អន្តរជាតិ
នយោបាយអន្តរជាតិ
លោក ថេន សេន ព្រមានពីសង្គ្រាមបង្ហូរឈាមប្រសិនបើបក្សខ្លួនចាញ់ឆ្នោត
×
ប្រធានាធិបតីមីយ៉ាន់ម៉ា លោក ថេន សេន និងជាប្រមុខគណបក្សកាន់អំណាចបានបង្ហោះវីដេអូមានលក្ខណៈព្រមាននៅលើទំព័រហ្វេសប៊ុកផ្លូវការរបស់លោក។ ក្នុងវីដេអូរយៈពេល៤នាទីលោក ថេន សេន បានព្រមានពីការកើតឡើងអំពើហិង្សា ដែលលោកប្រដូចអ្វីដែលបានកើតឡើងក្នុងបដិវត្តន៍អារ៉ាប់នៅមជ្ឈិមបូព៌ា។
លោក មុំ ពិទូរ្យ លម្អិតព័ត៌មាននេះ
ទំព័រហ្វេសប៊ុកផ្លូវការរបស់ប្រធានាធិបតីមីយ៉ាន់ម៉ា លោក ថេន សេន បានបង្ហោះវីដេអូព្រមានមួយដែលបានលើកឡើងថា អំពើហិង្សាបង្ហូរឈាមនឹងកើតមាន ប្រសិនបើគណបក្សលោកចាញ់ការបោះឆ្នោត នាថ្ងៃអាទិត្យខាងមុខនេះ។ វីដេអូនេះបានបង្កឱ្យមានការខឹងសម្បាយ៉ាងខ្លាំងក្នុងចំណោមអ្នកប្រើប្រាស់ហ្វេសប៊ុកមីយ៉ាន់ម៉ា។
ការបង្ហោះវីដេអូព្រមាននេះធ្វើឡើងតែប៉ុន្មានថ្ងៃប៉ុណ្ណោះ មុនថ្ងៃបោះឆ្នោតមកដល់។ គណបក្សប្រឆាំងរបស់ជ័យលាភីណូបែលសន្តិភាពលោកស្រី អង់សាន ស៊ូជី រំពឹងថានឹងទទួលជ័យជម្នះភ្លូកទឹកភ្លូកដី។
ក្នុងវីដេអូនោះ គេឃើញមានរូបភាពនៃអំពើហិង្សាដែលកើតឡើងនៅមជ្ឈិមបូព៌ាដាក់ព្រមគ្នាជាមួយរូបភាពបង្ហាញពីសុខសន្តិភាពនិងការអភិវឌ្ឍក្នុងប្រទេសមីយ៉ាន់ម៉ាកំឡុងពេលអន្តរកាលទៅរកប្រជាធិបតេយ្យនិងអមដោយសំឡេងភ្លេងពីក្រោយ។ បើតាមលោក Zaw Htay ប្រធានការិយាល័យប្រធានាធិបតី វីដេអូដដែលនេះបញ្ចប់ទៅជាមួយប្រយោគថា លុះត្រាតែមានសន្តិភាព ទើបដំណើរឆ្ពោះទៅរកប្រជាធិបតេយ្យអាចទទួលជោគជ័យបាន។
លើសពីនេះទៀត លោក Zaw Htay បានលើកឡើងពីដំណើរការប្រជាធិបតេយ្យនៅក្នុងប្រទេសនិងប្រៀបធៀបស្ថានភាពមីយ៉ាន់ម៉ាជាមួយព្រឹត្តិការណ៍ដែលបានកើតឡើងនៅតំបន់អារ៉ាប់។ លោកបន្តថា មីយ៉ាន់ម៉ាមានស្ថិរភាពនិងកំពុងបោះជំហានទៅមុខ ហើយយើងត្រូវរង់ចាំបន្តទៀត។ ប៉ុន្តែបក្សប្រឆាំងបានបង្ហាញការព្រួយបារម្ភថា ដំណើរការប្រជាធិបតេយ្យនៅមីយ៉ាន់ម៉ាកំពុងតែដើរថយក្រោយទៅវិញ។
គួរបញ្ជាក់ថា អំពើហិង្សានៅតែបន្តកើតឡើងក្នុងមីយ៉ាន់ម៉ានាពេលថ្មីៗនេះ។ ជាពិសេស ជម្លោះសាសនារវាងពុទ្ធសាសនិកនិងជនមូស្លីមរ៉ូហ៊ីងយ៉ា។ ម្យ៉ាងទៀត ការរំលោភបំពានសិទ្ធិមនុស្សនៅតែបញ្ហាប្រឈមសម្រាប់រដ្ឋាភិបាលមីយ៉ាន់ម៉ា។ រដ្ឋាភិបាលរបស់លោក ថេន សេន ត្រូវចោទប្រកាន់ថាបានរំលោភបំពានសិទ្ធិមនុស្សយ៉ាងធ្ងន់ធ្ងរ តួយ៉ាងការប្រយុទ្ធជាមួយក្រុមឧទ្ទាមភាគតិចនាពេលកន្លងមក៕
Tag:
មីយ៉ាន់ម៉ា
ថេនសេន
© រក្សាសិទ្ធិដោយ thmeythmey.com