមការមើលថែទាំរបស់អង្គការហ្វារ។
នាយកប្រតិបត្តិការសហគ្រាសហ្វារ បានអំពាវនាវដល់បណ្តាក្រុមហ៊ុន និងស្ថាប័នក្នុងស្រុកទាំងអស់ធ្វើយ៉ាងណា ជួយឧបត្ថម្ភ គាំទ្រ ដើម្បីឲ្យហ្វារ មានលទ្ធភាពជួយកុមារក្រីក្រ តាមរយៈការបង្រៀនសិល្បៈដល់ពួកគេ៕
© រក្សាសិទ្ធិដោយ thmeythmey.com