បក្សនយោបាយមីយ៉ាន់ម៉ាបារម្ភអំពើហិង្សាក្នុងថ្ងៃបោះឆ្នោតនៅជាងមួយសបា្តហ៍ទៀត

អន្តរជាតិ

នយោបាយអន្តរជាតិ

បក្សនយោបាយមីយ៉ាន់ម៉ាបារម្ភអំពើហិង្សាក្នុងថ្ងៃបោះឆ្នោតនៅជាងមួយសបា្តហ៍ទៀត

30, Oct 2015 , 9:10 am

រូបភាព

ដោយ: តន ចាន់រិទ្ធារ៉ា

គណបក្សនយោបាយនៅមីយ៉ាន់ម៉ាសម្ដែងការព្រួយបារម្ភចំពោះអំពើហិង្សានានាដែលអាចកើតឡើងនា ថ្ងៃបោះឆ្នោតទី៨ ខែវិច្ឆកាខាងមុខនេះ ។ គណបក្សមួយចំនួនដែលចូលរួមប្រជែងក្នុងការបោះឆ្នោតសភាមីយ៉ាន់ម៉ា បានអះអាងថា ករណីដូចជា ការហែកផ្ទាំងឃោសនា និងការបង្ហោះព័ត៌មានមិនពិតតាមបណ្ដាញសង្គម បានបង្ហាញពីភាពមិនប្រក្រតី និង សញ្ញាមិនល្អនោះទេសម្រាប់ការបោះឆ្នោត។

គណបក្សនយោបាយជាច្រើន លើកឡើងការព្រួយបារម្ភរបស់ខ្លួនចំពោះអំពើហិង្សាដែលអាចកើតមានក្នុងការបោះឆ្នោត ខណៈថ្ងៃកំណត់កាន់តែខិតមកដល់។ គណបក្សសម្ព័ន្ធជាតិដើម្បីប្រជាធិបតេយ្យរបស់ លោកស្រី អង់សាន សូជី បានចោទប្រកាន់គណបក្សដទៃទៀតថា បានប្រើយុទ្ធសាស្ត្រមិនល្អក្នុងពេលធ្វើយុទ្ធនាការបោះឆ្នោត។

យ៉ាងណាក៏ដោយ មកទល់ពេលនេះ មិនទាន់មានសេចក្ដីរាយការណ៏ពីសកម្មភាពហិង្សាណាមួយកើតឡើងនៅឡើយទេ ស្របពេលដែលគណបក្សទាំងអស់កំពុងធ្វើសកម្មភាពឃោសនារកសំឡេងឆ្នោតនៅតាមទីតាំងផ្សេងៗគ្នា។ ប៉ុន្តែ ក៏មានអ្នកសង្កេតការខ្លះបានបង្ហាញការព្រួយបារម្ភផងដែរ នៅពេលដែលគណបក្សទាំងនោះទទួលបានការគាំទ្រកាន់តែច្រើន។

ម៉ាន់ដាឡេ ជាតំបន់ដែលគេព្រួយបារម្ភថា អាចនឹងមានការកើតឡើងអំពើហិង្សាក្នុងថ្ងៃបោះឆ្នោត។ តំបន់នេះសម្បូរដោយសង្ឃជាតិនិយមជ្រុល ហើយមានគំនិតប្រឆាំងនឹងជនភាគតិចមូស្លីម។ លោកសង្ឃទាំងនេះ បានប្រកាសគាំទ្រប្រធានាធិបតីបច្ចុប្បន្នគឺលោក ថេន សេន ដែលកំពុងស្វះស្វែងសម្រាប់តំណែងប្រធានាធិបតីក្នុងអាណត្តិទី២។

តាមពិតទៅ រឿងអាក្រក់មិនត្រឹមកើតឡើងចំពោះបក្សប្រឆាំងនោះទេ សូម្បីបក្សកាន់អំណាចក៏ក្លាយជាគោលដៅសំខាន់ផងដែរ។ បេក្ខជនម្នាក់មកពីបក្សកាន់អំណាចត្រូវបានចោទប្រកាន់ថា ព្យាយាមទិញសំឡេងឆ្នោតដោយបានព្យាបាលជំងឺមិនគិតថ្លៃ។ ឯបេក្ខជនម្នាក់ទៀតលើកឡើងថា វាជារឿងអាក្រក់សម្រាប់មុខមាត់ប្រទេស ក៏ដូចជាបរិយាកាសនៃការបោះឆ្នោត។

គួររម្លឹកដែរថា ការបោះឆ្នោតនៅថ្ងៃទី៨ ខែវិច្ឆកា ត្រូវបានសហគមន៍អន្តរជាតិជាច្រើនរំពឹងថា ជាការបោះឆ្នោតសេរីនិងយុត្តិធម៌លើកដំបូងរបស់ប្រទេសចាប់តាំងពីការដកថយរបស់ក្រុមយោធាដែលបានកាន់អំណាចអស់ជាច្រើនទសវត្សរ៍មកហើយ។ កាលពីឆ្នាំ២០១០ រដ្ឋាភិបាលស៊ីវិលបានចូលកាន់តំណែង និងបានប្រកាសធ្វើកំណែទម្រង់ប្រទេសតាមបែបប្រជាធិបតេយ្យនៅក្នុងមីយ៉ាន់ម៉ា៕