អន្តរជាតិ
នយោបាយអន្តរជាតិ
ប្រធានាធិបតីតៃវ៉ាន់ជួបប្រមុខរដ្ឋចិនបញ្ជាក់ពីភាពជិតស្និទ្ធរវាងចិននិងតៃវ៉ាន់
×
ប្រធានាធិបតីចិន លោក ស៊ី ជិនពីង (Xi Jinping) និងប្រធានាធិបតីតៃវ៉ាន់ លោក Ma Ying-jeou នឹងជួបគ្នាជាលើកដំបូងក្នុងប្រវត្តិសាស្ត្រ រាប់ចាប់ ពីបញ្ចប់សង្គ្រាមស៊ីវិលក្នុងឆ្នាំ១៩៤៩ ។ ជំនួបជាប្រវត្តិសាស្ត្រនឹងធ្វើឡើងនៅថ្ងៃសៅរ៍នេះនៅសិង្ហបុរី។ តែមេដឹកនាំតៃវ៉ាន់មិនផ្តល់ដំណឹងទៅសភាជាមុនពីជំនួបនេះទេ។
មេដឹកនាំចិននិងតៃវ៉ាន់នឹងជួបគ្នាលើកដំបូងក្នុងប្រវត្តិសាស្ត្រ បន្ទាប់ជ័យជម្នះរបស់បក្សកុម្មុយនីស្តចិនលើបក្សគូមីងតាំង អំឡុងពេលសង្គ្រាមស៊ីវិលក្នុងឆ្នាំ១៩៤៩ ។ មេដឹកនាំបក្សគូមីងតាំងបានរត់ទៅបង្កើតសាធារណរដ្ឋចិននៅកោះតៃវ៉ាន់ ឯបក្សកុម្មុយនីស្តចិនបានបង្កើតសាធារណរដ្ឋប្រជាមានិតចិននៅលើដីគោក មកដល់សព្វថ្ងៃនេះ។ ថ្វីបើធ្វើឲ្យប្រជាជនតៃវ៉ាន់មួយចំនួនមិនសប្បាយចិត្តព្រោះជំនួបពិសេសនេះក៏ដោយ ក្រុងប៉េកាំងកំពុងរីករាយព្រោះខ្លួនអាចបង្កើនឥទ្ធិពលរបស់ខ្លួននៅតៃវ៉ាន់បាន។
បើតាមអ្នកនាំពាក្យរបស់លោក Ma ប្រធានបទសំខាន់ក្នុងជំនួបជាប្រវត្តិសាស្ត្រនេះ គឺបញ្ហាច្រកសមុទ្រដែលបែងចែកចិនដីគោកនិងតៃវ៉ាន់។ មេដឹកនាំទាំងពីរនឹងផ្ដោះប្ដូរយោបល់គ្នាជុំវិញបញ្ហាទាំងឡាយដែលកើតឡើងក្នុងច្រកសមុទ្រនេះនិងបន្តការក្សាស្ថិរភាពនៅទីតាំងនេះ។ ប៉ុន្តែអ្នកនាំពាក្យបន្តថា កិច្ចពិភាក្សានឹងមិននាំឲ្យមានការចុះហត្ថលេខាលើកិច្ចព្រមព្រៀងឬការចេញសេចក្ដីថ្លែងការរួមគ្នាអ្វីនោះទេ។
ចំណែកឯខាងក្រុងប៉េកាំងឯណោះវិញក៏បានបញ្ជាក់ពីជំនួបនេះដែរ។ សារព័ត៌មានរដ្ឋចិនបានប្រកាសថា ប្រធានាធិបតីចិន លោក ស៊ី ជិនពីងនឹងជួបលោក Ma Ying-jeou នៅសិង្ហបុរីនាចុងសប្ដាហ៍នេះ។
ជំនួបលើកដំបូងជាប្រវត្តិសាស្ត្ររវាងប្រធានាធិបតីតៃវ៉ាន់ និងចិន នឹងលេចជារូបរាងឡើង ខណៈទំនាក់ទំនងរវាងចិននិងតៃវ៉ាន់មានភាពកាន់តែល្អប្រសើរនាពេលប៉ុន្មានឆ្នាំចុងក្រោយនេះ។ ពោលគឺក្រោយការឡើងកាន់អំណាចរបស់លោក Maនៅឆ្នាំ២០០៨ ។ ប្រមុខរដ្ឋតៃវ៉ាន់ហាក់មានគោលនយោបាយទន់ភ្លន់ចំពោះទីក្រុងប៉េកាំង ពីព្រោះលោកបានចាត់ទុកការជំរុញឱ្យមានទំនាក់ទំនងល្អជាមួយចិនដីគោកជារឿងសំខាន់ក្នុងការដឹកនាំប្រទេសរបស់លោក។
យ៉ាងណាក៏ដោយ ជំនួបនេះមិនបានធ្វើឱ្យប្រជាជនតៃវ៉ាន់ទាំងអស់សប្បាយចិត្តនោះទេ។ គណបក្សប្រឆាំងរបស់កោះតៃវ៉ាន់បានលើកឡើងថា លោក Ma មិនបានប្រាប់សភាពីជំនួបនេះទេ។ លើសពីនេះ ក្រុមប្រឆាំងសម្តែងការព្រួយបារម្ភពីការជ្រៀតជ្រែករបស់ចិនដីគោកមកក្នុងកិច្ចការផ្ទៃក្នុងរបស់ខ្លួន ខណៈការបោះឆ្នោតខិតជិតមកដល់។ ពួកគេព្រមានថា ចិនដីគោកនឹងប្រើប្រាស់ជំនួបនេះ ដើម្បីផលប្រយោជន៍ផ្ទាល់របស់គេ។
សូមរម្លឹកថា ទីក្រុងប៉េកាំងតែងចាត់ទុកទឹកដីកោះតៃវ៉ាន់ជាផ្នែកមួយរបស់ខ្លួន។ មិនតែប៉ុណ្ណោះ ចិនតែងតែគំរាមប្រើប្រាស់កម្លាំងទ័ពដើម្បីវាយដណ្ដើមតៃវ៉ាន់មក ប្រសិនបើតៃវ៉ាន់ហ៊ានប្រកាសឯករាជ្យដោយឯកតោភាគី។ ឯតៃវ៉ាន់ដែលមានអាមេរិកពីក្រោយខ្នងបានខិតខំយ៉ាងខ្លាំងដើម្បីការពារអ្វីដែលខ្លួនមាននាពេលសព្វថ្ងៃ៕
© រក្សាសិទ្ធិដោយ thmeythmey.com