ជាតិ
សុខភាព
មន្ទីរពេទ្យចក្ខុរោគព្រះអង្គឌួងចំណាយថវិកា ៨លានដុល្លារនឹងសម្ពោធក្នុងខែឧសភា
×![]()
ភ្នំពេញ៖ មជ្ឈមណ្ឌលចក្ខុរោគមិត្តភាពកម្ពុជា កូរ៉េ នៅមន្ទីរពេទ្យព្រះអង្គឌួងដែលត្រូវសង់ក្រោម គម្រោងជំនួយឥតសំណង ៨លានដុល្លារអាមេរិករបស់ KOICA នឹងសម្ពោធដាក់ឲ្យដំណើរការ នៅថ្ងៃទី១៣ ខែឧសភា ឆ្នាំ២០១៥ ខាងមុខ។
នាសន្និសីទ្ធសារព័ត៌មានស្តីពីសកម្មភាពវប្បធម៌កូរ៉េប្រចាំឆ្នាំ២០១៥ កន្លងមក មន្ត្រីកម្មវិធី ទីភ្នាក់ងារ KOICA លោក ម៉ៅ ឌីណា បានឲ្យដឹងថា ការសាងសង់ និងការបំពាក់ឧបករណ៍ នៅក្នុងមន្ទីរពេទ្យចក្ខុរោគព្រះអង្គឌួង នឹងត្រូវបញ្ចប់ជាស្ថាពរ នៅខែមេសា ឆ្នាំ២០១៥ខាងមុខ នេះ។ ដោយឡែកពិធីសម្ពោធជាផ្លូវការនោះ លោកនិយាយថា មជ្ឈមណ្ឌលចក្ខុរោគ ព្រះអង្គឌួង នឹងប្រារព្ធឡើងនៅថ្ងៃទី១៣ ខែឧសភា ឆ្នាំ២០១៥ ក្រោមអធិបតីភាពរបស់ លោកនាយករដ្ឋមន្ត្រី ហ៊ុន សែន។
លោកបន្តថា មជ្ឈមណ្ឌលភ្នែកដ៏ទំនើបនេះ ត្រូវបានសាងសង់ឡើងនៅក្រោម គម្រោងជំនួយ ឥតសំណង ៨លានដុល្លារអាមេរិក ក្នុងនោះ ជំនួយ KOICA ចំនួន ៥,៥ លាន ដុល្លារ និងមន្ទីរពេទ្យគីមចំនួន ២,៥ លានដុល្លារ ដែលមានឈ្មោះថា គម្រោងសម្រាប់ការ បង្កើតមន្ទីរពេទ្យចក្ខុរោគព្រះអង្គឌួង ក្នុងប្រទេសកម្ពុជា។
«មជ្ឈមណ្ឌលភ្នែកដ៏ទំនើបនេះ នឹងជួយធ្វើឲ្យប្រសើរឡើងនូវអត្រានៃការការពារ ការពិការ ភ្នែក និងសេវាថែទាំសុខភាពភ្នែកទូទៅសម្រាប់ប្រជាជនកម្ពុជា»។ នេះការរំពឹងទុកយ៉ាងមុតមាំរបស់ លោក ម៉ៅ ឌីណា។
បើតាមមន្ត្រីខាងលើ ចាប់ពីឆ្នាំ១៩៩១ រហូតមកត្រឹមឆ្នាំ ២០១៤ ទីភ្នាក់ងារសហប្រតិបត្តិការអន្តរជាតិកូរ៉េ (KOICA) បានផ្តល់ជំនួយឥតសំណង ១៥៦ លាន ដុល្លារអាមេរិកមកកាន់ប្រទេសកម្ពុជា។
គួររម្លឹកផងដែរថា មជ្ឈមណ្ឌលចក្ខុរោគមិត្តភាពកម្ពុជា និងកូរ៉េ ដែលមានឈ្មោះថា គម្រោងសម្រាប់ ការបង្កើតមន្ទីរពេទ្យចក្ខុរោគព្រះអង្គឌួង ត្រូវបានចុះបឋមសិលាសាងសង់ កាលពីខែតុលា ឆ្នាំ២០១៣ ៕
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
