អន្តរជាតិ
នយោបាយអន្តរជាតិ
ប្រធានកិត្តិយសបក្សប្រឆាំង៖ លោកស្រី ស៊ូជី នៅតែមានសិទ្ធិធ្វើជាប្រធានាធិបតី
× ក្នុងកិច្ចសម្ភាសជាមួយវិទ្យុអាស៊ីសេរី ប្រធានកិត្តិយសគណបក្សសម្ព័ន្ធជាតិដើម្បីប្រជាធិបតេយ្យ លោក Tin Oo និយាយថា លោកស្រី អ៊ុងសាន ស៊ូជី នៅតែអាចក្លាយប្រធានាធិបតីមីយ៉ាន់ម៉ា ទោះបីរដ្ឋធម្មនុញ្ញហាមឃាត់ក៏ដោយ។ លោកបាននិយាយដូចនេះ ខណៈដែលលទ្ធផលបឋមបង្ហាញថា គណបក្សប្រឆាំងរបស់លោកស្រី ស៊ូជី កំពុងមានសំឡេងនាំមុខដាច់លើគណបក្សកាន់អំណាច។
មីយ៉ាន់ម៉ាទើបតែបញ្ចប់ការបោះឆ្នោតជាប្រវត្តិសាស្ត្ររបស់ខ្លួនកាលពីថ្ងៃអាទិត្យ ហើយពេលនេះជាដំណាក់កាលរាប់សន្លឹកឆ្នោត។ លទ្ធផលបឋមបង្ហាញថា គណបក្សប្រឆាំងរបស់លោកស្រី ស៊ូជីបានទទួលសំឡេងគាំទ្រយ៉ាងច្រើនលើសលប់។ ជាមួយលទ្ធផលនេះ មេដឹកនាំម្នាក់របស់បក្សប្រឆាំងលើកឡើងថា លោកស្រី ស៊ូជី នឹងក្លាយជាមេដឹកនាំមីយ៉ាន់ម៉ា។
អំឡុងពេលផ្ដល់បទសម្ភាសដល់វិទ្យុអាស៊ីសេរី ប្រធានកិត្តិយសគណបក្សសម្ព័ន្ធជាតិដើម្បីប្រជាធិបតេយ្យ លោក Tin Oo ត្រូវបានសួរថា តើមីយ៉ាន់ម៉ានឹងមានប្រធានាធិបតីជាលោកស្រី អង់សាន ស៊ូជីឬទេ? លោក Tin Oo ឆ្លើយថា ខ្ញុំមានជំនឿចិត្តថា លោកស្រី ស៊ូជី នៅតែក្លាយជាប្រធានាធិបតី ទោះបីរដ្ឋធម្មនុញ្ញរារាំងក៏ដោយ។ រឿងនេះនឹងកើតឡើង អីុចឹងហើយបានជាខ្ញុំធ្វើការជួយលោកស្រី។
យ៉ាងណាមិញ លោក Tin Oo មិនបានបញ្ជាក់ឱ្យច្បាស់ពីរឿងនេះទេ។ លោកគ្រាន់តែនិយាយថា ដំណើរការទៅមុខនឹងត្រូវធ្វើតាមបែបប្រជាធិបតេយ្យនិងដោយអហិង្សា។ លោកស្រី ស៊ូជី នឹងធ្វើការសម្របសម្រួលមួយជាមុនសិន ហើយរដ្ឋធម្មនុញ្ញឆ្នាំ២០០៨ នឹងត្រូវកែប្រែ។
ក្នុងបទសម្ភាសដដែលនោះ លោក Tin Oo ក៏បានលើកសរសើរពីលក្ខណសម្បត្តិរបស់លោកស្រី ស៊ូជី ដែលស័ក្ដិសមជាមេដឹកនាំប្រទេស។ លោកបញ្ជាក់ថា យើងមានមេដឹកនាំដែលពូកែ វាងវៃ និងមានសមត្ថភាពគ្រប់គ្រាន់សម្រាប់ប្រទេស។ លោកស្រី ស៊ូជី គឺជាវីរនារីសម្រាប់ប្រជាជនមីយ៉ាន់ម៉ាទាំងអស់។
គួរបញ្ជាក់ថា រដ្ឋធម្មនុញ្ញមីយ៉ាន់ម៉ាដែលបានព្រាងដោយរដ្ឋាភិបាលយោធានៅឆ្នាំ២០០៨ បានរារាំងលោកស្រី ស៊ូជី ធ្វើជាប្រធានាធិបតី។ វាក្យខណ្ឌមួយរបស់មាត្រា៥៩នៃរដ្ឋធម្មនុញ្ញនេះ បញ្ជាក់ថា‹‹ប្រធានាធិបតីឬអនុប្រធានាធិបតី មិនគួរមានឱពុកម្ដាយឬស្វាមីភរិយាឬកូន ដែលមានសញ្ជាតិបរទេសឡើយ››។ ប្ដីនិងកូនប្រុសពីរនាក់របស់លោកស្រី ស៊ូជី មានសញ្ជាតិអង់គ្លេស។
Tag:
អ៊ុងសាន ស៊ូជី
បោះឆ្នោតមីយ៉ាន់ម៉ា
មីយ៉ាន់ម៉ា
© រក្សាសិទ្ធិដោយ thmeythmey.com