ជាតិ
អត្ថបទពាណិជ្ជកម្ម
ក្រសួងប្រកាសទទួលពាក្យប្រកួតបច្ចេកវិទ្យាគមនាគមន៍ និងព័ត៌មាន ២០១៥
×
ភ្នំពេញ៖ នៅថ្ងៃទី៣០ ខែមេសានេះ ក្រសួងប្រៃសណីយ៍បានប្រកាសទទួលពាក្យបេក្ខជន នៅទូទាំងប្រទេស ទាំងក្នុងវិស័យសាធារណៈ និងវិស័យឯកជនទាំងអស់ ដើម្បីចូលរួមប្រកួត ប្រជែងយកពានរង្វាន់បច្ចេកវិទ្យាគមនាគមន៍ និងព័ត៌មានកម្ពុជា ឆ្នាំ២០១៥ ។ ជ័យលាភីក្នុងកម្ម វិធីនេះ នឹងទទួលបានពានរង្វាន់ និងថវិកាជាង ១ពាន់ដុល្លារអាមេរិក ពិសេសទៀតនោះ ជ័យលាភីឆ្នើមនឹងក្លាយជាតំណាងឲ្យកម្ពុជាចូលរួមប្រកួតថ្នាក់តំបន់អាស៊ាន (ASEAN ICT Awards) ផងដែរ។
ក្រសួងប្រៃសណីយ៍ និងទូរគមនាគមន៍ មានគោលបំណងលើកតម្កើងនូវការយល់ដឹងខាងផ្នែកបច្ចេកវិទ្យាគមនាគន៍ និងព័ត៌មានក្នុងស្រទាប់សាធារណជន និងកាត់បន្ថយគម្លាតឌីជីថលនៅក្នុងសហគមន៍ជំនួញ និងប្រជាជន។
នាពិធីប្រកាសបើក នៅថ្ងៃទី៣០ ខែមេសានេះ លោក កាន ច័ន្ទមេតា រដ្ឋលេខាធិការក្រសួងប្រៃសណីយ៍ បានថ្លែងថា បេក្ខជនដែលមានបំណងដាក់ពាក្យចូលរួមប្រកួត ត្រូវតែមានគំនិត ថ្មីក្នុងការបង្កើតបច្ចេកវិទ្យាគមនាគមន៍ និងព័ត៌មាន។
លោកបញ្ជាក់ថា បេក្ខជន និងក្រុមហ៊ុនដែលមានបំណងដាក់ពាក្យចូលរួមប្រកួតប្រជែងនឹងត្រូវទទួលការវាយតម្លៃដោយផ្អែកលើលក្ខណៈវិនិច្ឆ័យមួយចំនួន ក្នុងនោះ រួមមាន គំនិតច្នៃបង្កើតមានតែមួយ អះអាងបញ្ជាក់ពីសក្តានុពលទីផ្សារ ឬប្រសិទ្ធភាពនៃការប្រើប្រាស់ ផលិតផល និងលក្ខណៈសម្បត្តិរបស់ផលិតផល ព្រមទាំងការប្រើប្រាស់បច្ចេកវិទ្យានោះ។
ក្នុងឱកាសនោះដែរ ប្រធានមជ្ឈមណ្ឌលស្រាវជ្រាវ និងអភិវឌ្ឍន៍ លោក ស៊ុន រ៉ាពីដ បានឲ្យដឹងថា ការប្រកួតប្រជែងយកពានរង្វាន់នេះ បើកទូលាយដល់សាធារណៈជនដែលមានសមត្ថភាពចូលរួមប្រកួតប្រជែងទាំងបុគ្គលឯកជន វិស័យសាធារណៈ និងទាំងឯកជន ពាក់ព័ន្ធនានា។
«នេះជាការជំរុញការប្រកួតប្រជែងបច្ចេកវិទ្យានៅកម្ពុជា ឆ្ពោះទៅកាន់តែទំនើបដូចប្រទេសអភិ វឌ្ឍន៍នានា ជាពិសេសគឺ ធនធានយុវជនជំនាន់ក្រោយ»។ នេះជាការថ្លែងបញ្ជាក់របស់ ប្រធានមជ្ឈមណ្ឌលស្រាវជ្រាវ នៃក្រសួងប្រៃសណីយ៍។
បើតាមលោក ស៊ុន រ៉ាពីដ ការទទួលពាក្យប្រកួតប្រជែងពានរង្វាន់បច្ចេកវិទ្យាគមនាគមន៍ និងព័ត៌មាន កម្ពុជា ២០១៥ (Cambodia ICT Awards 2015) នឹងបិទបញ្ចប់នៅថ្ងៃទី២៥ ខែមិថុនា ឆ្នាំ២០១៥ ខាងមុខនេះ។ ដោយឡែក លទ្ធផលនៃការប្រកួតវគ្គផ្តាច់ព្រ័ត្រវិញ នឹងប្រកាសនៅថ្ងៃទី១៩ ខែមិថុនា ២០១៥ ។
ចំពោះសំណុំបែបបទចូលរួមកម្មវិធីប្រកួតប្រជែងនេះ លោកអ្នកអាចទាញយកពីគេហទំព័រ www.cambodiaictaward.com ដោយផ្ទាល់ រួចលោកអ្នកអាចបំពេញពាក្យចុះឈ្មោះតាមរយៈទម្រង់ពាក្យអេឡិចត្រូនិក បន្ទាប់មកផ្ញើ URL វីដេអូ នៅលើ Youtube មុននឹងចុចប៊ូតុង Submit ។
គួរបញ្ជាក់ថា សំណុំបែបបទចូលរួមកម្មវិធីប្រកួតប្រជែង និងឯកសារពាក់ព័ន្ធនានា ក្នុងស្រោមសំបុត្រត្រូវបិទជិតដោយដៃជាមួយត្រាបញ្ជាក់ក្រុមហ៊ុនរបស់សាម៉ីខ្លួនរួច ហើយផ្ញើរទៅកាន់អាស័យដ្ឋានខាងលើ ឬ អាស័យដ្ឋានអ៊ីម៉ែល [email protected] ។
លោកអ្នកអាចទាក់ទងសួរព័ត៌មានលម្អិតតាមរយៈ លោក អៀង កំរ៉ង ទូរស័ព្ទ លេខ ០១២ ៧១៣ ៧១៤ និងលោក ស៊ុន រ៉ាពីដ ទូរសព្ទលេខ ០១៦ ៨៦៨ ៩៨៤ និង អាស័យដ្ឋានអ៊ីម៉ែល
[email protected] ៕
អត្ថបទពាណិជ្ជកម្ម
© រក្សាសិទ្ធិដោយ thmeythmey.com