ពីនេះ ពីនោះ
×![]()
ដោយ: ថ្មីៗ
ពាក្យថាមនោមយិទ្ធិជាវាក្យសព្ទខាងព្រះពុទ្ធសាសនា មានន័យថា «ឫទ្ធិដែលសម្រេចដោយចិត្ត» តែអត្ថន័យនៅក្នុងការប្រែពីពាក្យ«Will Power»នេះសំដៅដក់អំណាចដែលធ្វើឲ្យអ្វីៗសម្រេចផល ដែលកើតពីកម្លាំងចិត្តរបស់មនុស្សម្នាក់ណានោះ។
តាមពិតទៅមនោមយិទ្ធិ គឺជាអ្វីដែលមាននៅក្នុងខ្លួនមនុស្សយើងគ្រប់ៗគ្នា ពោលគឺកម្លាំងប្រាថ្នា កម្លាំងអធិដ្ឋាន កម្លាំងតាំងចិត្តដ៏ជាក់លាក់ កម្លាំងកិលេសតណ្ហា។ ល។ កម្លាំងទាំងនេះជាគ្រឿងភ្ញោចឲ្យយើងមានទង្វើផ្សេងៗឆ្ពោះទៅកាន់គោលបំណងដែលយើងត្រូវការ ដែលសុទ្ធសឹងតែជាមនោយិទ្ធិវិជ្ជមាន ឬមនោមយិទ្ធិអវិជ្ជមាន ពោលគឺផ្នែកល្អ ឬផ្នែកអាក្រក់។
មនុស្សដែលមានមនោមយិទ្ធិច្រើនរមែងមានការប្រាថ្នាអ្វីក៏ប្រាថ្នាយ៉ាងខ្លាំងក្លា សុខចិត្តយកជីវិតទៅប្តូរ ដើម្បីឲ្យបាននូវអ្វីដែលគេបានប្រាថ្នា។ ចំណែកឯមនុស្សដែលមានមនោមយិទ្ធិតិច ក៏តែងរារែកធ្វើអ្វីមិនសូវបានផលសម្រេច ឬធ្វើបានតែពាក្យកណ្តាលប៉ុននោះ។
ការហាត់អំណាចចិត្ត ឬមនោមយិទ្ធិឲ្យក្លាយទៅជាម្លាប់ គឺជាអ្វីដែលមានគុណតម្លៃបំផុតក្នុងជីវិតមនុស្ស ហើយមានភាពសំខាន់ខ្លាំងជាងការវ៉ឹកហាត់ចំណេះដឹង ឬវ៉ឹកហាត់ក្នុងផ្លូវផ្សេងទៀតទាំងអស់ ព្រោះផលសម្រេចគ្រប់យ៉ាងមានមនោមយិទ្ធិជាគ្រឹះ។ អ្នកដែលមាននោមយិទ្ធិ គឺជាមនុស្សមានប្រៀបលើអ្នកដទៃ ប្រៀបដូចជាមានកន្សែងបក់កន្សែងបោយអញ្ចឹង។
មធ្យោបាយវ៉ឹកហាត់មនោមយិទ្ធិមានដូចខាងក្រោម៖
១) វ៉ឹកហាត់តាំងក្តីប្រាថ្នានូវអ្វីដែលខ្លួនបានប៉ានស្មានថា អាចនឹងធ្វើទៅបានដោយកម្លាំងថ្វីដៃរបស់ខ្លួនឯងផ្ទាល់ ហើយតាំងចិត្តយ៉ាងជាក់លាក់ធ្វើកិច្ចការនេះឲ្យបានសម្រេច។ ហាត់ធ្វើញយៗដោយជ្រើសយកពីងាយទៅមុន ដូចជា៖ ការដើរដោយជើងនៅលើថ្នល់ សម្លឹងមើលផ្លាកសញ្ញាខាងមុខ ហើយតាំងចិត្តទៅឲ្យដល់ផ្លាកសញ្ញានោះ។ ការធ្វើដូច្នេះមើលទៅហាក់ដូចជាងាយស្រួសណាស់ ប៉ុន្តែវាអាចជួយក្នុងការវ៉ឹកហាត់ចិត្តឲ្យស៊ាំងនឹងផលសម្រេច ហើយកាលបើស៊ាំងញយៗ ក៏នឹងមានកម្លាំងកើនច្រើនឡើង។
២) គិតប៉ងធ្វើអ្វីមួយត្រូវធ្វើឲ្យបាន ពោលគឺត្រូវតាំងចិត្តធ្វើទាល់តែបានសម្រេច បើទោះជាមានឧបសគ្គច្រើនប៉ុនណាក៏ដោយ បើទោះជាត្រូវធ្វើដល់ទៅរាប់រយរាប់ពាន់ដង ក៏នៅតែព្យាយាមធ្វើទាល់តែបានសម្រេច។
៣) មិនយកកិច្ចការមកធ្វើម្តងច្រើនមុខព្រមគ្នាទេ គឺជ្រើសរើសធ្វើអ្វីតាមលំដាប់នៃភាពសំខាន់ ហើយព្យាយាមធ្វើដោយមានសមាធិ។
៤) ត្រូវសង្ឃឹមលើខ្លួនឯង ពឹងខ្លួនឯង និងជួយខ្លួនឯងគ្រប់ពេលវេលា ព្រមទាំងមានជំនឿជាក់លើខ្លួនឯង៕
ប្រភព៖ សៀវភៅការអភិវឌ្ឍខ្លួនឯង (ច័ន្ទ ឫទ្ធី)
© រក្សាសិទ្ធិដោយ thmeythmey.com
«នាំអាត» និង«នាំអាទិ៍»មួយណាត្រឹមត្រូវ?
1 សប្តាហ៍
