ជាតិ
នយោបាយជាតិ
×![]()
សេចក្តីព្រាងនៃសេចក្តីស្នើច្បាប់ស្តីពី ការរៀបចំ និងការប្រព្រឹត្តទៅរបស់គណៈកម្មាធិការជាតិរៀបចំការបោះឆ្នោត និងសេចក្តីព្រាងនៃសេចក្តីស្នើច្បាប់បោះឆ្នោតជ្រើសតាំងតំណាងរាស្ត្រ កំពុងក្លាយជាប្រធានបទដ៏ចម្រូងចម្រាស់។ អង្គការសង្គមស៊ីវិលជាតិភាគច្រើន បានព្រួយបារម្ភយ៉ាងខ្លាំង ក្រោយពីគណបក្សប្រជាជនកម្ពុជា និងគណបក្សសង្គ្រោះជាតិសម្រេចដាក់បញ្ចូលខ្លឹមសារមួយចំនួនដែលសង្គមស៊ីវិលចាត់ទុកថា ខ្លឹមសារនោះផ្ទុយពីច្បាប់រដ្ឋធម្មនុញ្ញកម្ពុជានៅក្នុងសេចក្តីព្រាងនៃសេចក្តីស្នើច្បាប់ទាំងពីរ។មន្ត្រីអង្គការសង្គមស៊ីវិល អះអាងថា បក្សប្រឆាំងដែលកន្លងមកតែងតែឲ្យតម្លៃលើមតិសង្គមស៊ីវិលនោះ ពេលនេះបក្សនេះមិនស្តាប់យោបល់ក្រុមខ្លួនឡើយ។
អង្គការសង្គមស៊ីវិលជាតិភាគច្រើន កំពុងតែក្រពុលមុខ និងនិយាយមិនចេញគ្រប់គ្នា ចំពោះសេចក្តីព្រាងនៃសេចក្តីស្នើច្បាប់ គ.ជ.ប និងច្បាប់បោះឆ្នោត ដែលបានធ្វើរួចជាស្ថាពរដោយគណបក្សប្រជាជនកម្ពុជា និងគណបក្សសង្គ្រោះជាតិ ។ ក្រពុលមុខដោយសារមន្ត្រីសង្គមស៊ីវិលទាំងនោះយល់ថា សេចក្តីព្រាងនៃសេចក្តីច្បាប់ទាំងពីរនេះ បានកំណត់នូវខ្លឹមសារមួយចំនួនដែលរឹតត្បិតសិទ្ធិសេរីភាពប្រជាពលរដ្ឋ ផ្ទុយពីច្បាប់រដ្ឋធម្មនុញ្ញ និងបទដ្ឋានអន្តរជាតិនានា។
ក្រពុលមុខ និងនិយាយមិនចេញនឹងខ្លឹមសារមួយចំនួនក្នុងសេចក្តីព្រាងនៃសេចក្តីស្នើច្បាប់នេះជារឿងមួយ តែអ្វីដែលបន្ថែមទម្ងន់ផ្លូវចិត្តដល់អង្គការសង្គមស៊ីវិលទៀតនោះ គឺពួកគេរង្គាលចិត្តនៅពេលដែលគណបក្សសង្គ្រោះជាតិ ដែលធ្លាប់តែស្តាប់យោបល់អង្គការសង្គមស៊ីវិលនោះ បែរជាគណបក្សនេះ ធ្វើសោះអង្គើយដាក់ពួកគេថែមទៀត។ មន្ត្រីអង្គការសង្គមស៊ីវិលសោកស្តាយឥតឧបមាចំពោះទង្វើគណបក្សប្រឆាំងកម្ពុជាមួយនេះ។
លោក គល់ បញ្ញា នាយកប្រតិបត្តិអង្គការខុមហ្វ្រែល ដែលធ្លាប់តែមិនញញើតមាត់រិះគន់រដ្ឋាភិបាលរបស់លោក ហ៊ុន សែន នោះ នៅពេលនេះ ក៏មិនញញើតមាត់រិះគន់មន្ត្រីគណបក្សសង្គ្រោះជាតិផងដែរ។ លោកថា មន្ត្រីចរចារបស់គណកក្សនេះ ប្រើមុខពីរ ។ « មុខទី ១ នៅពេលមន្ត្រីនោះពិភាក្សាជាមួយក្រុមអង្គការសង្គមស៊ីវិល មន្ត្រីទាំងនោះ និយាយថា សេចក្តីព្រាងនៃសេចក្តីស្នើច្បាប់ថ្មីនេះអាក្រក់ជាងច្បាប់ចាស់ទៅទៀត។ មុខទី ២ នៅពេលដែលមន្ត្រីគណបក្សនេះថ្លែងជាសាធារណៈ បែរជាពួកគេការពារសេចក្តីព្រាងនៃសេចក្តីស្នើនៃច្បាប់ទាំងពីរនេះវិញថា ច្បាប់នេះ អាចទទួលយកបាន» ។ នេះជាការបញ្ជាក់របស់អ្នកជំនាញការបោះឆ្នោតខាងលើ។
និយាយដល់ការការពារសេចក្តីព្រាងនៃសេចក្តីស្នើច្បាប់នេះ លោក ព្រាប កុល ឯណោះវិញ ក៏មានយោបល់ផងដែរ។ លោកនាយកប្រតិបត្តិអង្គការតម្លាភាពកម្ពុជារូបនេះ និយាយហាក់ចាក់បណ្តោយថា វាជារឿងត្រឹមត្រូវហើយដែលគណបក្សសង្គ្រោះជាតិថ្លែងការពារសេចក្តីព្រាងនៃសេចក្តីស្នើច្បាប់នេះ ព្រោះគណបក្សនេះ បានជ្រុលខ្លួនចូលរួមធ្វើច្បាប់នេះតាំងពីដើមរៀងមក។ លោក ព្រាប កុល បានហួសចិត្ត នៅពេលដែលគណបក្សសង្គ្រោះជាតិ ចូលរួមចែងបញ្ញត្តិមួយចំនួនជាមួយគណបក្សប្រជាជនកម្ពុជា ដែលលោកអះអាងថា ផ្ទុយពីច្បាប់រដ្ឋធម្មនុញ្ញ។ បញ្ញត្តិទាំងនោះ ដែលលោក ព្រាប កុល ខកចិត្តនោះ គឺការដាក់ទណ្ឌកម្មនៅពេលមន្ត្រីសង្គមស៊ីវិលចូលរួមឃោសនាបោះឆ្នោតពី ១០ ទៅ ២០ លានរៀល ហើយបែរជាបើកសិទ្ធិឲ្យមន្ត្រីតុលាការ យោធា និងនគរបាល ចូលរួមឃោសនាបោះឆ្នោតបានទៅវិញ។
នៅពេលដែលសួរថា តើសេចក្តីព្រាងនៃសេចក្តីស្នើច្បាប់ទាំងពីរនេះ គណបក្សណាមួយជាអ្នកចំណេញ ឬខាត? ទាំងលោក គល់ បញ្ញា និងលោក ព្រាប កុល សុទ្ធតែឆ្លើយថា គណបក្សសង្គ្រោះជាតិជាអ្នកខាតបង់ តែគណបក្សប្រជាជនកម្ពុជាជាអ្នកចំណេញ។ គណបក្សប្រឆាំងខាត ដោយសារការកែទម្រង់ការបោះឆ្នោតដែលគណបក្សនេះ បានសន្យាជាមួយអ្នកគាំទ្រខ្លួននោះ ធ្វើមិនបានសម្រេច។ ហើយគណបក្សកាន់អំណាចចំណេញ ពីព្រោះថា សេចក្តីព្រាងច្បាប់នោះ ស្របតាមការចង់បានរបស់គណបក្សនេះ និងធ្វើឲ្យសង្គមសង្គមស៊ីវិល និងពលរដ្ឋមួយចំនួនអាក់អន់ចិត្តនឹងគណបក្សសង្គ្រោះជាតិ។ នេះបញ្ជាក់របស់លោក គល់ បញ្ញា និងលោក ព្រាប កុល ។
យ៉ាងណាក៏ដោយឆ្លើយតបនឹងការលើកឡើងរបស់មន្ត្រីអង្គការសង្គមស៊ីវិលនេះ សារព័ត៌មានថ្មីៗ មិនអាចទាក់ទងសុំការអត្ថាធិប្បាយពីមន្ត្រីគណបក្សសង្គ្រោះជាតិបាននោះទេ ។ តែកាលពីថ្ងៃអង្គារកន្លងទៅ លោក គួយ ប៊ុនរឿន ប្រធានក្រុមចរចាគណបក្សសង្គ្រោះជាតិ បានថ្លែងថា គណបក្សសង្គ្រោះជាតិមិនមែនមិនស្តាប់យោបល់សង្គមស៊ីវិលនោះទេ ។ លោកថា កន្លងមកទម្រាំបានសេចក្តីព្រាងនេះ គណបក្សសង្គ្រោះជាតិ បានជជែកពិភាក្សាជាមួយសង្គមស៊ីវិលយ៉ាងសកម្ម៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 6 ថ្ងៃ
