អន្តរជាតិ
នយោបាយអន្តរជាតិ
លោកស្រី Bhandari ក្លាយជាប្រធាធិបតីស្ត្រីទី១ក្នុងប្រវត្តិសាស្ត្រនេប៉ាល់
×![]()
ដោយ: តន ចាន់រិទ្ធារ៉ា
សភានេប៉ាល់ បានបោះឆ្នោតជ្រើសរើសប្រធានាធិបតីស្ត្រីជាលើកដំបូង ក្នុងប្រវត្តិសាស្ត្ររបស់ខ្លួន។ នោះគឺ លោកស្រី Bidhya Devi Bhandari ដែលបេក្ខជនមកពីគណបក្សកុម្មុយនីសនេប៉ាល់ ដែលទទួលបានសំឡេងគាំទ្រចំនួន ៣២៧ ទល់នឹងគូប្រជែងលោកស្រីដែលទទួលបានការគាំទ្រចំនួន២១៤សំឡេង ក្នុងការបោះឆ្នោតកាលពីថ្ងៃទី២៨ ខែតុលា ម្សិលមិញនេះ។
ប្រធានសភានេប៉ាល់លោក Onsari Gharti Magarបានប្រកាសពីជ័យជម្នះរបស់លោកស្រី Bidhya Devi Bhandari ក្នុងការបោះឆ្នោតជ្រើសរើសជាប្រធានាធិបតីថ្មី។ អ្នកនយោបាយបក្សកុម្មុយនីសវ័យ៥៤ឆ្នាំរូបនេះ នឹងក្លាយជាប្រធានាធិបតីស្ត្រីទី១ របស់សាធារណរដ្ឋក្មេងខ្ចីមួយនេះ។
សូមបញ្ជាក់ផងដែរថា លោកស្រី Bhandari គឺជាអ្នកនយោបាយម្នាក់ដែលបានតស៊ូយ៉ាងខ្លាំងក្លាដើម្បីជំរុញឱ្យមានការគោរពសិទ្ធិស្ត្រីក្នុងប្រទេសនេប៉ាល់។ លោកស្រីជាមេដឹកនាំកុម្មុយនីសមកពីគណបក្សកាន់អំណាចរបស់នាយករដ្ឋមន្ត្រីបច្ចុប្បន្នលោក Khadga Prasad Oli ដែលទើបឈ្នះឆ្នោតផងដែរ។
លោកស្រី Bhandariក៏ជាអ្នកនយោបាយសកម្មម្នាក់ដែលបានចូលរួមក្នុងបាតុកម្មផ្តួលរំលំរបបរាជានិយមផ្ដាច់ការរបស់ស្ដេច Gyanendra ដើម្បីនាំយករបបប្រជាធិបតេយ្យមកឱ្យប្រជាជននេប៉ាល់។ ឥឡូវនេះ លោកស្រីគឺជាប្រធានាធិបតីទី២ របស់ប្រទេសនេះ បន្ទាប់ពីក្លាយជាសាធារណរដ្ឋក្នុងឆ្នាំ២០០៨ ។
សូមរម្លឹកផងដែរថា ចាប់តាំងពីរំលាយរបបរាជានិយមទៅជាសាធារណរដ្ឋនៅឆ្នាំ២០០៨ នេប៉ាល់មានប្រធានាធិបតីពីររូបមកហើយ។ ប្រធានាធិបតីទី១ គឺលោក Ram Baran Yadavនិងទី២ គឺលោកស្រីBhandariនេះតែម្ដង។ ចំពោះតំណែងប្រធានាធិបតីនេះ គឺមិនមានអំណាចអ្វីទេ ខណៈអំណាចទាំងអស់ គឺស្ថិតក្នុងដៃនាយករដ្ឋមន្ត្រីដែលជាអ្នកដឹកនាំរដ្ឋាភិបាល៕
Tag:
នេប៉ាល់
© រក្សាសិទ្ធិដោយ thmeythmey.com
