កីឡាជាតិ
ជាតិ
៥ រឿងដែលគួរឱ្យចាប់អារម្មណ៍ក្នុងពាន MCL 2015 សប្ដាហ៍ទី៧ នេះ
× ពានរង្វាន់បាល់ទាត់មិត្តហ្វូនខេមបូឌានលីក ២០១៥ (Metfone Cambodian League 2015) បានប្រកួតជម្រុះដល់សប្ដាហ៍ទី៧ ហើយក្នុងចំណោម ២២ សប្ដាហ៍ក្នុងវគ្គជម្រុះទាំង២ ជុំ។ អ្វីដែលគូរឱ្យកត់សម្គាល់នៅសប្ដាហ៍ទី៧ នេះមានរឿងគួរឱ្យចាប់អារម្មណ៍ជាងគេចំនួន ៥ ផ្សេងៗគ្នា។
១) បឹងកេតអង្គរ និង ភ្នំពេញក្រោន មិនទាន់ប្រទះបរាជ័យ៖ ក្រុមជើងឯកឆ្នាំចាស់ ភ្នំពេញក្រោន និង ក្រុមជើងឯករងឆ្នាំចាស់ បឹងកេតអង្គរ កំពុងបន្តដំណើរទៅមុខយ៉ាងរលូនដោយមិនទាន់ស្គាល់ពាក្យបរាជ័យនៅឡើយនោះទេ ហើយថែមទាំងមាន ១៩ ពិន្ទុច្រើនជាងគេតែខុសត្រង់គ្រាប់បាល់ចំណេញ។
៧ ប្រកួតមកនេះភ្នំពេញក្រោន បានប្រកួតស្មើបឹងកេត ០ ទល់ ០ ហើយយកឈ្នះណាហ្គាវើល ៤ ទល់ ២ បន្តឈ្នះខេមបូឌានថាយហ្គ័រ ៣ ទល់ ១ ឈ្នះអាស៊ីអឺរ៉ុបយូណាធីត ៦ ទល់ ១ ឈ្នះក្រសួងការពារជាតិ ២ ទល់ ០ ឈ្នះស៊ីម៉ាក់ ៤ ទល់ ១ និង ឈ្នះគីរីវង់សុខសែនជ័យ ៥ ទល់ ។ ចំណែក ក្រុមបឹងកេតអង្គរ វិញប្រកួតដំបូងស្មើគ្នាជាមួយភ្នំពេញក្រោន ឈ្នះខេមបូឌានថាយហ្គ័រ ៣ ទល់ ២ ឈ្នះក្រសួងការពារជាតិ ៣ ទល់ ០ ឈ្នះគីរីវង់សុខសែនជ័យ ១២ ទល់ ២ ឈ្នះបៀលប្រាយយូណាយធីត ១ ទល់ ០ ឈ្នះ ស្វាយរៀង ៥ ទល់ ១ និង ឈ្នះណាហ្គាវើល ១ ទល់ ០ ។
២) Bisan Goerge តាមទាន់ ចាន់ វឌ្ឍនាកា៖ មិនត្រឹមតែក្រុមទាំង២ ប្រជែងក្នុងតំបន់កំពូលតារាងនោះ សូម្បីតែខ្សែប្រយុទ្ធរបស់ក្រុមទាំងក៏ប្រជែងគ្នាក្នុងនាមជាអ្នកទាត់បាល់បញ្ចូលទីបានច្រើនជាងគេដែរ។ ខ្សែប្រយុទ្ធរបស់ Bisan Goerge របស់ក្រុមភ្នំពេញក្រោន រកគ្រាប់បាល់បាន ១១ គ្រាប់តាមស្មើកីឡាករ ចាន់ វឌ្ឍនាកា របស់បឹងកេតអង្គរ ដែរនៅត្រឹមសប្ដាហ៍ទី៧នេះ។ ១១ គ្រាប់របស់ Bisan ទាត់ចូលទីក្រុម ណាហ្គាវើល ២ គ្រាប់, អាស៊ីអឺរ៉ុបយូណាធីត ២ គ្រាប់, ខេមបូឌានថាយហ្គ័រ ២ គ្រាប់ ក្រសួងការពារជាតិ ១ គ្រាប់, ស៊ីម៉ាក់ ១ គ្រាប់ និង គីរីវង់សុខសែនជ័យ ៣ គ្រាប់។ ចំណែក ១១ គ្រាប់របស់ ចាន់ វឌ្ឍនាកា ទាត់ចូលទីក្រុម គីរីវង់សុខសែនជ័យ ៨ គ្រាប់, ក្រុមខេមបូឌានថាយហ្គ័រ ២ គ្រាប់ និង ស្វាយរៀង ១ គ្រាប់។
៣) ប្រាក់ មុន្នីឧត្តម រកគ្រាប់បាល់បានដំបូង៖ ប្រធានក្រុមជម្រើសជាតិយុវជនក្រោមអាយុ២៣ឆ្នាំរបស់កម្ពុជា (U-23) ក្នុងយុទ្ធនាការកីឡាស៊ីហ្គេមឆ្នាំ ២០១៥ នៅប្រទេសសិង្ហបុរី កន្លងទៅគឺ កីឡាករ ប្រាក់ មុន្នីឧត្តម ទើបតែរកគ្រាប់បាល់បាន ១ គ្រាប់ជាលើកដំបូងឱ្យក្រុមស្វាយរៀងអែហ្វស៊ី របស់ខ្លួនក្នុងពានរង្វាន់ MCL 2015 ក្រោយប្រកួតបាន ៧ លើកមកនេះ។ គ្រាប់បាល់របស់ ឧត្តម កើតមានឡើងក្នុងគ្រាប់បាល់ទី២ ដោយបាល់ពិន័យ ១១ ម៉ែត្រកាត់សេចក្ដី ក្នុងជំនួបរវាងក្រុមស្វាយរៀង ប្រកួតស្មើគ្នា ២ ទល់ ២ ជាមួយក្រុមខេមបូឌានថាយហ្គ័រ។
៤) គីរីវង់សុខសែនជ័យ នៅមិនទាន់ជួបពាក្យឈ្នះ៖ ក្រុមបាតតារាងគីរីវង់សុខសែនជ័យ ដែលមានមូលដ្ឋាននៅខេត្តតាកែវ នៅមិនទាន់ស្គាល់រសជាតិឈ្នះនៅឡើយទេក្រោយឆ្លងកាត់
៧ ប្រកួតមកនេះ។ គីរីវង់ បើកឆាកស្មើជាមួយក្រុមចំណូលថ្មីស៊ីម៉ាក់ ១ ទល់ ១ ក្រោយមកទៀតចាញ់ វេស្ទើនភ្នំពេញ ៦ ទល់០ ហើយចាញ់អគ្គស្នងការដ្ឋាននគរបាលជាតិ ៣ ទល់ ១ ចាញ់បឹងកេតអង្គរ ធ្ងន់ក ១២ ទល់ ២ ចាញ់ក្រុមខេមបូឌានថាយហ្គ័រ ៦ ទល់ ២ ចាញ់ក្រសួងការពារជាតិ ៥ ទល់ ១ និង ចាញ់ភ្នំពេញក្រោន ៥ ទល់ ២ ។ ទោះជាចាញ់យ៉ាងណាក៏ដោយ ក្រុមលោកគ្រូបង្វឹក ផាន់ ចាន់ផាត តែងតែទាត់ចូលទីគូប្រកួតគ្រប់ការប្រកួត។
៥) អគ្គស្នងការដ្ឋាននគរបាលជាតិ និង ណាហ្គាវើល ទាត់ចូលទីគេតិចជាងគេ៖ ក្រុមណាហ្គាវើល ដែលសំបូរទៅដោយខ្សែប្រយុទ្ធល្បីឈ្មោះក្នុងក្រុមជម្រើសជាតិកម្ពុជា និង ក្រុមអគ្គអគ្គស្នងការដ្ឋាននគរបាលជាតិ ជាក្រុមដែលទាត់បាល់ចូលទីគូប្រកួតបានតិចជាងគេ ដោយបានម្នាក់ ៩ គ្រាប់ប៉ុណ្ណោះក្នុងចំណោម ៧ ប្រកូតមកនេះ បើធៀបនឹងក្រុម ១០ ផ្សេងទៀតសុទ្ធតែអាចទាត់បញ្ជូលទីគូប្រកួតលើសពី ១០គ្រាប់ឡើងទៅ។
៩ គ្រាប់របស់ណាហ្គាវើល ទាត់ចូលទីក្រុមស្វាយរៀង ១ គ្រាប់ . ភ្នំពេញក្រោន ២ គ្រាប់, អាស៊ីអឺរ៉ុប ៣ គ្រាប់ និង ស៊ីម៉ាក់ ៣ គ្រាប់ ហើយ ៩ គ្រាប់របស់ក្រុមអគ្គស្នងការដ្ឋាននគរបាលជាតិ ទាត់ចូលទីក្រុមក្រសួងការពារជាតិ ១ គ្រាប់, ក្រុមគីរីវង់សុខសែនជ័យ ៣ គ្រាប់, ក្រុមបៀលប្រាយ ១ គ្រាប់ ក្រុមណាហ្គាវើល ២ គ្រាប់ និង ក្រុមអាស៊ីអឺរ៉ុប ២ គ្រាប់៕
© រក្សាសិទ្ធិដោយ thmeythmey.com