ជាតិ
សង្គមជាតិ
សេដ្ឋកិច្ច
លោក ហ៊ុន សែន និយាយថា «គាត់ឈប់រាប់អាន»មន្ត្រីលេងល្បែងទៀតហើយ
× ភ្នំពេញ៖ លោក ហ៊ុន សែន នាយករដ្ឋមន្ត្រីនៃប្រទេសកម្ពុជាអំពាវនាវនៅថ្ងៃអាទិត្យទី១ខែវិច្ឆិកាឲ្យប្រជាពលរដ្ឋទាំងអស់ឈប់លេងល្បែងបៀ ឆ្នោត និងល្បែងភ្នាល់កីឡាប្រដាល់។ មិនត្រឹមតែប៉ុណ្ណោះ ប្រមុខរាជរដ្ឋាភិបាលកម្ពុជាបានបង្ហើបឲ្យដឹងថា លោកបានឈប់រាប់អានមន្ត្រី និងមនុស្សមួយចំនួនដែលចូលចិត្តលេងល្បែង ហើយសុំប្រាក់ពីគាត់។
នៅក្នុងពិធីសំណេះសំណាលជាមួយជនពិការ និងចំថ្ងៃបើកបវេសនកាលឆ្នាំសិក្សា២០១៥-២០១៦, ពីខេត្តកំពត, ប្រមុខរាជរដ្ឋាភិបាលលោក ហ៊ុន សែន បានមានប្រសាសន៍បែបកំប្លែងលេងបន្តិចផងថា លោកមិនអាចរាប់អានមន្ត្រី និងមនុស្សមួយចំនួនដែលលោកស្គាល់ ហើយលេងល្បែងនោះទៀតឡើយ។ «ខ្ញុំសូមផ្ញើសារពីទីនេះទៅតែម្តង។ ខ្ញុំមានអារម្មណ៍ខ្មាសអៀន។ ពួកគាត់គិតតែពីត្រូវការលុយពីយើង។ រីឯខ្ញុំ, ខ្ញុំត្រូវការទុកលុយរបស់ខ្ញុំដើម្បីឧបត្ថម្ភជនពិការ ឬអ្នកក្រីក្រ។ ហេតុអ្វីខ្ញុំត្រូវឲ្យគេបោក?»។
បើទោះបីជាលោកនិយាយពីមន្ត្រីក៏ដោយ ប៉ុន្តែលោកប្រមុខរាជរដ្ឋាភិបាលកម្ពុជាមិនបានបង្ហាញអត្តសញ្ញាណមន្ត្រីនោះថា ជានរណាទេ។ មិនត្រឹមតែផ្ញើសារទៅកាន់មន្ត្រីដែលធ្លាប់រកលុយពីលោកទេ តែលោកនាយករដ្ឋមន្ត្រី ហ៊ុន សែនអំពាវនាវឲ្យប្រជាជនខ្មែរទូទាំងប្រទេសបញ្ឈប់នូវរាល់ទម្រង់ល្បែងស៊ីសង ដូចជាល្បែងបៀល្បែងចាក់កន្ទុយលេខ ឬល្បែងចាក់កីឡាប្រដាល់ជាដើម។ លោកអំពាវនាវឲ្យអាជ្ញាធរបោសសម្អាតមេកន្ទុយលេខ និងមេល្បែង។
លោកនាយករដ្ឋមន្ត្រីបន្ថែមទៀតថា៖«សូមបញ្ឈប់រឿងកាត់យល់សប្តិទៀតទៅ។ អ្នកខ្លះយល់សប្តិឃើញខ្ញុំ ក៏ចាក់តាមអាយុខ្ញុំ៦៥ឆ្នាំ តាមពិត អាយុពិតរបស់ខ្ញុំវាផ្សេងពីនេះទេ»។ «បើចង់ទទួលបានការរាប់អានដ៏ស្មោះស្ម័គ្រពីខ្ញុំ ត្រូវឈប់លេងល្បែង»។ នេះគឺជាការអំពាវនាវបន្ថែមរបស់លោក ហ៊ុន សែន៕
Tag:
លោកនាយករដ្ឋមន្ត្រី ហ៊ុន សែន
© រក្សាសិទ្ធិដោយ thmeythmey.com