អន្តរជាតិ
លោក បាន គីមូន ព្រមានអ៊ីស្រាអែល ករណីប្រើកម្លាំងលើយុវជនប៉ាលេស្ទីន
× អគ្គលេខាធិការអង្គការសហប្រជាជាតិ លោក បាន គី មូន បានព្រមានអ៊ីស្រាអែលដែលបានប្រើកម្លាំងបង្ក្រាបលើបាតុកម្មរបស់ក្រុមយុវជនប៉ាលេស្ទីន ខណៈកម្ដៅហិង្សាកាន់តែពុះកញ្ជ្រោលរវាងអ៊ីស្រាអែលនិងប៉ាលេស្ទីន។ ការព្រមានរបស់លោកបាន គីមូន បានធ្វើឡើងក្នុងដំណើទស្សនកិច្ចរបស់លោកទៅកាន់អ៊ីស្រាអែល។
កាលពីម្សិលមិញ ក្នុងជំនួបជាមួយជាមួយនាយករដ្ឋមន្ត្រីអ៊ីស្រាអែលលោក បេនចាមីន នេតាន់យាហ៊ូ ប្រមុខអង្គការសហប្រជាជាតិលោក បាន គីមូន បានថ្លែងការណ៍ប្រឆាំងនឹងការប្រើប្រាស់កម្លាំងដើម្បីដោះស្រាយបញ្ហាដែលកំពុងកើតឡើងរវាងអ៊ីស្រាអែលនិង ប៉ាលេស្ទីន។ លោក បានព្រមានពីការរីករាលដាលនៃជម្លោះដែលអាចឈានដល់ដំណាក់កាលជម្លោះសាសនាក្នុងតំបន់ និងទទូចឱ្យមានការខិតខំដោះស្រាយបញ្ហាក្ដៅគគុកនេះ។
‹‹ការប្រើប្រាស់កម្លាំង អាចនឹងនាំឱ្យមានផលវិបាកត្រលប់មកវិញ ជាពិសេស វានឹងដុតកំដៅឱ្យកាន់តែក្ដៅ និងធ្វើឱ្យហិង្សាកើតកាន់តែច្រើន›។ នេះជាសម្ដីរបស់លោក បាន គីមូន ដែលថ្លែងទៅកាន់ក្រុមអ្នកសារព័ត៌មាន។ លោក បាន គីមូន ព្រមានដូច្នេះក្រោយពេលអ៊ីស្រាអែល បានប្រើកងកម្លាំងរបស់ខ្លួនបង្ក្រាបលើក្រុមយុវជនជាតិប៉ាលេស្ទីនដោយហិង្សា កាលពីពេលថ្មីៗនេះ។
វីឌីអូជាច្រើនត្រូវបានបង្ហោះលើបណ្ដាញសង្គម បង្ហាញពីសកម្មភាពបាញ់ប្រហាររបស់កងទ័ពអ៊ីស្រាអែលលើយុវជនប៉ាលេស្ទីន។ ហើយ ការប្រើប្រាស់កម្លាំងនេះ ក៏បានរងការរិះគន់យ៉ាងខ្លាំងៗពីសំណាក់សហគមន៍អន្តរជាតិផងដែរ។
យ៉ាងណាក៏ដោយ លោកនេតាន់យ៉ាហ៊ូ បានបដិសេធចោលការចោទប្រកាន់ទាំងនេះ។ លោកនិយាយថា អ៊ីស្រាអែល គ្រាន់តែតបតដើម្បីការពារប្រជាជនខ្លួនតែប៉ុណ្ណោះ ហើយយើងមិនបានប្រើប្រាស់កម្លាំងហួសហេតុនោះទេ។ លើសពីនេះទៅទៀតលោក ក៏បានចោទប្រកាន់ប្រធានាធិបតីប៉ាលេស្ទីន ជាអ្នកនៅពីក្រោយអំពើហិង្សាដែលប្រឆាំងនឹងអ៊ីស្រាអែល។
ជំនួសការចោទប្រកាន់ដោយអគ្គលេខាធិការអង្គការសហប្រជាជាតិ លោក នាយករដ្ឋមន្ត្រី អ៊ីស្រាអែល បានលើកបញ្ហាមួយចំនួនដែលបង្កឡើងដោយយុវជនប៉ាលេស្ទីនមកលើ អ៊ីស្រាអ៊ែលវិញ។ ‹‹ខ្ញុំជឿថា វាដល់ពេលដែលយើងត្រូវនិយាយការពិតពីមូលហេតុនៅពីក្រោយការវាយប្រហារភេវរកម្មរបស់ជនជាតិប៉ាលេស្ទីន។ វាមិនមែនជាការដោះស្រាយបញ្ហា ឬដំណើរការសន្តិភាពអ្វីទាំងអស់។ វាជាចេតនាក្នុងការកម្ទេចរដ្ឋអ៊ីស្រាអែល›។ នេះជាការលើកឡើងរបស់នាយករដ្ឋមន្ត្រីអ៊ីស្រាអែលលោក បេនចាមីន នេតាន់យាហ៊ូ៕
Tag:
បាន គីមូន
អ៊ីស្រាអែល
© រក្សាសិទ្ធិដោយ thmeythmey.com