ជាតិ
សង្គមជាតិ
២០ ឆ្នាំ៖ មន្ទីរពេទ្យគន្ធបុប្ផាចំណាយថវិកាជាង ៥៦០ លានដុល្លារ
×
ភ្នំពេញ៖ ទោះបីជាការផ្តល់សេវាព្យាបាលជំងឺដល់កុមារដោយឥតគិតថ្លៃ ចាប់តាំងពីឆ្នាំ ១៩៩២ ក៏ដោយ ប្រធាន និងជាស្ថាបនិកនៃមន្ទីរពេទ្យគន្ធបុប្ផា លោកវេជ្ជបណ្ឌិត Beat Richner មិនបានចាត់ទុកសេវាព្យាបាលជំងឺដែលមន្ទីរពេទ្យគន្ធបុប្ផាបាននឹងកំពុងធ្វើនោះ ជាសកម្មភាពសប្បុរសធម៌ឡើយ។ ប៉ុន្តែ លោកចាត់ទុកថា ជាកាតព្វកិច្ចនៃមនុស្សជាតិ ដែលជាអ្នកដើរតួនៃជំនួយផ្នែកសុខភាពអន្តរជាតិនានា ២០ ឆ្នាំ កន្លងមកនេះ មន្ទីរពេទ្យគន្ធបុប្ផាចំណាយថវិកាជាង ៥៦០ លានដុល្លារ។
វេជ្ជបណ្ឌិតលោក Beat Richner បានសរសេរនៅក្នុងសេចក្តីប្រកាសព័ត៌មានថា រយៈពេល ២០ឆ្នាំកន្លងមកនេះ ពោលគឺ ចាប់តាំងពីអំឡុងឆ្នាំ ១៩៩២ រហូតដល់បច្ចុប្បន្ននេះ មន្ទីរពេទ្យបានចំណាយថវិកាអស់ចំនួន ៥៦០ លានដុល្លារអាមេរិក សម្រាប់ការពិនិត្យ និងព្យាបាលជំងឺកុមារចំនួន ១៣លាននាក់ ក្នុងនោះកុមារមានជំងឺធ្ងន់ធ្ងរជាង ២លាននាក់។
ប្រធានស្ថាបនិកមន្ទីរពេទ្យគន្ធបុប្ផារូបនេះ បានបង្ហាញនៅក្នុងសេចក្តីប្រកាសព័ត៌មានដែលបានចេញផ្សាយកាលពីថ្ងៃទី១៦ ខែកុម្ភៈឆ្នាំ២០១៥ ថា ក្នុងចំណោមថវិកាសរុបចំនួន ៥៦០លានដុល្លារនោះ រដ្ឋាភិបាលកម្ពុជាបានចូលរួមចំណែកជាង ៤ភាគរយ រដ្ឋាភិបាលស្វីសជាង ៩ភាគរយ និងជាង៨៦ភាគរយផ្សេងទៀត បានមកពីអំណោយសប្បុរសជន។ដោយឡែកចំពោះការបរិច្ចាគរបស់ប្រជាពលរដ្ឋកម្ពុជាវិញ មានតែ ១ភាគរយប៉ុណ្ណោះ។
លោក Richner បានអត្ថាធិប្បាយថា នៅពេលដែលមនុស្សម្នាក់ស្លាប់ទៅ ពិភពលោកយើង នៅក៏ស្លាប់ដែរ។ លោកសង្កត់ធ្ងន់ថា៖«សូមចងចាំថា កុមារម្នាក់ក៏ជាមនុស្សម្នាក់ដែរ»។ ដូច្នេះ ប្រធានមន្ទីរពេទ្យគន្ធបុប្ផារូបនេះ បានរៃអង្គាស ប្រមូលថវិកាពីសប្បុរសជនទាំងជាតិ និងអន្តរជាតិ ដើម្បីជួយសង្គ្រោះអាយុជីវិតកុមារក្រីក្រក្នុងប្រទេសកម្ពុជា។
«អ្វីដែលគន្ធបុប្ផាកំពុងធ្វើគឺពុំមែនជាសប្បុរសធម៌នោះទេ ប៉ុន្តែគឺជាកាតព្វកិច្ចនៃមនុស្សជាតិតែប៉ុណ្ណោះ ហើយរាល់រដ្ឋាភិបាលនានា និងអ្វីដែលហៅថា ជាអ្នកដើរតួនៃជំនួយផ្នែកសុខភាពអន្តរជាតិនានា គួរតែទទួលយកនូវការទទួលខុសត្រូវ»។ នេះជាការលើកឡើងរបស់លោក វេជ្ជបណ្ឌិត Beat Richner ។
បើតាមសេចក្តីប្រកាសព័ត៌មានមន្ទីរពេទ្យគន្ធបុប្ផាទាំង ៥សាខានៅភ្នំពេញ និងខេត្តសៀមរាបមានបុគ្គលិកជនជាតិខ្មែរសរុបចំនួន ២៥០០នាក់ និងបុគ្គលិកបរទេសមានតែ ២នាក់ប៉ុណ្ណោះ។
របាយការណ៍របស់មន្ទីរពេទ្យបានបង្ហាញថា មន្ទីរពេទ្យគន្ធបុប្ផាបានចំណាយជាមធ្យមអស់ ជាង ១២ម៉ឺនដុល្លារអាមេរិកលើការព្យាបាលជំងឺកុមារជាង ៣ពាន់នាក់ក្នុងមួយថ្ងៃៗ ។ការផ្តល់សេវាចំនួន៤សំខាន់គឺ ផ្តោតលើការព្យាបាលកុមារមានជំងឺធ្ងន់ វះកាត់ សម្រាលកូន និងចាក់វ៉ាក់សាំង៕
© រក្សាសិទ្ធិដោយ thmeythmey.com