អន្តរជាតិ
ប្រទេសជាច្រើនគាំទ្រសំណើបារាំងដើម្បីកំណត់ការប្រើសិទ្ធិវេតូក្នុងក្រុមប្រឹក្សាសន្តិសុខ
× កាលពីថ្ងៃពុធ ប្រទេសជាច្រើនបានចុះហត្ថលេខាលើសំណើរបស់បារាំងដើម្បីកំណត់ការប្រើប្រាស់សិទ្ធិវេតូរបស់សមាជិកអចិន្ត្រៃយ៍ទាំង៥ ក្នុងដំណើរការអនុម័តដំណោះស្រាយនានា ជាពិសេសចំពោះករណីសម្លាប់រង្គាល ប្រល័យពូជសាសន៍ជាដើម។ ប្រទេសប្រហែល ជា៧៥ មកពី អាមេរិកឡាទីន អឺរ៉ុប អាស៊ី និងអាហ្វ្រិក បានបង្ហាញការគាំទ្ររបស់ខ្លួនលើសំណើរបស់បារាំងចំពោះការប្រើប្រាស់សិទ្ធិវេតូ។
ថ្លែងទៅកាន់អ្នកយកព័ត៌មាន រដ្ឋមន្ត្រីការបរទេសបារាំងលោក Laurent Fabius បានលើកឡើងពីការប្ដេជ្ញាចិត្តរបស់ក្រុងប៉ារីសក្នុងការលុបបំបាត់ការសម្លាប់រង្គាលដូចដែលបានកើតឡើងក្នុងប្រទេសស៊ីរី។ លោកចង់បញ្ជាក់ថា បញ្ហានេះបានកើតឡើងក៏ដោយសារការប្រើប្រាស់សិទ្ធិវេតូក្នុងក្រុមប្រឹក្សាសន្តិសុខរបស់អង្គការសហប្រជាជាតិ។
លោកថា៖ «បារាំងដែលមានសិទ្ធិវេតូក្នុងដៃ តែបារាំងសម្រេចមិនប្រើសិទ្ធិនេះក្នុងដោះស្រាយបញ្ហាទាក់ទងនឹងការសម្លាប់រង្គាល ឫករណីប្រល័យពូជសាសន៍ទេ។ យ៉ាងណាក៏ដោយ ប្រទេសជាសមាជិកអចិន្ត្រៃយ៍ដែលមានសិទ្ធិវេតូ ដូចជា ចិន រុស្សី អាមេរិក និងអង់គ្លេស មិនបានគាំទ្រការផ្ដួចផ្ដើមនេះឡើយ»
យោងតាមសេចក្តីព្រាងសេចក្ដីថ្លែងការណ៍របស់បារាំង សមាជិកក្រុមប្រឹក្សាសន្តិសុខមិនគួរប្រើសិទ្ធិវេតូដើម្បីរារាំងដល់ដំណោះស្រាយទាំងឡាយណាដែលឈានដល់បញ្ចប់អំពើប្រល័យពូជសាសន៍។ សេចក្ដីព្រាងបានបញ្ជាក់ ទៀតថា សិទ្ធិវេតូមិនមែនជារបស់អ្នកណាទេ តែជាការទទួលខុសត្រូវលើជោគវាសនាពិភពលោកទាំងមូល។
ប្រទេសចិននិងរុស្សីបានប្រើប្រាស់សិទ្ធិវេតូរបស់ខ្លួនចំនួន៤ដងប្រឆាំងនឹងវិធានការរបស់ក្រុមប្រឹក្សាសន្តិសុខចំពោះករណីប្រទេសស៊ីរី។ ក្នុងនោះបីលើកប្រឆាំងការដាក់ទណ្ឌកម្មប្រឆាំងរដ្ឋាភិបាលប្រធានាធិបតីលោក បាសា អាល់អាសាដ និងមួយលើកប្រឆាំងដំណោះស្រាយដែលប៉ងបញ្ជូនរបបស៊ីរីទៅកាត់ទោសនៅតុលាការព្រហ្មទណ្ឌអន្តរជាតិ។
បើយោងតាម មន្ត្រីការទូតអង្គការសហប្រជាជាតិ ចក្រភពអង់គ្លេសគាំទ្រការផ្ដួចផ្ដើមរបស់បារាំង។ ឯសហរដ្ឋអាមេរិកបានបង្ហាញសញ្ញាវិជ្ជមាន ប៉ុន្តែរុស្សីនិងចិន បានបដិសេធការលើកឡើងនេះ។
សូមរម្លឹកថា ការគំនិតផ្ដួចផ្ដើមជាច្រើនសំដៅដល់ការកំណត់ការប្រើប្រាស់សិទិ្ធវេតូ ក្នុងចំណោមប្រទេសជាសមាជិកអចិន្ត្រៃយ៍ ខណៈមានការលើកឡើងថា សិទ្ធិវេតូមិនមែនប្រើសម្រាប់ផលប្រយោជន៍ពិភពលោកនោះទេ តែត្រូវបានប្រើសម្រាប់ការពារប្រទេសប្រព្រឹត្តបទឧក្រិដ្ឋនិងបញ្ហាដល់ពិភពលោកទៅវិញ៕
© រក្សាសិទ្ធិដោយ thmeythmey.com