អន្តរជាតិ
នយោបាយអន្តរជាតិ
រុស្សីនិងអាមេរិកចុះកិច្ចព្រមព្រៀងប្រតិបត្តិការដែនអាកាសស៊ីរី បញ្ចៀសការប៉ះទង្គិចគ្នា
× រុស្សីនិងអាមេរិក ចុះកិច្ចព្រមព្រៀងប្រតិបត្តិការដែនអាកាសមួយដើម្បីបញ្ចៀសការប៉ះទង្គិចជាយថាហេតុរវាងយន្តហោះនៃប្រទេសទាំងពីរដែលធ្វើប្រតិបត្តិការនៅលើដែនអាកាសរបស់ស៊ីរី។ កិច្ចព្រមព្រៀងនេះសំដៅដល់ការចៀសវាងការប្រឈមមុខគ្នារវាងយន្តហោះនឹងយន្តហោះប្រសិនបើមានការប្រទះគ្នា អំឡុងពេលធ្វើប្រតិបត្តិការកម្ចាត់ក្រុមរដ្ឋឥស្លាម។
លោក មុំ ពិទូរ្យ លម្អិព័ត៌មាននេះ
កាលពីម្សិលមិញ មន្ទីរបញ្ចកោណសហរដ្ឋអាមេរិក បានបញ្ចេញនូវឯកសារមួយស្តីពីការប្រើប្រាស់ដែនអាកាសស៊ីរីរវាងអាមេរិកនិងរុស្សី។ ឯកសារនោះ គឺជាកិច្ចព្រមព្រៀងដែលមានឈ្មោះពេញថា « អនុស្សារណៈយោគយល់រួមគ្នារវាងក្រសួងការពាររុស្ស៊ីនិងអាមេរិក ស្តីពីការការពារឧប្បទ្ទវហេតុ និង ការផ្តល់សញ្ញាហោះហើរអំឡុងពេលនៃប្រតិបត្តិនៅ ស៊ីរី»។
បើតាមមន្ត្រីអាមេរិក អនុស្សារណៈដែលចុះហត្ថលេខាដោយមន្ត្រីយោធាប្រទេសទាំងពីរ យន្តហោះចំបាំងប្រទេសទាំងពីរ នឹងមិនធ្វើប្រតិបត្តិការក្នុងតំបន់តែមួយឬ ចម្ងាយជិតគ្នាលើដែនអាកាសស៊ីរីនោះទេ។
ការចុះហត្ថលេខា បានធ្វើឡើងក្រោយមានការប្រឈមមុខដាក់គ្នាជាច្រើនលើក ខណៈដែលយន្តហោះរុស្សីបើកការវាយប្រហារប្រឆាំងនឹងក្រុមរដ្ឋឥស្លាម។ រដ្ឋាភិបាលក្រុងមូស្គូលើកឡើងថា នេះជាការវាយប្រហារលើក្រុមរដ្ឋឥស្លាម ប៉ុន្តែបើគោលដៅវាយប្រហារភាគច្រើន គឺបានធ្លាក់លើទីតាំងរបស់ក្រុមឧទ្ទាមបះបោរប្រឆាំងនឹងប្រធានាធិបតីអាសាដទៅវិញ។
យ៉ាងណាក៏ដោយ អ្នកនាំពាក្យមន្ទីរបញ្ចកោណ លោក Peter Cook មិនបញ្ជាក់ឱ្យច្បាស់ថា យន្តហោះប្រទេសទាំងពីរ នឹងស្ថិតនៅចម្ងាយប៉ុន្មានពីគ្នានោះទេ។ លោកថា៖ អ្នកបើកបរយន្តហោះអាមេរិកគឺដឹងច្បាស់ពីរឿងនេះ។ បើតាមការអះអាងរបស់អ្នកនាំដដែល រុស្ស៊ី បានស្នើអាមេរិក មិនឱ្យបញ្ចេញឯកសារនេះជាសាធារណៈនោះទេ។
ចំណែកឯរុស្សីវិញ ក៏បានសម្តែងការសាទរលើកិច្ចព្រមព្រៀងនេះដែរ។ ក្នុងសេចក្ដីប្រកាសព័ត៌មានមួយ ក្រសួងការពារជាតិរុស្សីនិយាយថា នេះគឺជាជំហានវិជ្ជមានមួយ។ សេចក្ដីប្រកាសដដែលបន្តថា កិច្ចព្រមព្រៀងនេះពិតជាមានសារៈសំខាន់ណាស់។ ហើយ វានឹងជួយត្រួតពិនិត្យរាល់ការហោះហើរទាំងឡាយលើដែនអាកាសស៊ីរី។ យ៉ាងណាមិញ ក្រសួងការពាររុស្សីគូសបញ្ជាក់ថា កិច្ចព្រមព្រៀងនេះ នឹងមិនប៉ះពាល់ដល់ប្រតិបត្តិការបច្ចុប្បន្នរបស់ខ្លួនឡើយ។
គួរបញ្ជាក់ដែរថា កិច្ចព្រមព្រៀងនេះ មិនមែនគ្រាន់តែសំដៅការបញ្ចៀសការប្រឈមមុខដាក់គ្នារវាងយន្តហោះ និងគ្របដណ្ដប់តែលើប្រតិបត្តិការនានាលើដែនអាកាសរបស់ស៊ីរីតែប៉ុណ្ណោះនោះទេ តែវាក៏គ្របដណ្ដប់ដល់យន្តហោះចំបាំងមកពីប្រទេសដ៏ទៃដូចជា ទួរគី អារ៉ាប៊ី សាអ៊ូឌីត និងអារ៉ាប់រួមផងដែរ៕
© រក្សាសិទ្ធិដោយ thmeythmey.com