ជាតិ
នយោបាយជាតិ
គណបក្សសង្គ្រោះជាតិត្រូវការសមាសភាព គ.ជ.ប ពីសង្គមស៊ីវិល
× ភ្នំពេញ៖ ប្រធានស្តីទីគណបក្សសង្គ្រោះជាតិ លោក កឹម សុខា បានថ្លែងថា គណបក្សសង្គ្រោះជាតិត្រូវការឲ្យសង្គមស៊ីវិលធ្វើជាសមាសភាពគណៈកម្មាធិការជាតិរៀបចំការបោះឆ្នោតនៅឆ្នាំ ២០១៨ខាងមុខ។ ប៉ុន្តែលោកមិនអាចបញ្ជាក់បានថា តំណាងសង្គមស៊ីវិលប៉ុន្មានរូបដែលនឹងត្រូវជ្រើសរើសនោះទេ។
នាពិធីបង្សុកូលរាប់បាតដើម្បីឧទ្ទិសកុសលជូនដល់វិញ្ញាណក្ខន្ធបាតុករដែលបាត់បង់ជីវិតដោយសារការគប់គ្រាប់បែក កាលពីថ្ងៃ៣០ មីនា ឆ្នាំ១៩៩៧ នៅថ្ងៃទី៣០ ខែមិនានេះ លោក កឹម សុខា អនុប្រធានទីមួយរដ្ឋសភា និងជាប្រធានស្តីទីគណបក្សសង្គ្រោះជាតិ បាននិយាយថា គណបក្សសង្គ្រោះជាតិនឹងរើសសមាភាព គ.ជ.ប ថ្មី ពីខាងអង្គការសង្គមស៊ីវិល។
លោកបានបញ្ជាក់យ៉ាងខ្លីថា៖«សមាសភាពសង្គ្រោះជាតិភាគច្រើនគឺ សង្គមស៊ីវិល។ យើងមិនទាន់សម្រចរើសចំនួនប៉ុន្មាននាក់ទេ។ យើងរង់ចាំគាត់ដាក់ពាក្យរួចសិន»។
សេចក្តីព្រាងច្បាប់ថ្មីស្តីពីការរៀបចំ និងការប្រព្រឹត្តទៅនៃគណៈកម្មាធិការជាតិរៀបចំការបោះ ឆ្នោត ត្រូវបានឯកភាពគ្នារវាងក្រុមការងារនៃគណបក្សទាំងពីកាលពីថ្ងៃទី០៨ ខែធ្នូ ឆ្នាំ២០១៤ ។ ច្បាប់ដ៏ចម្រូងចម្រាសទាំងពីរស្តីពីការរៀបចំគណៈកម្មាធិការជាតិរៀបចំការបោះឆ្នោតនិងច្បាប់ស្តីពីការបោះឆ្នោតជ្រើសតាំងតំណាងរាស្ត្របានឆ្លងផុតព្រឹទ្ធសភានៅថ្ងៃទី២៥ ខែមិនាហើយហើយកំពុងស្ថិតក្នុងដៃក្រុមប្រឹក្សាធម្មនុញ្ញ។ គណបក្សទាំងពីរកំពុងរៀបចំសម្រេចលើសមាសភាពទាំងរៀងៗខ្លួន។
យោងតាមមាត្រា ៦ នៃច្បាប់ថ្មីស្តីពីការរៀបចំគណៈកម្មាធិការជាតិរៀបចំការបោះឆ្នោត សមាសភាពគណៈកម្មាធិកាជាតិរៀបចំការបោះឆ្នោតថ្មីមានចំនួន ០៩រូប ក្នុងនោះ សមាសភាពគ.ជ.ប ៤រូបត្រូវជ្រើសដោយគណបក្សដឹកនាំរដ្ឋាភិបាល និង ៤រូបទៀតជ្រើសរើសដោយគណបក្សដែលមានអាសនៈក្នុងរដ្ឋសភាមិនចូលរួមក្នុងរាជរដ្ឋាភិបាល និង ១រូបទៀតជ្រើសរើសដោយមានការព្រមព្រៀងរវាងគណបក្សដែលមានអាសនៈក្នុងរដ្ឋសភា។
ការទទួលពាក្យសុំឈរឈ្មោះជាបេក្ខជនគ.ជ.បមានរយៈពេល១០ថ្ងៃ គឺគិតចាប់ពីថ្ងៃទី២៧ ខែមិនា រហូតដល់ថ្ងៃទី៦ ខែមេសា៕
© រក្សាសិទ្ធិដោយ thmeythmey.com