អន្តរជាតិ
នយោបាយអន្តរជាតិ
សមាជិក១៩១នៃUNគាំទ្របញ្ចប់ការហ៊ុមពទ្ធ័សេដ្ឋកិច្ចគុយបា ខណៈអាមេរិកជំទាស់
×![]()
ដោយ: តន ចាន់រិទ្ធារ៉ា
ប្រទេសចំនួន១៩១ក្នុងចំណោម១៩៣ដែលជាសមាជិកអង្គការសហប្រជាជាតិ បានបោះឆ្នោតគាំទ្រលើសេចក្ដីសម្រេចមួយសំដៅដល់ការបញ្ចប់ការហ៊ុមព័ទ្ធសេដ្ឋកិច្ចលើប្រទេសគុយបា។ ប៉ុន្តែសហរដ្ឋអាមេរិកនិងអ៊ីស្រាអែល បានបោះឆ្នោតជំទាស់នឹងសេចក្ដីសម្រេចនេះ។ 
កាលពីថ្ងៃទី២៧ម្សិលមិញ រដ្ឋសមាជិកអង្គការសហប្រជាជាតិចំនួន១៩១ បានបោះឆ្នោតយល់ព្រមលើសេចក្ដីសម្រេចរបស់មហាសន្និបាត ដើម្បីស្នើឱ្យអាមេរិកបញ្ចប់ការហ៊ុមព័ទ្ធរបស់ខ្លួនលើគុយបាដែលបានធ្វើអស់ជាច្រើនទសវត្សរ៍មកហើយ ខណៈដែលមានតែអាមេរិកនិង អ៊ីស្រាអែលប៉ុណ្ណោះ បោះឆ្នោតជំទាស់។ យ៉ាងណាក៏ដោយ សេចក្ដីសម្រេចនេះមិនមានអំណាចចាប់បង្ខំឱ្យអនុវត្តនោះទេ។
រយៈពេលចុងក្រោយនេះ អាមេរិកបានសម្រួលទំនាក់ទំនងការទូតជាមួយគុយបាដោយបានបើកដំណើរការស្ថានទូតរបស់ខ្លួនទៅវិញទៅមក។ ជាមួយគ្នានេះលោកប្រធានាធិបតីអូបាម៉ា ក៏បានជំរុញឱ្យមានការលើកលែងការហ៊ុមព័ទ្ធសេដ្ឋកិច្ចផងដែរ។ ប៉ុន្តែ មានបញ្ហាប្រឈមមួយចំនួននោះគឺ ការសម្រេចចុងក្រោយនៃការបញ្ចប់ការហ៊ុមពទ្ធ័ គឺស្ថិតក្នុងដៃរដ្ឋសភាអាមេរិកដែលគ្រប់គ្រងដោយក្រុមសាធារណរដ្ឋ។
យ៉ាងណាក៏ដោយ សេចក្តីសម្រេចនៃការដកការឡោមពទ្ធ័អាចនិយាយបានថាជាជោគជ័យ មួយរបស់គុយបាដែលតែងតែស្នើឱ្យមានការលើកលែងការហ៊ុមព័ទ្ធនេះ។ ជុំវិញបញ្ហានេះ រដ្ឋមន្ត្រីការបរទេសគុយបាលោកBruno Rodriguez បានអបអរសាទរលើការសម្រេចនេះ ហើយ លោក ក៏បានស្នើឱ្យរដ្ឋសភាអាមេរិកធ្វើការសម្រេចមួយដែលសមស្របទៅនឹងសេច ក្តីសម្រេចរបស់មហាសន្និបាតអង្គការសហប្រជាជាតិដែរ។
មានប្រទេសមួយចំនួនទៀត ក៏បានសាទរការសម្រេចនេះផងដែរ។ ក្នុងនោះតំណាងប៉ារ៉ាហ្កាយ បានលើកឡើងថា វាដល់ពេលសម្រាប់ការបញ្ចប់ការឡោមហ៊ុមព័ទ្ធនេះហើយ។ ឯប្រទេសអ៊ីរ៉ង់វិញដែលជាតំណាងចលនាមិនចូលបក្សសម្ជ័ន្ធ បញ្ជាក់ដែរថា ការបន្តការហ៊ុមព័ទ្ធនឹងធ្វើឱ្យរាំងស្ទះដល់ការអភិវឌ្ឍន៍របស់គុយបា។
គួរបញ្ជាក់ដែរថា រដ្ឋាភិបាលអាមេរិក បានដាក់ការហ៊ុមព័ទ្ធផ្នែកសេដ្ឋកិច្ចលើប្រទេសគុយបា បន្ទាប់ពីការឡើងកាន់អំណាចរបស់មេដឹកនាំបដិវត្តលោក Fidel Castroនៅឆ្នាំ១៩៦០ ដែលគិតទៅមានរយៈពេល៥៥ឆ្នាំមកហើយ។ កាលពីឆ្នាំ២០១៤ លោកប្រធានាធិបតីអូបាម៉ា បានប្រកាសការសម្រួលទំនាក់ទំនងឡើងវិញជាមួយគុយបា ហើយលោកក៏បានផ្លាស់ប្តូរគោលនយោបាយរឹងត្អឹងរបស់អាមេរិកចំពោះគុយបាមួយចំនួនផងដែរ៕
Tag:
un
© រក្សាសិទ្ធិដោយ thmeythmey.com
