លោក ពូទីនប្រាប់អាសាដថា វាសនាប្រទេសស៊ីរីនៅក្នុងដៃប្រជាជនស៊ីរីខ្លួនឯង

អន្តរជាតិ

នយោបាយអន្តរជាតិ

លោក ពូទីនប្រាប់អាសាដថា វាសនាប្រទេសស៊ីរីនៅក្នុងដៃប្រជាជនស៊ីរីខ្លួនឯង

22, Oct 2015 , 9:37 am

រូបភាព

ដោយ: តន ចាន់រិទ្ធារ៉ា

ប្រធានាធិបតីស៊ីរីលោក បាសា អាល់អាសាដ បានធ្វើទស្សនកិច្ចទៅកាន់ប្រទេសរុស្សី ដោយបង្កការភ្ញាក់ផ្អើលយ៉ាងខ្លាំង។ នេះគឺជាដំណើរទៅកាន់បរទេសលើកទីមួយរបស់លោកអាសាដ តាំងពីកើតសង្គ្រាម ឆ្នាំ២០១១ ។ លោកបានអរគុណរុស្សីដែលបានចូលអន្តរាគមន៍ក្នុងស៊ីរី ។ឯលោក ពូទីន បានកោតសរសើរប្រជាជនស៊ីរីតែលោកសង្កត់ធ្ងន់ថា ជោគវាសនាស៊ីរីស្ថិតក្នុងដៃរបស់ប្រជាជនស៊ីរីខ្លួនឯងប៉ុណ្ណោះ។

កាលពីថ្ងៃអង្គារកន្លងទៅនេះ លោកបាសា អាល់អាសាដ បានធ្វើដំណើរដោយកម្រនិង ភា្ញក់ផ្អើលមួយទៅកាន់ទីក្រុងមូស្គូ ហើយលោកបានជួបជាមួយប្រធានាធិបតីរុស្សីលោក វ្ល៉ាឌីមៀ ពូទីន នៅឯវិមានក្រេមឡាំង។ លោកអាសាដ បានថ្លែងអំណរគុណដល់លោក ពូទីន ដែលបានសម្រេចធ្វើអន្តរាគមន៍យោធាក្នុងទឹកដីស៊ីរីដើម្បីកម្ចាត់ក្រុមភេរវជន។

ចំណែកឯ លោកពូទីន វិញបានលើកឡើង និងសរសើរការតស៊ូរបស់ប្រជាជនស៊ីរី។ លោកបន្ថែមថា ប្រជាជនស៊ីរីបានតស៊ូយ៉ាងប្ដូរផ្ដាច់នឹងក្រុមភេវរជនអស់ជាច្រើនឆ្នាំមកហើយ។ ក្នុងកិច្ចពិភាក្សាជាមួយសមភាគីស៊ីរី លោក ពូទីន ក៏បានបញ្ជាក់ទៀតថា ទោះបីជាយ៉ាងណាក៏ដោយ ការសម្រេចចិត្តលើជោគវាសនារបស់ប្រទេស គឺស្ថិតនៅលើដៃរបស់ប្រជាជនស៊ីរីតែមួយគត់។

សូមរម្លឹកផងដែរថា នេះគឺជាដំណើរទស្សនកិច្ចលើកដំបួងរបស់លោកអាសាដទៅបរទេស ចាប់តាំងពីមានចលនា បះបោរក្នុងឆ្នាំ២០១១ ហើយដំណើរទស្សនកិច្ច កើតឡើងតែ៣សប្តាហ៍ប៉ុណ្ណោះក្រោយអន្តរាគមន៍តាមអាកាសរបស់រុស្សីចូលក្នុងប្រទេសរបស់លោក។

យ៉ាងណាក៏ដោយ ទស្សនកិច្ចនេះមិនត្រូវបានទម្លាយឱ្យដឹងទេ ប៉ុន្តែនៅព្រឹកម្សិលមិញនេះ មានការចេញផ្សាយវីដេអូនៃជំនួបមេដឹកនាំទាំងពីរនៅឯវិមានក្រេមឡាំង។ គេមិនទាន់ដឹងច្បាស់ទេថា ប្រធានាធិបតីស៊ីរីបន្តស្ថិតនៅក្នុងរុស្សីឬយ៉ាងណានោះទេ។

ក្នុងជំនួបនោះលោកអាសាដបានបង្ហាញតួនាទីដ៏សំខាន់របស់រុស្សីក្នុងតំបន់មជ្ឈិមបូព៌ា។ លោកថ្លែងប្រាប់សមភាគីរុស្ស៊ីថា ប្រសិនបើគ្មានជំនួយរបស់រុស្សីទេ ភេរវជននឹងកាន់តែខ្លាំងជាក់ជាមិនខាន ហើយពួកគេនឹងពង្រីកខ្លួនកាន់តែធំក្នុងតំបន់។ ជាទូទៅ របបលោកអាសាដ តែងតែចាត់ទុកក្រុមឧទ្ទាមបះបោរ គឺជាក្រុមភេវរជន ហើយរុស្សីតែងចោទប្រកាន់លោកខាងលិចថា ប្រឹងជួយតែក្រុមឧទ្ទាម ហើយមិនវាយប្រហារលើក្រុមរដ្ឋឥស្លាមនោះទេ៕

គួរបញ្ជាក់ដែរថា រុស្សីបានអន្តរាគមន៏ដោយប្រើយោធានៅស៊ីរី ដើម្បីកម្ចាត់ក្រុមរដ្ឋឥស្លាម តែទទួលរងការរិះគន់ពីសំណាក់លោកខាងលិច ថាជាការជួយរបបលោកអាសាដទៅវិញ។ ប្រតិបត្តិការនេះបានវាយប្រហារចំលើគោលដៅក្រុមរដ្ឋឥស្លាមជាច្រើនក្នុងប្រទេសស៊ីរី ហើយថែមទាំងត្រូវចំទីតាំងក្រុមឧទ្ទាមប្រឆាំងលោកអាសាដទៀតផង៕