អន្តរជាតិ
នយោបាយអន្តរជាតិ
នាយករដ្ឋមន្ត្រីថ្មីវ័យក្មេងកាណាដាប្រកាសដកទ័ពចេញពីសម្ពន្ធ័យោធាអាមេរិកនៅស៊ីរីនិងអ៊ីរ៉ាក់
× លោកនាយករដ្ឋមន្ត្រីថ្មីកាណាដា ប្រកាសដកកម្លាំងរបស់ខ្លួនចេញពីប្រតិបត្តិការកម្ទេចក្រុមរដ្ឋឥស្លាមនៅប្រទេសស៊ីរី និង អីរ៉ាក់ ។ សេចក្តីប្រកាស នេះ ធ្វើឡើងក្រោយតែមួយថ្ងៃប៉ុណ្ណោះ ដែលនាយករដ្ឋមន្ត្រីលោក Justin Trudeau បានប្រកាសពីជ័យជម្នះពីការបោះឆ្នោតសភា។
កាលពីថ្ងៃម្សិលមិញនេះ នាយករដ្ឋមន្ត្រីវ័យក្មេងថ្មីនៃកាណាដាលោកJustin Trudeau បានប្រាប់ប្រធានាធិបតីអាមេរិកលោកបារ៉ាក់ អូបាម៉ា ពីផែនការនៃការដកទ័ពរបស់ខ្លួនដែលចូលរួមប្រឆាំងនឹងក្រុមរដ្ឋឥស្លាមនៅក្នុងទឹកដីស៊ីរី និង អ៊ីរ៉ាក់។ ការដកប្រតិបត្តិការនេះ គឺជាការដកយន្តហោះទម្លាក់គ្រាប់បែកត្រលប់មកវិញ តែនឹងរក្សាទុកនូវប្រតិបត្តិការផ្ដល់ជំនួយមនុស្សធម៌និង ការហ្វឹកហ្វឺនបន្តទៀត។
គួរកត់សម្គាល់ដែលថា បន្ទាប់ពីការបោះឆ្នោតកាណាដាបានបញ្ចប់កាលពីប៉ុន្មានថ្ងៃកន្លងទៅនេះ រដ្ឋាភិបាលក្រុងវ៉ាស៊ិនតោន បានសម្តែងការសង្ឃឹម ថា រដ្ឋាភិបាលថ្មីកាណាដា នឹងបន្តចូលរួមជាមួយកងកម្លាំងចម្រុះដែលនាំមុខដោយអាមេរិកដើម្បីប្រឆាំងក្រុមរដ្ឋឥស្លាមបន្តទៀត។
ជុំវិញការដកទ័ពចេញរបស់កាណាដានេះដែរ មិនបានធ្វើសហរដ្ឋអាមេរិកប្រតិកម្មនោះទេ តែរដ្ឋទាំងពីរ នឹងបន្តកិច្ចសហប្រតិបត្តិការរួមគ្នាទៅទៀត។ ‹‹ខ្ញុំបាននិយាយជាមួយប្រធានាធិបតីអូបាម៉ា។ គាត់យល់ពីការសម្រេចចិត្តរបស់ខ្ញុំចំពោះរឿងនេះ›› នេះជាសម្ដីលោក Trudeau ប្រាប់ដល់អ្នកសារព័ត៌មានលើការសន្ទនារបស់លោកជាមួយនឹងប្រធានាធិបតីអាមេរិក លោកប៉ារ៉ាក់ អូប៉ាម៉ា។
សូមរម្លឹកផងដែរថា កាលពីយុទ្ធនាការស្វែងរកសំឡេងឆ្នោត លោកនាយករដ្ឋមន្ត្រីវ័យ៤៣ឆ្នាំដែលជាកូនប្រុសអតីតនាយករដ្ឋមន្ត្រីកាណាដាផងដែរនោះ បានសន្យាថា លោកនឹងដកត្រលប់មកវិញនូវកងកម្លាំងយន្តហោះរបស់កាណាដា ព្រមទាំងបញ្ចប់ប្រតិបត្តិការប្រយុទ្ធក្នុងស៊ីរីនិងអីរ៉ាក់។ នេះមានន័យថា លោកនាយករដ្ឋមន្ត្រីថ្មីកាណាដា កំពុងតែអនុវត្តជំហានដំបូងរបស់ខ្លួនទៅនឹងអ្វីដែលខ្លួនបានសន្យាក្នុងយុទ្ធនាការបោះឆ្នោត។
សូមបញ្ជាក់ដែរថា លោកJustin Trudeau ទើបតែដឹកនាំគណបក្សសេរីនិយមរបស់លោក ឈ្នះការបោះឆ្នោតសភាភ្លូកទឹកភ្លូកដីលើបក្សអភិរក្សដែលជាបក្សកាន់អំណាចដែលកាន់អំណាចបីអាណត្តិ និង បានក្លាយជានាយករដ្ឋមន្ត្រីវ័យក្មេងរបស់ប្រទេសកាណាដា។ ក្នុងអាណត្តិរបស់លោក លោកបានសន្យានាំមកការផ្លាស់ប្ដូរសម្រាប់ប្រទេស និង ប្រជាជនកាណាដាទៀតផង៕
© រក្សាសិទ្ធិដោយ thmeythmey.com