ជាតិ
សង្គមជាតិ
មេបញ្ជាការកងរាជអាវុធហត្ថបញ្ជាឲ្យចាប់រថយន្ត និងម៉ូតូ ពាក់ស្លាកលេខ ខ.ភ.ម
×![]()
ដោយ: ថ្មីៗ
ភ្នំពេញ៖ មេបញ្ជាការកងរាជអាវុធហត្ថ រាជធានីភ្នំពេញលោក រ័ត្ន ស្រ៊ាង បានសរសេរនៅក្នុងទំព័រហ្វេសប៊ុករបស់ខ្លួន អោយកងអាវុធហត្ថរាជធានីភ្នំពេញ ក៏ដូចជាកងរាជអាវុធហត្ថលើផ្ទៃប្រទេសត្រូវចាត់វិធានការចាប់រថយន្ត និងម៉ូតូ ពាក់ស្លាកលេខ ខ.ភ.ម។ ការចេញបទបញ្ជារបស់កងរាជអាវុធហត្ថរាជធានីភ្នំពេញនេះ គឺ ធ្វើឡើងទៅតាមអនុសាសន៍របស់ប្រមុខរដ្ឋាភិបាល។
មេបញ្ជាការកងរាជអាវុធហត្ថរាជធានីភ្នំពេញលោក រ័ត្ន ស្រ៊ាង កាលពីថ្ងៃទី៨ ខែមេសា ម្សិលមិញ បានសរសេនៅក្នុងទំព័រហ្វេសប៊ុករបស់ខ្លួនថា កងរាជអាវុធហត្ថត្រូវធ្វើការពិនិត្យទៅលើយាន្តជំនិះទាំងឡាយ ដែលពាក់ស្លាកលេខខ.ភ.ម.និងរថយន្តដាក់ស្លាកដែលចេញពីក្រសួងពីរឬបី ដាក់នៅក្នុងកញ្ចក់រថយន្តរបស់ខ្លួនតែមួយនោះ។លោកថា មានអ្នកខ្លះ ខ្លួនជាមន្ត្រីអាវុធហត្ថផង ជានគរបាលផងនិងជាអង្គរក្សផង។
ចំពោះបញ្ហានេះ មេបញ្ជាការកងរាជអាវុធហត្ថ រាជធានីភ្នំពេញបានដាក់បទបញ្ជា ដល់កងកម្លាំងកងរាជអាវុធហត្ថ រាជធានីភ្នំពេញទាំងអស់ត្រូវបោសសំអាត ចាប់ឃាត់ទុក ឡាន ម៉ូតូដែលពាក់ស្លាកលេខ ខ.ភ.ម.ខុសច្បាប់ និងឡានដែលដាក់ស្លាកលេខដែលចេញពីក្រសួងពីរ ឬបី។ ការដាក់បទបញ្ជានេះ គឺយោងតាមអនុសាសន៍ ប្រមុខរដ្ឋាភិបាលអោយបោសសំអាតឲ្យអស់ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរដោយធ្វើយ៉ាងណាការពារសុវត្ថិភាព សន្តិសុខ សណ្ដាប់ធ្នាប់ សាធារណៈនិងសង្គមជាតិ ជូនពលរដ្ឋ។
ទាក់ទងនឹងបញ្ហានេះ អង្គការសង្គមស៊ីវិលធ្លាប់បានលើកឡើងថា មានរថយន្តដែលពាក់ស្លាកលេខ ខ.ភ.ម នគរបាល ជាដើមនោះយកទៅប្រព្រឹត្តបទល្មើសផ្សេងៗ ដូចជាយកទៅដឹកឈើ និងយកទៅធ្វើជាខ្នងបង្អែកកាប់ឈើខុសច្បាប់ជាដើម។ ម្យ៉ាងវិញទៀតរដ្ឋាភិបាលមិនដែលចាត់វិធានការអោយមានប្រសិទ្ឋិភាពម្តងណាឡើងចំពោះល្លាកលេខ ខ.ភ.ម និងនគរបាលជាដើមនោះ។បញ្ហានេះ ហាក់ក្លាយទៅជាសង្គមអនាធិប្បតេយ្យ និងភាពសាមញ្ញទៅហើយនៅក្នុងប្រទេសកម្ពុជា។
អត្ថបទ៖ គង់ ប៊ុនណាវិទ្យុ FM 102
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 សប្តាហ៍
