អន្តរជាតិ
នយោបាយអន្តរជាតិ
លោក មូហ្កាបេ មេដឹកនាំផ្ដាច់ការវ័យ៩១ឆ្នាំទទួលពានរង្វាន់សន្តិភាពខុងជឺចិន
×![]()
ដោយ: តន ចាន់រិទ្ធារ៉ា
មេដឹកនាំផ្ដាច់ការស៊ីមបាវ៉េ លោក រ៉ូប៊ឺត មូហ្កាបេ បានជាប់ឈ្មោះជាជ័យលាភីសម្រាប់ពានរង្វាន់ខុងជឺ ដែលជាទូទៅត្រូវបានគេស្គាល់ថាជាពានរង្វាន់ណូបែលសន្តិភាពរបស់ចិន។ ពានរង្វាន់នេះត្រូវបានបង្កើតឡើងនៅឆ្នាំ២០១០ ។
ប្រធានាធិបតីផ្ដាច់ការរបស់ស៊ីមបាវ៉េលោក រ៉ូប៊ឺត មូហ្កាបេ ដែលគ្រប់គ្រងប្រទេសអស់រយៈពេល២៨ឆ្នាំ បានជាប់ជាជ័យលាភីពានរង្វាន់សន្តិភាពខុងជឺ ពីស្ថាប័នមួយឈ្មោះថាគណៈកម្មាធិការពានរង្វាន់សន្តិភាពខុងជឺ ដែលមានមូលដ្ឋាននៅក្រុងហុងកុងប្រទេសចិន។
មានការរិះគន់ជាច្រើនចំពោះការផ្ដល់ពានរង្វាន់នេះដល់លោកមូហ្កាបេ។ នេះក៏ព្រោះតែការគ្រប់គ្រងបែបផ្ដាច់ការនិងសាហាវឃោរឃៅដែលបានកើតឡើងក្រោមអំណាចផ្ដាច់មុខរបស់បុរសវ័យ៩១ឆ្នាំរូបនេះ។ ក្រោមការដឹកនាំរបស់លោកមូហ្កាបេ ស៊ីមបាវ៉េបានធ្លាក់ចូលក្នុងភាពច្របូកច្របល់ពោរពេញដោយការភ័យខ្លាច។ មនុស្សជាច្រើនដែលប្រឆាំងនឹងលោក តែងត្រូវបានធ្វើទុក្ខបុកម្នេញឬរងនូវការសម្លាប់ មិនតែប៉ុណ្ណោះ សេដ្ឋកិច្ចបានដាំក្បាលចុះ ហើយអតិផរណាកើនកាន់ខ្ពស់។
ប៉ុន្តែជាមួយការផ្ដល់ជ័យលាភីនេះ គណៈកម្មាធិការពានរង្វាន់សន្តិភាពខុងជឺហាក់ដូចជាមានលក្ខខណ្ឌដោយឡែកពីពានរង្វាន់ដ៏ទៃ ក្នុងការជ្រើសរើសបេក្ខភាពសម្រាប់ពានរង្វាន់របស់ខ្លួន។
ពានរង្វាន់សន្តិភាពខុងជឺនេះ ត្រូវបានបង្កើតឡើងក្នុងគោលបំណងដើម្បីជំរុញឱ្យមានសន្តិភាពក្នុងពិភពលោក។ បើតាមនាយកគណៈកម្មាធិការនេះ លោក Tan Changliu បានឱ្យដឹងថា ចិនជាប្រទេសទទួលឥទ្ធិពលពីទស្សនៈខុងជឺដែលផ្ដោតលើសន្តិភាព ដូច្នេះយើងចង់ឱ្យមានសន្តិភាពនៅជុំវិញពិភពលោក។
ចាប់តាំងពីបង្កើតកាលពី៥ឆ្នាំមុន មានមេដឹកនាំល្បីៗជុំវិញពិភពលោក បានជាប់ជាបេក្ខភាពពានរង្វាន់សន្តិភាពខុងជឺ។ មេដឹកនាំទាំងនោះមាន ប្រធានាធិបតីរុស្សីលោកវ្ល៉ាឌីមៀរ ពូទីន អតីតប្រធានាធិបតីគុយបាលោកហ្វីដែល កាស្ត្រូ រួមទាំងអតីតអគ្គលេខាធិការអង្គការសហប្រជាជាតិលោកកូហ្វី អាណាន់ផងដែរ៕
Tag:
មូហ្កាបេ
© រក្សាសិទ្ធិដោយ thmeythmey.com
