លោក នេត សាវឿន ប្រាប់ព្រឹទ្ធសភាទាក់ទងការចាប់ខ្លួន លោក ហុង សុខហួរ

ជាតិ

នយោបាយជាតិ

លោក នេត សាវឿន ប្រាប់ព្រឹទ្ធសភាទាក់ទងការចាប់ខ្លួន លោក ហុង សុខហួរ

15, Aug 2015 , 3:39 pm

រូបភាព

ដោយ: រួបរួម

លោក នេត សាវឿន អគ្គស្នងការនគរបាលជាតិ បានសរសរលិខិតមួយទៅកាន់លោក នៃ ប៉េណា ប្រធានស្តីទីព្រឹទ្ធសភា ដើម្បីរាយការណ៍ស្តីពីការឃាត់ខ្លួនលោក ហុង សុខហួរ សមាជិកព្រឹទ្ធសភា កាលពីវេលាម៉ោង៦ព្រឹកថ្ងៃទី១៥ ខែសីហា នេះ។

លោក នេត សាវឿន បានអះអាងថា ការឃាត់ខ្លួនលោក ហុង សុខហួរ ធ្វើឡើងក្នុងក្របខ័ណ្ឌនៃបទល្មើសជាក់ស្តែងស្របតាមនីតិវិធីព្រហ្មទណ្ឌ មាត្រា១០៤ថ្មីនៃរដ្ឋធម្មនុញ្ញ និងច្បាប់ស្តីពីលក្ខន្តិកៈសមាជិកព្រឹទ្ធសភាត្រង់មាត្រា១២ ។

ចំពោះអង្គហេតុនៃការឃាត់ខ្លួន អគ្គស្នងការនគរបាលជាតិ បានបញ្ជាក់ប្រាប់ប្រធានស្តីទីព្រឹទ្ធសភា លោក នៃ ប៉េណា ថា លោក ហុង សុខហួរ បានធ្វើការបកស្រាយខុសខ្លឹមសារដើមទាក់ទងនឹងសន្ធិសញ្ញាឆ្នាំ១៩៧៩ ដោយថា លោក ហេង សំរិន ដែលជាប្រមុខរដ្ឋនាពេលពេលនោះ បានចុះហត្ថលេខាជាមួយភាគីវៀតណាមលើកការឯកភាពគ្នារំលាយព្រំដែនរដ្ឋទាំងពីរ។ ការបកស្រាយរបស់លោក ហុង សុខហួរ ក្នុងឃ្លីបវីដេអូត្រូវបានបង្ហោះក្នុងទំព័រហ្វេសប៊ុករបស់ប្រធានគណបក្សសង្គ្រោះជាតិ លោក សម រង្ស៊ី (Sam Rainsy)។

លោក ហុង សុខហួរ ត្រូវបានសមត្ថកិច្ចចាប់ខ្លួន កាលពីវេលាម៉ោង៦ព្រឹកមិញនេះ នៅគេហដ្ឋានរបស់លោក យន្ត ថារ៉ូ ហើយត្រូវបានដឹកនាំទៅកាន់អគ្គស្នងការដ្ឋាននគរបាលជាតិ ដោយដាក់ខ្នោះដៃ។ នាវេលាម៉ោងជិត៣រសៀល ទើបសមត្ថកិច្ចបញ្ជូនទៅកាន់តុលាការរាជធានីភ្នំពេញដើម្បីធ្វើការសាកសួរ៕