បេក្ខជនប្រធានាធិបតីហៃទី ថា មានការកេងបន្លំនិងដុតសន្លឹកឆ្នោត

អន្តរជាតិ

នយោបាយអន្តរជាតិ

បេក្ខជនប្រធានាធិបតីហៃទី ថា មានការកេងបន្លំនិងដុតសន្លឹកឆ្នោត

30, Oct 2015 , 9:59 pm

រូបភាព

ដោយ: តន ចាន់រិទ្ធារ៉ា

ការបោះឆ្នោតជ្រើសរើសប្រធានាធិបតីថ្មីក្នុងប្រទេសហៃទី ត្រូវបានគេចោទប្រកាន់ថាមានការកេងបន្លំសន្លឹកឆ្នោត ដ្បិតមានការអះអាងមួយចំនួនថា សន្លឹកឆ្នោតរបស់បេក្ខជនប្រធានាធិបតី Moise Jean-Charlesត្រូវបានគេបំផ្លាញចោល។ ហេតុការណ៏នេះ បានដុតបញ្ឆេះកំហឹងរបស់ប្រជាជន ហើយ បានបណ្ដាលឱ្យមានការប្រឆាំងតវ៉ាក្នុងរដ្ឋធានីផងដែរ។

ភាពមិនប្រក្រតីជាច្រើនត្រូវបានគេរកឃើញក្នុងការបោះឆ្នោតប្រធានាធិបតី ជុំទី១ នៅក្នុងប្រទេសហៃទី។ សន្លឹកឆ្នោតរបស់បេក្ខជនម្នាក់គឺលោក Moise Jean-Charlesត្រូវបានប្រទះឃើញដុតចោល ដែលបណ្ដាលឱ្យមានការតវ៉ាដុតកង់ឡាននៅក្នុងរដ្ឋធានីនៃប្រទេសនេះ។

លោក Jean-Charles ត្រូវបានគេមើលឃើញថា ជាបេក្ខជនលេចធ្លោម្នាក់ក្នុងចំណោមបេក្ខជនប្រមាណ៥០នាក់ផ្សេងទៀត បន្ទាប់ពីការបោះឆ្នោតជុំទី១ ។ លោក Jean-Charles បានអះអាងថា លោកមានសង្ឃឹមខ្ពស់ដែលអាចឈានដល់ជុំទី២នៃការបោះឆ្នោតជ្រើសរើសប្រធានាធិបតី ដែលគ្រោងធ្វើនៅថ្ងៃទី២៧ ខែធ្នូ ខាងមុខ។

ស្របពេលដែលលទ្ធផលនៃការបោះឆ្នោតនៅមិនទាន់ដឹងនៅឡើយនោះ ក្រុមបាតុករដែលគាំទ្រលោក Jean-Charles បាននិយាយថា ពួកគេបានប្រទះឃើញសន្លឹកឆ្នោតជាច្រើនត្រូវបានគេដុតបំផ្លាញនៅក្នុងបរិវេណផ្ទះមួយកន្លែងក្បែរទីក្រុង Port-au-Prince។ ឯលោក Jean-Charles ក៏បានបញ្ជាក់ដែរថា សន្លឹកឆ្នោតដែលគូសគាំទ្ររូបលោកបានបាត់ដោយមិនដឹងមូលហេតុ និង មានសកម្មភាពជាច្រើនទៀតដែលធ្វើឱ្យសំឡេងគាំទ្រថយចុះ។ ហើយ លោក Jean-Charles ក៏ព្រមានថាវាអាចនឹងឈានដល់ការជ្រួលច្របល់ខាងនយោបាយក្នុងប្រទេស។

ប៉ុន្តែមន្ត្រីទទួលបន្ទុកការបោះឆ្នោតហៃទីបានបដិសេធការចោទប្រកាន់ទាំងនេះ។ ឯមន្ត្រី រដ្ឋាភិបាលហៃទី បានលើកឡើងថា ការអះអាងរបស់លោក Jean-Charlesជាការប្រឌិតសុទ្ធសាធ។ បើយោងតាមច្បាប់បោះឆ្នោតហៃទី ក្រៅពីក្រុមប្រឹក្សាបោះឆ្នោត គណបក្សនយោបាយនានា មិនត្រូវបានអនុញ្ញាតឲ្យប្រកាសលទ្ធផលជាសាធារណៈឡើយ៕