ជាតិ
មេដឹកនាំទូរទស្សន៍ថ្មី«PNN»ត្រូវបានបង្ហាញ !
×
ភ្នំពេញ៖ PNN គឺជាស្ថានីយ៍ទូរទស្សន៍ថ្មីដែលបោះទុនវិនិយោគដោយលោកឧកញ៉ា លី យ៉ុងផាត់ ក្នុងទំហំទឹកប្រាក់សរុបប្រមាណជា៤០លានដុល្លារអាមេរិក។ស្ទូឌីយោទូរទស្សន៍ថ្មី PNN នឹងបើកដំណើរការក្នុងត្រីមាសទីពីរពោលគឺចាប់ពីខែមេសា ឆ្នាំ២០១៥ ខាងមុខ។នេះបើតាមការបញ្ជាក់ក្នុងសេចក្តីប្រកាសព័ត៌មានរបស់ទូរទស្សន៍PNN ។ PNNអះអាងថាខ្លួនមានស្ទូឌីយោទំហំធំជាងគេនៅក្នុងប្រទេសកម្ពុជា។តើនរណាខ្លះជាមេដឹកនាំទូរទស្សន៍ថ្មី PNN?
រហូតមកដល់ពេលនេះ មេដឹកនាំទូទស្សន៍PNN ត្រូវបានគេដឹងថា មានលោកGlen Felgateអគ្គនាយកស្ថានីយទូរទស្សន៍PNN។ លោក Glenធ្លាប់មានប្រវត្តិគ្រប់គ្រងទូរទស្សន៍ CTN និងក្រុមហ៊ុនព័ត៌មាននៅប្រទសមីយ៉ាន់ម៉ា។
បន្ទាប់ពីលោក Glenថ្នាក់ដឹកនាំទូរទស្សន៍បានសម្រេចតែងតាំងជនជាតិថៃ លោក SupitRattichunhachotក្នុងតំណែងជាអគ្គនាយករងទទួលបន្ទុកផ្នែកផលិតកម្មវិធី, លោក សោម ឆាយ៉ា ដែលធ្លាប់កាន់កាប់ទូរទស្សន៍ CTN ដែរនោះ ត្រូវបានតែងតាំងជាអគ្គនាយករង PNN ទទួលបន្ទុកផ្នែកព័ត៌មាន។ លោក ប៉ែន បូណា អតីតនិពន្ធនាយកវិទ្យុបារាំងអន្តរជាតិ ត្រូវបានតែងតាំងជានិពន្ធនាយកព័ត៌មាននៃ PNN។ នេះបើយោងតាមលោក Glen Felgateដែលបានថ្លែងបញ្ជាក់ប្រាប់ថ្មីៗនៅថ្ងៃព្រហស្បតិ៍ទី២ខែមេសានេះ។
ក្រៅពីមេដឹកនាំធំៗនៃ PNN ប្រភពព័ត៌មានមួយចំនួនបានអោយដឹងថា អ្នកកាសែតរបស់PNNសុទ្ធតែមានបទពិសោធន៍ព័ត៌មានខ្ពស់។ អ្នកកាសែតទាំងនោះ មានមកពីពីវិទ្យុអាស៊ីសេរី ពីទូរទស្សន៍ហង្សមាស ពីទូរទស្សន៍ CNC ពីវិទ្យុស្ត្រី ១០២។ល។
លោក Glen Felgateអគ្គនាយកស្ថានីយទូរទស្សន៍PNNដែលធ្លាប់មានប្រវត្តិគ្រប់គ្រងទូរទស្សន៍ CTN និងក្រុមហ៊ុនព័ត៌មាននៅមីយ៉ាន់ម៉ា បានបញ្ជាក់ថា៖«នេះជាការវិនិយោគដ៏ធំមួយដែលយើងជឿជាក់ថានឹងលើកកម្ពស់គុណភាពវិស័យផ្សព្វផ្សាយនៅក្នុងប្រទេសកម្ពុជា ឲ្យឈានឡើងមួយកម្រិតទៀត ។ លើសពីនេះការផ្សាយរបស់ស្ថានីយទូរទស្សន៍ PNN នឹងគ្របដណ្តប់ទូទាំងប្រទេស»។
មានទីតាំងក្នុងខណ្ឌជ្រោយចង្វា ជាយរាជធានីភ្នំពេញស្ទីឌីយោរបស់ទូរទស្សន៍ PNN ដែលចាប់ដំណើរការពីខែមេសា ខាងមុខមានបុគ្គលិកជាង៣០០នាក់ បំពេញការងារទៅតាមជំនាញនិងផ្នែករៀងៗខ្លួន។
ទីតាំងទាំងមូលរបស់ទូរទស្សន៍ PNN ដែលគ្រប់គ្រងដោយក្រុមហ៊ុន LYP Group របស់លោក លី យ៉ុងផាត់សមាជិកព្រឹទ្ធសភានៃគណបក្សប្រជាជនកម្ពុជាត្រូវបានសាងសង់ឡើងដោយចំណាយទឹកប្រាក់អស់ជាង១០លានដុល្លារអាមេរិកហើយ១០លានដុល្លារអាមេរិកផ្សេងទៀត ត្រូវបានចំណាយលើផ្នែកបច្ចេកទេស។
ក្នុងបទសម្ភាសន៍មួយជាមួយសារព័ត៌មានថ្មីៗកាលពីពេលថ្មីៗកន្លងមក លោក ប៉ែន បូណាដែលបានចាកចេញពីតំណែងនិពន្ធនាយកវិទ្យុបារាំង RFI ទៅកាន់តំណែងដូចគ្នាក្នុងទូរទស្សន៍ PNN បានអះអាងថាទូរទស្សន៍ថ្មីរបស់លោកត្រូវតែខុសប្លែកពីបណ្តាញទូរទស្សន៍ដែលមានស្រាប់។
សូមបញ្ជាក់ថា ទុនវិនិយោគទូរទស្សន៍ថ្មីនេះ ត្រូវបានគេបានក្រុមប៉ាន់ស្មានថា អស់ទឹកប្រាក់ចំនួន៤០លានដុល្លារអាមេរិក៕
© រក្សាសិទ្ធិដោយ thmeythmey.com