ជាតិ
នយោបាយជាតិ
×![]()
ជាថ្មីម្តងទៀត រដ្ឋាភិបាលវៀតណាម តាមរយៈសមាជិកការិយាល័យនយោបាយមជ្ឈិមបក្សកុម្មុយនិស្តរបស់ខ្លួន លោក ឡេ ហុងអាញ់ បានស្នើឲ្យរដ្ឋាភិបាលកម្ពុជា ជួយមើលការខុសត្រូវប្រជាជនវៀតណាមដែលរស់នៅក្នុងប្រទេសកម្ពុជាដោយស្របច្បាប់ផង។
សំណើរបស់រដ្ឋាភិបាលវៀតណាមនេះ ធ្វើឡើងនៅក្នុងអំឡុងពេលដែលលោក ឡេ ហុងអាញ់ សមាជិកការិយាល័យនយោបាយមជ្ឈិមបក្សកុម្មុយនិស្តវៀតណាមមកបំពេញទស្សនកិច្ចនៅកម្ពុជា។ បើតាមការចុះផ្សាយរបស់គេហទំព័ររដ្ឋសភាជាតិ ក្នុងជំនួបជាមួយលោក ហេង សំរិន ប្រធានរដ្ឋសភា កាលពីរសៀលថ្ងៃទី៩ ខែមិថុនា លោក ឡេ ហុងអាញ់ តាមរយៈលោកប្រធានរដ្ឋសភា បានស្នើឲ្យរដ្ឋាភិបាលកម្ពុជាយកចិត្តទុកដាក់មើលការខុសត្រូវ ចំពោះជនជាតិខ្លួនដែលរស់នៅក្នុងប្រទេសកម្ពុជា។ លោក សុំឲ្យរដ្ឋាភិបាលកម្ពុជា ការពារជនជាតិវៀតណាមដែលមកប្រកបរបររកស៊ីស្របច្បាប់នៅកម្ពុជា ឲ្យដូចជាបណ្តាជនបរទេសដទៃទៀតដែលស្នាក់នៅកម្ពុជាដែរ។
សូមបញ្ជាក់ថា ជាញឹកញាប់រដ្ឋាភិបាលវៀតណាម តែងតែស្នើឲ្យរដ្ឋាភិបាលកម្ពុជា ជួយការពារប្រជាជនខ្លួនដែលមករស់នៅកម្ពុជា។ ជាពិសេសកាលពីអំឡុងពេលដែលបញ្ញវន្តខ្មែរមួយចំនួន ព្រះសង្ឃ និងពលរដ្ឋខ្មែរក្រោម តវ៉ានៅមុខស្ថានទូតវៀតណាមប្រឆាំងនឹងអ្នកនាំពាក្យស្ថានទូតវៀតណាមប្រចាំនៅកម្ពុជា ដែលអះអាងថា ទឹកដីកម្ពុជាក្រោមជារបស់វៀតណាមតាំងពីបុរាណកាលមក អាជ្ញាធរវៀតណាមព្រួយបារម្ភពីសុវត្ថិភាពរបស់ប្រជាជនខ្លួនយ៉ាងខ្លាំង។ ពេលនោះស្របពេលដែលលោក ហេង សំរិន ទៅបំពេញទស្សកិច្ចនៅចុងខែសីហា ឆ្នាំ ២០១៤ ក្នុងប្រទេសវៀតណាម រដ្ឋាភិបាលវៀតណាមក៏បានស្នើឲ្យលោក ហេង សំរិន ជួយការពារប្រជាជនខ្លួន ដែលរស់នៅក្នុងទឹកដីកម្ពុជាដែរ។
បញ្ហាជនជាតិវៀតណាម ដែលរស់នៅក្នុងទឹកដីកម្ពុជា ជាបញ្ហាដ៏រសើបដែលគណបក្សប្រឆាំង និងប្រជាជនមួយចំនួន មិនសប្បាយចិត្តឡើយ។ ពួកគេយល់ថា ប្រជាជនវៀតណាមដែលមករស់នៅក្នុងទឹកដីកម្ពុជា ភាគច្រើន អ្នកទាំងនោះ មករស់នៅដោយខុសច្បាប់ ហើយរដ្ឋាភិបាលកម្ពុជា មិនបានចាត់វិធានការតឹងរឹងជុំវិញបញ្ហានេះ។ ម្យ៉ាងទៀត បញ្ហាប្រវត្តិសាស្ត្រ ក៏រឹតតែធ្វើឲ្យប្រជាជនកម្ពុជាមួយចំនួន កាន់តែមិនពេញចិត្តជនវៀតណាមខ្លាំងឡើង៕
© រក្សាសិទ្ធិដោយ thmeythmey.com
