ជាតិ
នយោបាយជាតិ
អ្នកជំនាញសិទ្ធមនុស្សអ.ស.ប៖ កម្ពុជាបានងាកចេញ ពីដំណើរការប្រជាធិបតេយ្យ
×
អ្នកជំនាញផ្នែកសិទ្ធិមនុស្សរបស់អង្គការសហប្រជាជាតិ លោក ម៉ៃណា គីអៃ(Maina Kiai) បានបង្ហាញក្តីកង្វល់ចំពោះដំណើរការតាក់តែងច្បាប់ស្តី ពីសមាគម និងអង្គការមិនមែនរដ្ឋាភិបាលនៅកម្ពុជា តែគ្មានការចូលរួមជាសាធារណៈពីសង្គមស៊ីវិល។
ផ្អែកតាមប្រកាសព័ត៌មានចេញផ្សាយពីទីក្រុងហ្ស៊ឺណែវ កាលពីចុងសប្តាហ៍កន្លងទៅ អ្នកជំនាញសិទ្ធិមនុស្សរូបនេះ បានគូសបញ្ជាក់ថាការបង្កើតច្បាប់ដើម្បីគ្រប់គ្រងសង្គមស៊ីវិលនៅកម្ពុជា តាំងពីឆ្នាំ២០០៨មកនោះ ត្រូវបានលាក់បាំងជាសម្ងាត់។ លោកថា ខ្លឹមសារនៃសេចក្តីព្រាងច្បាប់នេះមិនត្រូវបានបញ្ចេញឲ្យដឹងនោះ ទេ ហើយភាគីពាក់ព័ន្ធបរាជ័យក្នុងការព្យាយាមរបស់ខ្លួន ដើម្បីទទួលបានច្បាប់ចម្លងនៃអត្ថបទច្បាប់នោះ។
លោកម៉ៃណា គីអៃ បានមានប្រសាសន៍ថា៖«ការងាកចេញពីដំណើរការប្រជាធិបតេយ្យ ដោយទុកចោលតួអង្គសង្គមស៊ីវិល និងការរួមចំណែកដ៏សំខាន់របស់ពួកគេក្នុងដំណើរការនេះ ព្រមទាំងការគេចវេសមិនចង់ឲ្យមានការពិនិត្យជាអន្តរជាតិ ក៏ធ្លាប់មានពីមុនមកដែរនៅកម្ពុជា។ ការអនុម័តច្បាប់បោះឆ្នោត និងច្បាប់ស្តីពី ប្រព័ន្ធតុលាការកាលពីពេលថ្មីៗនេះ ត្រូវបានធ្វើឡើងដោយគ្មាន ឬមាន ប៉ុន្តែនៅនាទីចុងក្រោយនៃការផ្សព្វផ្សាយច្បាប់ទាំងនោះ»។
អ្នកជំនាញរូបនេះ បានសង្កត់ធ្ងន់ថា «តម្លាភាព និងគណនេយ្យភាព គឺជាកត្តាសំខាន់មួយនៃដំណើរការតាក់តែងច្បាប់ក្នុងសង្គមប្រជាធិបតេយ្យ»។
បើតាមសេចក្តីប្រកាសព័ត៌មានដដែល អ្នកជំនាញរូបនេះ បានសរសេរលិខិតទៅរដ្ឋាភិបាលកម្ពុជា អំពីបទបញ្ញត្តិដែលមានបញ្ហានៅសំណៅ នៃសេចក្តីព្រាងច្បាប់ ឆ្នាំ២០១១ ស្តីពីសមាគម និងអង្គការមិនមែនរដ្ឋាភិបាល ក្នុងនោះរួមមានការផ្តល់និយមន័យមិនច្បាស់លាស់ ឬមានលក្ខណៈស្រពិចស្រពិល ដំណើរការនៃការចុះបញ្ជីបែបការិយាធិបតេយ្យ លក្ខខណ្ឌតម្រូវអំពីសមាជិកភាព មិនមានលក្ខណៈប្រាកដនិយម និងលក្ខខណ្ឌតម្រូវការធ្ងន់ធ្ងរបន្ថែមទៅលើអង្គការមិនមែនរដ្ឋាភិបាលបរទេស។
សេចក្តីប្រកាសព័ត៌មានបន្តថា រហូតមកដល់ពេលនេះ លោកម៉ៃណា គីអៃ មិនទាន់បានទទួលការឆ្លើយតបពីរដ្ឋាភិបាល ឬច្បាប់នេះ ដែលជាផលលំបាកក្នុងការវាយតម្លៃថាតើកង្វល់កន្លងមកដែលទាក់ទងនឹងច្បាប់នេះ ត្រូវបានយកទៅពិចារណា ឬយ៉ាងណា?
ដើម្បីធានាថា ភាគីពាក់ព័ន្ធ ព្រមទទួលយកខ្លឹមសារនៃសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលដែលគេរំពឹងថា នឹងត្រូវអនុម័តដោយរដ្ឋសភានៅក្នុងខែឧសភានេះលោក ម៉ៃណា គីអៃ បានស្នើដោយទទូចឲ្យរាជរដ្ឋាភិបាលបញ្ចេញអត្ថបទដើមនៃសេចក្តីព្រាងច្បាប់នេះ និងអនុញាតឲ្យមានការពិគ្រោះជាសាធារណៈ៕
© រក្សាសិទ្ធិដោយ thmeythmey.com