អន្តរជាតិ
នយោបាយអន្តរជាតិ
កងកម្លាំងអាមេរិក និងអ៊ីរ៉ាក់ រំដោះអ្នកទោសជាច្រើននាក់ពីគុកក្រុមរដ្ឋឥស្លាម
× បើយោងតាមមន្ត្រីសហរដ្ឋអាមេរិក កងកម្លាំងពិសេសរបស់អាមេរិកនិងអ៊ីរ៉ាក់បានវាយឆ្មក់លើគុកមួយកន្លែងរបស់ក្រុមរដ្ឋឥស្លាមដោយនៅឯតំបន់ហាវីចា(Hawija) ភាគខាងជើងប្រទេសអ៊ីរ៉ាក់។ ក្នុងការវាយឆ្មក់នោះ បានជួយរំដោះអ្នកទោសជាច្រើននាក់ ប៉ុន្តែទាហានអាមេរិកម្នាក់បានស្លាប់។
លោក រឿន ភារុន រាយការណ៍ព័ត៌មានលម្អិត៖
ក្នុងសេចក្ដីប្រកាសមួយដែលបានចេញកាលពីថ្ងៃម្សិលមិញនេះ មន្ត្រីក្នុងមន្ទីរបញ្ចកោណបាននិយាយថា កងកម្លាំងអាមេរិកដែលបានសហការជាមួយកងទ័ពអ៊ីរ៉ាក់ បានធ្វើប្រតិបត្តិការវាយឆ្មក់លើមូលដ្ឋានមួយរបស់ក្រុមរដ្ឋឥស្លាមនៅតំបន់ភាគខាងជើងនៃប្រទេស។ រឿងដែលគួរឲ្យសាទរនោះ អ្នកទោសដែលភាគច្រើនជាទាហាននិងប្រជាជនស្លូតត្រង់ ដែលត្រូវបានក្រុមរដ្ឋឥស្លាមឃុំខ្លួន និងកំពុងរង់ចាំថ្ងៃប្រហារជីវិតត្រូវបានរំដោះចេញក្នុងប្រតិបត្តិការនេះ។
សេចក្ដីប្រកាសដដែលបន្តថា ក្រុមសកម្មជនរដ្ឋឥស្លាមមួយចំនួន ត្រូវបានសម្លាប់ តែជាអកុសល ទាហានអាមេរិកម្នាក់បានបាត់បង់ជីវិតក្នុងការវាយឆ្មក់នោះផងដែរ។ ហើយនេះ គឺជាទាហានរបស់អាមេរិកទីមួយដែលបានស្លាប់ ចាប់តាំងពីការចាប់ផ្ដើមយុទ្ធនាការប្រឆាំងក្រុមរដ្ឋឥស្លាមក្នុងប្រតិបត្តិការនៅអ៊ីរ៉ាក់ ដែលបានធ្វើឡើងអស់រយៈពេលប្រមាណមួយឆ្នាំមកហើយនោះ។
តាមប្រភពជាច្រើន ប្រតិបត្តិការវាយឆ្មក់អាចធ្វើឡើងដោយមានការស្នើសុំរបស់រដ្ឋាភិបាលអ៊ីរ៉ាក់។ មកទល់ពេលនេះមានឧទ្ធម្ភាគចក្រជាច្រើនគ្រឿងបានឃើញហោះហើរនៅតំបន់នៃការវាយឆ្មក់ដែលស្ថិតក្នុងតំបន់ជនជាតិឃើដហើយកំពុងត្រួតត្រាដោយក្រុមរដ្ឋឥស្លាម។
សូមរម្លឹកផងដែរថា ការវាយប្រយុទ្ធគ្នាកាលពីអំឡុងរដូវក្ដៅ ក្នុងឆ្នាំ២០១៤ ក្រុមជ្រុលនិយមរដ្ឋឥស្លាមបានកាន់កាប់ផ្នែកជាច្រើននៅអ៊ីរ៉ាក់ ដោយរួមទាំងតំបន់ភាគខាងជើងរបស់ពួកឃើដ។ ក្រុមនេះបានចាប់ខ្លួនមនុស្សជាច្រើន ជាពិសេសជនជាតិឃើដ ដើម្បីជំរឹតទារប្រាក់ដើម្បីជាថ្នូរនឹងការដោះលែង ខណៈអ្នកទោសជាច្រើននាក់ទៀតត្រូវបានសម្លាប់។
គួរបញ្ជាក់ដែរថា តំបន់ហាវីចា (Hawija) គឺជាមូលដ្ឋានដ៏រឹងមាំរបស់ក្រុមសកម្មប្រយុទ្ធរដ្ឋឥស្លាមដែលដណ្ដើមបានពីជនជាតិឃើដ។ ទីតាំងនេះត្រូវបានប្រើជាកន្លែងវាយប្រហារបកលើកងកម្លាំងអ៊ីរ៉ាក់ និងជាកន្លែងឃុំអ្នកទោសផងដែរ៕
© រក្សាសិទ្ធិដោយ thmeythmey.com