ជាតិ
×![]()
ដោយ: តន ចាន់រិទ្ធារ៉ា
ព្រះមហាក្សត្រកម្ពុជា ព្រះបាទនរោត្តម សីហមុនី បានយាងដល់ទីក្រុងវ៉េ ហើយ ក្នុងដំណើរព្រះរាជទស្សនកិច្ចលំហែព្រះកាយរយៈពេល៤ថ្ងៃ ចាប់ពីថ្ងៃ១៩ដល់២២ ខែតុលា នៅសាធារណៈរដ្ឋសង្គមនិយមវៀតណាម តបតាមសំណើយាងពីសំណាក់លេខាបក្សកុំមុយនីសវៀតណាមលោក ង្វៀន ភូត្រុង Nguyen Phu Trong និងប្រធានាធិបតីលោក ទ្រឿង តាន់សាង (Truong Tan Sang)។
បន្ទាប់ពីយាងដល់ក្រុងវ៉េ នារសៀលថ្ងៃ១៩ តុលា ព្រះករុណា ព្រះមហាក្សត្រកម្ពុជា បានយាងជួបសវនាការជាមួយ ប្រធានាធិបតីវៀតណាមលោកទ្រឿង តាន់សាង។ ក្នុងជំនួបសវនាការនេះ ប្រធានាធិបតីវៀតណាមបានសម្ដែងការស្វាគមន៍ចំពោះព្រះរាជដំណើរបស់ព្រះមហាក្សត្រកម្ពុជា លើទឹកដីវៀតណាម។ លោកទ្រឿង តាន់សាង ក៏បានផ្ញើសេចក្តីសាកសួរសុខទុក្ខនិងថ្វាយព្រះពរពីសំណាក់លេខាបក្សកុំមុយនីសវៀតណាមលោកង្វៀន ភូត្រុង។
ជាមួយគ្នានេះ លោកទ្រឿង តាន់សាង ក៏បានបញ្ជាក់ដែរថា ព្រះរាជទស្សនកិច្ចនេះ ពិតជាបានបង្ហាញនូវការយកព្រះទ័យទុកដាក់របស់ព្រះមហាក្សត្រកម្ពុជាចំពោះការពង្រឹងមិត្តភាពជាប្រពៃណីដ៏យូរអង្វែងនៃប្រទេសទាំងពីរ ក៏ដូចជា ចំពោះប្រជាជននិងប្រទេសវៀតណាមផងដែរ។
លោកទ្រឿង ក៏បានរម្លឹកពីប្រពៃណីសាមគ្គីភាពនិងការគាំទ្រគ្នាទៅវិញទៅមករវាងប្រទេសទាំងពីរ ជាពិសេស ការជួយទំនុកបម្រុងពីសំណាក់ព្រះមហាវីរក្សត្រកម្ពុជាសម្ដេច នរោត្តម សីហនុនិងប្រជាជនកម្ពុជាចំពោះវៀតណាមក្នុងការទាមទារឯករាជនិងបង្រូមបង្រូមវៀតណាមទាំងពីរ។
ឆ្លៀតឱកាសនោះផងដែរ ប្រធានាធិបតីវៀតណាមបានគូសបញ្ជាក់ជាថ្មីថា បក្ស រដ្ឋ និងប្រជាជនវៀតណាម នឹងបន្តពង្រឹងមិត្តភាព សាមគ្គីភាព សហប្រតិបត្តិការជាបងប្អូនរវាងវៀតណាមនិងកម្ពុជាឱ្យកាន់តែរឹងមាំបន្ថែមទៀតពីព្រោះប្រទេសទាំងពីរមានជំហរដូចគ្នាចំពោះស្ថិរភាព ការអភិវឌ្ឍក្នុងតំបន់និងពិភពលោក។
ជាការឆ្លើយតប ព្រះមហាក្សត្រកម្ពុជា ទ្រង់បានសម្ដែងអំណររាជគុណចំពោះ បក្ស រដ្ឋាភិបាល និងប្រជាជនវៀតណាម ដែលតែងតែជួយដល់កម្ពុជាក្នុងគ្រប់កាលៈទេសៈ។ ព្រះមហាក្សត្រ ទ្រង់មានព្រះរាជបន្ទូលថា វៀតណាម គឺជាមិត្តល្អ និងជាអ្នកជិតខាងល្អ សម្រាប់ប្រជាជនកម្ពុជាទាំងមូល ហើយ ទ្រង់នឹងបន្តពូនជ្រុំមិត្តភាព សហប្រតិបត្តការល្អ ឱ្យកាន់តែខ្លាំងបន្ថែមទៀត ដើម្បីជាប្រយោជន៍យូរអង្វែងរបស់ប្រទេសទាំងពីរ។
ក្នុងព្រះរាជដំណើទស្សនកិច្ចនេះ ព្រះមហាក្សត្រកម្ពុជានឹងយាងទៅកាន់រមណីយដ្ឋានវប្បធម៌ប្រវត្តិសាស្ត្រមួយចំនួនក្នុងទីក្រុងវ៉េ ដែលជាអតីតរាជធានីបុរាណនិងទីក្រុងដាឡាត់ផងដែរ។
Tag:
ព្រះមហាក្សត្រ
© រក្សាសិទ្ធិដោយ thmeythmey.com
