អន្តរជាតិ
បក្សប្រឆាំងនៅកាណាដាឈ្នះឆ្នោតលើបក្សអភិរក្សដែលបានកាន់កាប់អំណាច៣អាណត្តិ
×![]()
ដោយ: តន ចាន់រិទ្ធារ៉ា
គណបក្សសេរីនិយម ដែលជាបក្សប្រឆាំងកាណាដា បានឈ្នះក្នុងការបោះឆ្នោតសភា លើគណបក្សអភិរក្សដែលបានកាន់អំណាចបីអាណត្តិ កាលពីថ្ងៃចន្ទម្សិលមិញ។ ប្រធានគណបក្សសេរីនិយម លោក Justin Trudeau នឹងក្លាយជានាយករដ្ឋមន្ត្រីថ្មី ជំនួសលោក Stephen Harper ជានាយករដ្ឋមន្ត្រីបច្ចុប្បន្ន ដែលមកពីគណបក្សអភិរក្សនិយម។
ក្រោយបញ្ចប់នៃការរាប់សន្លឹកឆ្នោត លទ្ធផលបានបង្ហាញឲ្យឃើញថា គណបក្សប្រឆាំង បានទទួលអាសនៈ១៨៣ ក្នុងចំណោមអាសនៈសរុប៣៣៨ ។ អាសនៈនេះ មានន័យថា បក្សប្រឆាំងបានទទួលសំឡេងលើសពីសំឡេងភាគច្រើន១៧០អាសនៈក្នុងសភារបស់កាណាដាទៅទៀត។ ចំណែកឯ គណបក្សអភិរក្សនិយមរបស់លោកនាយករដ្ឋមន្ត្រីHarperទទួលបាន១០៤អាសនៈ និងគណបក្សប្រជាធិបតេយ្យថ្មីដែលលំអៀងឆ្វេង ទទួលបាន៣៦អាសនៈ។
លោក Justin Trudeau ប្រធានគណបក្សសេរីបានប្រកាសពីជ័យជំនះរបស់ខ្លួន ចំពោះមុខអ្នកគាំទ្រជាច្រើននៅក្នុងក្រុងMontreal។ ក្នុងពិធីនោះលោកTrudeauបានថ្លែងថា៖ នេះជាសញ្ញាវិជ្ជមានសម្រាប់នយោបាយ។ ក្នុងនាមជាប្រធានគណបក្សឈ្នះឆ្នោតលោកTrudeauនឹងក្លាយជានាយករដ្ឋមន្ត្រីវ័យក្មេងរបស់កាណាដា ខណៈលោកមានអាយុត្រឹម៤៣ឆ្នាំ។
ដោយឡែក លោកHarperដែលនឹងត្រូវចាកចេញពីតំណែងបានអបអរសាទរជ័យជម្នះរបស់លោកTrudeau។ ក្នុងសុន្ទរកថាទៅកាន់អ្នកគាំទ្រ លោកក៏បានបញ្ជាក់ដែរថា នេះមិនមែនជាអ្វីដែលយើងចង់បាននោះទេ តែប្រជាជនចង់បាន។
ជ័យជម្នះបានបង្ហាញពីប្រជាប្រិយភាពរបស់លោកTrudeauបន្ទាប់ពីមានការរិះគន់ថាលោកមិនមានបទពិសោធន៍គ្រប់គ្រាន់សម្រាប់តំណែងនេះនៅឡើយ។ លោកTrudeauបានក្លាយជាសមាជិកសភាកាលពីឆ្នាំ២០០៨ បន្ទាប់មកក្លាយជាប្រធានគណបក្សសេរីនិយមនៅឆ្នាំ២០១៣ ។
គួររម្លឹកផងដែរថា កាលពីយុទ្ធនាការបោះឆ្នោត លោកTrudeauបានសន្យាដំឡើងពន្ធចំពោះអ្នកមាន បង្កើនការចំណាយលើហេដ្ឋារចនាសម្ព័ន្ធដើម្បីជំរុញល្បឿនសេដ្ឋកិច្ច និងជាពិសេសនោះគឺ ពង្រឹងទំនាក់ទំនងជាមួយសហរដ្ឋអាមេរិក៕
Tag:
កាណាដា
© រក្សាសិទ្ធិដោយ thmeythmey.com
